भांगरभूंय | प्रतिनिधी
भांगरभूंय । प्रतिनिधी
कळंगुटेः कळंगुटे ग्रामपंचायतीचे आयतारा जाल्ले ग्रामसभेंत लोकांनी बागा न्हंयेत घाणयारें उदक सोडटात ताचे आड गुन्यांव नोंद करपाची सूचोवणी कळंगुटे पुलिसांक सांगलां. विशेश म्हणल्यार पंचायतीचे मान्यताये बगर घाणयाऱ्या उदकाचेर प्रक्रिया करपी प्रकल्प (एसटीपी) सुरू केल्ले खातीर बांदकाम खात्याच्या कार्यकारी अभियंत्या आड एफआयआर नोंद करपाक सरपंच जोसेफ सिकेरा हाणे पुलिसांक सांगलां.
एसटीपीच्या वेवस्थापनान सध्या जें कितें चलयलां ताचे आड गोंय प्रदूशण नियंत्रण मंडळ, पर्यावरण मंत्री नीलेश काब्राल हाचे कडेन कागाळ करपी पत्रां बरयल्यांत अशी म्हायती सिकेरान ग्रामसभेक दिली. बागा न्हंयेत प्रक्रिया करूंक नाशिल्लें घाणयारें उदक सोडटात हें सरपंचान मानून घेतलें. उक्ते सुवातांनी घाणयारें उदक सोडटात ताचो वायट परिणाम पर्यावरणाचे जाता अशें ताणे सांगलें.
फाटल्या सप्तकांत पंचायतीचे समितीन एसटीपी प्रकल्पाची पळोवणी करून ताचें काम बेगोबेग बंद करपाक सांगल्लें. कळंगुटे पुलीस स्टेशनाच्या निरीक्षकाची भेट घेवन आमी कार्यकारी अभियंत्या आड गुन्यांव नोंद करपाक सांगला. कारवाय करपाचें काम आता कळंगुटे पुलिसांचें आसा. कागाळ नोंद करपाक सांगपाचें सोडून बाकीचें आपूण कांय करपाक शकना अशें ताणे ग्रामसभेक सांगलें. कळंगुटे पुलिसां कडेन न्हय जाल्यार राज्य प्रदूशण नियंत्रण मंडळा कडेन पंचायत मंडळान कागाळ करपाक जाय अशें अँथनी डिसोझान सांगलेें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
