भांगरभूंय | प्रतिनिधी
समीप नार्वेंकार, पणजीः गोंयच्या बागायती मळार सध्या खुशालकायेचे दीस आयल्यात. फाटल्या वर्साचे तुळेंत अंदूं बागायती पिकावळींत १६०० परस चड टनांत वाड नोंद जाल्या. हे खेपे काजू, आंबे, सुपारी आनी मसाल्यांचे पिकावळींत बरीच वाड नोंद जाल्या. जाल्यार नाल्लांच्या उत्पन्नांत उणाव नोंद जाला, अशी म्हायती शेतकी खात्याच्या वरीश्ठ अधिकार्यांनी दिल्या.
अधिकार्यान दिल्ले म्हायती प्रमाण, वर्स २०२३-२४त १.१३ लाख टन इतली बागायती पिकावळ तयार जाल्ली. अंदूच्या हंगामांत वाड जावन वर्स २०२४-२५त पिकावळ १.१४ लाख टन मेरेन पावल्या. हे खेपे बागयतीचे पिकावळींत १,६०९ टन इतली वाड नोंद जाल्या.
फाटल्या हंगामाचे तुळेंत ह्या हंगामांत काजुचे पिकावळींत ६४२ टन, आंबे ३६१ टन, केळी १७४ टन, सुपारी २४ टन आनी भिण्णां तशेंच मिरयांचे पिकावळींत १२ टन इतली वाड नोंद जाल्या.
मजगतीं फाटल्या वर्साचे तुळेंत नाल्लाचे लागवडींत हे खेपे वाड नोंद जाल्या. मात ह्या वर्सा नाल्लांची पिकावळ एक कोटी नग इतलो उणाव दिसून आयला. जाल्यार अनसाचे पिकावळींत लेगीत ५८ टन उणाव नोंद जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
