भांगरभूंय | प्रतिनिधी
म्हापशेंः बागा- कळंगुटे एका फ्लॅटांत पुलिसांनी धाड घालून ऑनलायन आयपीएल क्रिकेट बेटिंग उक्तडार हाडली. ह्या प्रकरणांत मध्य प्रदेशांतल्या तिगांक अटक केल्या. तांचे कडल्यान 7 मोबायल आनी 1 लॅपटॉप मेळून 1.10 लाखांचें सामान जप्त केला. अटक केल्ल्या दुबावितांची नांवा अनिकेत राठोड (34) बादल (32) आनी अजय (32) अशीं आसात.
कोलकाता नायट रायडर्स आनी गुजरात टायटन्स हांचे मदीं सोमारा रातीं 21 तारखेक जाल्ले मॅची वेळार कळंगुटे पुलिसांनी ही कारवाय केली. बागाच्या साल्ढाणा केल गार्डन इमारतींतल्या अर्शस् नेस्ट फ्लॅटांत आयपीएल ऑनलायन बेटींग सुरू आशिल्ल्याची म्हायती पुलिसांक मेळिल्ली. निरिक्षक परेश नायक हांच्या फुडारपणा खाला वांगडी पुलिसांनी फ्लॅटाचेर धाड घालून वयल्या तिगूय दुबावितांक धरले. दुबावितां आड गुन्यांव नोंद केला. पुलीस अधीक्षक अक्षत कौशल आनी उपअधीक्षक विश्वेश कर्पे हांच्या मार्गदर्शना खाला फुडलो तपास सुरु आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
