बाकीबाबांच्या ‘शांतीनिकेतना’चें रूप बदलपाचे वाटेर

भांगरभूंय | प्रतिनिधी

मडगांवच्या फोंड्यां आनी फोंडेंच्यान मडगांवां वा शिरोड्यां वतना वाटेक बोरये गांव लागता. झुवारी न्हंये कुशीक वशिल्लो आनी सैमान नटिल्लो हो गांव. थंय पासय मारतना घरावेली ती ‘शांतीनिकेतन’ नांवाची पाटी लक्ष ओडून घेता. हय हेंच तें कवीवर्य बाकीबाब बोरकार हांचें घर.
त्या दिसा वडा कडेन गडद तिनसांना… सारक्यो जायत्यो अज्रंवर कविता दिवपी कवी बाकीबाब बोरकार हांच्या घराची अवस्था अशी बाबत कशी जाली काय? ह्या घराचेर लक्ष दिवपी कोण ना काय? अशे जायते प्रस्न मनांत निर्माण जाल्ले. मात आतां ह्या घराचें रुपूच बदलपाचें आसा. घराचे दुरुस्तीचें काम सध्या चलता आनी कांय दिसांनी तें पुराय जातलें.
बाकीबाब हांणी जंय मनाक मोनेळ घालपी कविता रचल्यो, ती वास्तू एका काळार खूब सुंदर आशिल्ली. घरा फाटल्यान पाचवोचार दोंगर, गेरुच्या रंगांत रंगयल्लें, तांबड्या मंगळुरी नळ्यांचें सुंदर अशें हें व्हड घर. ह्या घरांत कोणूच रावनाशिल्ल्यान दाराक व्हड कुलूप लायिल्लें. कितलेशेच दीस, म्हयने हें घर बंदूच आशिल्लें. तें कोणेंच उघडूंक नाशिल्लें. घराचेर सगळो धुल्ल बशिल्लो. व्हरांड्यांतल्या पांख्या वेल्यान कोळयाचीं व्हडलीं जाळीं लोंबकळटालीं. जनेलांतल्यान भितर पळयल्यार घरभर सामान हांगा थंय पडिल्लें. हें घर कवी बाकीबाबांचे बापूय आनी काकाच्या काळांतलें. सुमार १५० वर्सां आदलें. बाकीबाबांचीं भुरगीं आनी तांचीं चुलत भावंडां ह्या घराचीं वारसदार.

हें घर राजांगणाचें. तुळशीवृंदावन, रांदची कूड, सामान दवरपाची कूड अशी ह्या घराची रचणूक. घरा फाटल्यान आंबे, पणसाचीं झाडां आशिल्लीं. मेळिल्ले म्हायती प्रमाण, बोरकारांचें बरेंच व्हड कुटूंब ह्या घरांत रावतालें. तांचो आजो धर्मीक. ताका लागून घरांत भजन-किर्तनां चालूच आशिल्ल्यान साधू, बाबा तांगेर रावताले. तें एक गिरेस्त कुटूंब. ताका लागून सदांच जायते लोक तांगेर येताले. बोरकारांच्या काळांतूय लोकांची यो- वच चालूच आशिल्ली. बाकीबाबांची आई देखणी आनी उत्साही. बाकीबाबाच्या आज्याच्या हातांत कला आशिल्ली आनी ती म्हणल्यार ते खुबूच सुंदर भरतकाम करताले.
स्वता बाकीबाबान ह्या घरांत फकत कविताच रचूंक नात. जाल्यार तांणी सुंदर चित्रांय काडलीं. घरकान्नीचो एक सुंदर पोट्रेटूय काडिल्लो. तांचीं आनी तांच्या चुलत भावाचीं कांय पँटींग्स घराचे वणटीक लायिल्लीं दिसतालीं. सद्या तीं सगळीं चित्रां गायब आसात. ह्या घरांत पुर्वजां पसून चवथ बरीच उमेदीन आनी नेटान मनयताले. भजनां बी जातालीं. कुटुंबांतलीं भुरगीं तरणाटीं जाय मेरेन चवथ मनोवपाक सगळें कुटूंब बोरये एकठांय येतालें.
२०१० त बाकीबाबाची जल्मशताब्दी जाली. तेन्ना गोंय सरकारानूय हे विशीं फुडाकार घेवन तांच्या सोयर्‍यां कडल्यान हें घर विकत घेवपाचें थारायलें. तशेंच घरा बदला दुसरी सुवात दिवपाची तयारीय सरकारान दाखयल्ली. मात तांचे कडल्यान प्रतिसाद मेळूंक नाशिल्ल्यान ते येत्न अपेशी थारले. मात आतां बाकीबाब हांच्या घराचें रूप बदलतना दिसता. पुराय घराचे दुरुस्तीचें काम हातांत घेतलां. आदले नळे बदल्ल्यात. लायटीचें काम नेटान सुरू आसा. आदलीं दारां, जनेलां बदल्ल्यांत. घर नव्यान रंगोवपाचें काम हातांत घेतलां.
हें दुरुस्तीचें काम मुंबय रावपी बोरकार हांच्या कुटुंबानूच हातांत घेतलां. सध्या राजांगण आशिल्लो भागूय दुरुस्त केला. हें काम शक्य जाता तितले बेगीन पुराय करपाचें उद्दीश्ट मुखार आशिल्ल्याची म्हायती हांगा काम करपी कामगारां कडल्यान मेळ्ळी.