भांगरभूंय | प्रतिनिधी
निश्कृश्ट दर्जाक लागून अन्न आनी वखदां प्रशासनाची कारवाय
भांगरभूंय । प्रतिनिधी
म्हापशें: बागा कळंगूटे अन्न आनी वखदां प्रशासनान एका काजूबियो पुरवण करपी गुदांवाचेर धाड घातली आनी विकपाक हाडिल्ल्यो निश्कृष्ट दर्ज्याच्यो 3 हजार कील काजूबियो जप्त केल्यो. जप्त केल्ल्या ह्या म्हालाचें मोल सुमार 3.50 लाख रुपया आसा. गुदांवाचो धनी अविनाश पोवार (रा. आजरा महाराष्ट्र) हाचे आड गुन्यांव नोंद केला.
ही कारवाय प्रशासनाच्या पंगडान सोमारा 28 ऑक्टोबराक सांजे उसरां केली. कळंगूटे निश्कृष्ट दर्ज्याच्या काजूबियांची दुकानदारांक पुरवण करतात, अशी म्हायती अन्न आनी वखदां प्रशासनाक मेळिल्ली. ते प्रमाण अधिकाऱ्यांनी पाळत दवरिल्ली.
बागा वाठारांतल्या एका गुदांवांतल्यान ही पुरवण जाता अशी म्हायती प्रशासनाच्या अधिकाऱ्यांक मेळटाच ह्या पंगडान त्या गुदांवाचेर धाड घातली. पंगडान पाकिटांत बंद केल्ल्या तशेंच पोतयांनी भरून दवरिल्ल्या काजूबियांची तपासणी केली. तेन्ना गुदांवांत आशिल्लो सुमार 3 हजार कील काजूबियांचो म्हाल हो निश्कृश्ट आनी दर्जोहीन आशिल्ल्याचें दिसून आयलें.
दुबावीत पुरवणदारान पाकीट बंद केल्ल्या पाव ते एक कील काजूबियांनी पेड्डेर काजूबियो मिस्तुराद केल्ल्यो. हो दुबावीत आपल्या बागांतल्या पटेल काजू ह्या दुकानांतल्यान तशेंच हेर दुकानकारांक म्हालाची पुरवण करून ह्या निश्कृश्ट दर्ज्याच्यो काजू बियो विकतालो, अशें ह्या पंगडाचे नदरेक आयलें.
ह्यो सगळ्यो काजूबियो प्रशासनान जप्त केल्यो आनी ताचे नमुने घेतले उपरांत त्या म्हालाचो विलो लायलो. तशेंच दुबाविताचेर अन्न आनी वखदां प्रशासन कायद्या खाला गुन्यांव नोंद केलो. प्रशासनाची संचालक श्वेता देसाय हांच्या मार्गदर्शना खाला अधिकारी रिचर्ज नोरोन्हा, राजाराम पाटील, माधव कवळेंकार, भक्ती वाळके, लेनीन डिसा, साफिया खान आनी विश्वास राणे ह्या पंगडान ही कारवाय केली.
‘गोंयांत येवपी पेड्डेर म्हालाची चवकशी करतले’
कळंगूटे दर्यादेगेर निश्कृश्ट दर्जाच्या काजूबियांची पुरवण करप्यां आड प्रशासनान मोहीम हातांत घेतल्या. ते प्रमाण सोमारा कारवाय केली. हो पेड्डेर म्हाल गोंयांत खंयच्यान येता ताची खोलायेन चवकशी करतले. आमी अविनाश पोवार हाका धरून ताचे आड गुन्यांव नोंद केला. ते आदीं जिल्होधिकाऱ्यान अश्याच गुन्यांवांत ताका 60 हजारांचो दंड दिल्लो. आतां ताणें परतून गुन्यांवकेला. ताचेर खर दंडात्मक कारवाय करपा सयत हे मुखार ताका गोंयांत काजू विक्री वेवसाय करपाचेर बंदी घालपाची विनवणी आमी जिल्होदिकाऱ्या कडेन करतले, अशें अन्न आनी वखदां प्रशासनाचे अधिकारी रिचर्ड नोरोन्हा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
