भांगरभूंय | प्रतिनिधी
चेतन बरेगर : ‘डिपोझीट रिटर्न स्कीम’ सुटसुटीत
भांगरभूंय । प्रतिनिधी
पणजी : डिपोझीट रिटर्न स्किम (डीआरएस) ही येवजण सुटसुटीत आनी सोपी आसा. एकदां खंयचीय प्लास्टीक बाटली वा कॅनाचेर डिपोझीट रकम भरले उपरांत ती बाटली तुमी आपल्या घरां, दुकानार वा लागींच्या व्हेडींग माक्नांत जमा करून डिपोझीट परत मेळोवपाक शकतात. हे यंत्रणेचो आतां पुराय गोंयभर विस्तार जातलो, अशें डीआरएस सिस्टम ऑपरेटर्सचे वरिश्ठ संचालक चेतन बरेगर हांणी सांगलें.
कापांल पणजे आयोजीत केल्ल्या काजू फेस्ताक डीआरएसान आपलें दालन घातलां. ह्या दालनांत डीआरएस यंत्रणा कशी काम करता हाचें प्रात्यक्षीक फेस्ताक येवपी लोकांक दाखयतात.
हे विशींचें प्रात्यक्षीक दाखयतना बरेगर हांणी सांगलें, जर 10 रुपयांची उदकाची बाटली घेतली जाल्यार ताचेर एक रुपया सरकार डिपोझीट म्हूण कापतले आनी ही बाटली वट्ट 11 रुपयांक पडटली.
हे बाटलेचेर एक क्यूआर कोड आसतलो. रिती बाटली माक्नाचेर व्हरून स्कॅन करची. उपरांत थंय एक रुपया डिपोझिटाचो दाखयतले. मागीर तुमचो यूपीआय स्कॅन केले उपरांत 2 ते 4 सेकंदां भितर हे डिपोझिटाचे पयशे तुमच्या खात्यांत येतले, अशें बरेगर हांणी सांगलें.
दुकानाचेर एक ल्हान माक्न आसतलें आनी तें हातळपाक एक मनीस आसतलो. एकादां बाटली वा कॅन स्कॅन केले उपरांत तो मनीस ही वस्त घेतलो. यूपीआय क्यूआर कॉड स्कॅन केले उपरांत तुमचे पयशे तुमच्या हातातं येतले. व्हडले रिटेल दुकानांनी आमकां मनशांची गरज ना. थंय तुमी आपल्यो बाटल्यो वा कॅन स्कॅन करून ते एके बॅगेंत घालचे आनी आपले पयशे घेवन वच्चे, अशी म्हायती बरेगर हांणी दिली.
तशेंच दारादारांनी कोयर एकठांय करपी मनशा कडेन आमी ल्हान मोबायल माक्नां दितले. घरा कडेन आयले उपरांत ते बाटली वा कॅन स्कॅन करतले. माक्नाचेर डिपोझीट रक्कम आयले उपरांत यूपीआय कोड स्कॅन करचो आनी थंयच्या थंय डिपोझीट वसूल जातले, अशें बरेगर हांणी सांगलें.
ते भायर एआय आदारीत व्हड व्हेण्डींग माक्न आमी गोंयभर बसयतले. लोकांनी आपल्यो बाटल्यो वा कॅन ह्या मशिनांत घालचे. माक्न ताचो कोड स्कॅन करतले आनी कुशीच्या स्क्रिनीचेर डिपोझिटाची रकम दाखयतले. यूपीआय कोड माक्नाचेर स्कॅन केले उपरांत हे पयशे तुमच्या बँकेंत येतले. सद्या एके पंचायतींत एक व्हेण्डींग माक्न बसोवपाचो प्रस्ताव आसा. जर मागणी वाडली जाल्यार ह्या माक्नाचे संख्येंत वाड जातली, अशी म्हायती बरेगर हांणी दिली.
हे येवजणेची अंमलबजावणी पुराय गोंयभर सरकार करतले आनी निविदा प्रक्रिये वरवीं आमकां फक्त ऑपरेटर म्हण नेमल्यात. ही सगली प्रक्रिया सरकाराची जापसालदारकी आनी लोकांक जागृत करप, ह्या माक्नाच्या वापरा विशीं शिक्षीत करप हें काम. जे डिपोझिटाचे पयशे आसात ते सरकारच्या खात्यांत जमा जातले आनी रिफंड हो सरकाराच्या खात्यांतल्यानूच मेळटलो, अशें बरेगर हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
