भांगरभूंय | प्रतिनिधी
सगल्यांत चड भ्रश्टाचार खंयच्या सरकारी खात्यांत आसा अशें कोणाकूय विचारल्यार, चडशे बांदकाम खात्या कडेन बोट दाखयतात. हाचे फाटलें कारण म्हणल्यार रस्त्यांची अवस्था. गोंयचे रस्ते इबाडपाक पावस हें एक कारण आसा, ही गजाल खरी, पूण आप, पाप पावसाच्या माथ्यार थापप चुकीचें. कांय वर्सां पयलीं बांदकाम मंत्र्यांचे लागींचे मनीस कंत्राट मंजूर करपाक टक्केवारी मागतात. मागीर अमूक जाग्याचेर सुटकेस पावोवची पडटा, अशें लोक उलयताले. राजकारणाचो गंध आशिल्ल्या गोंयकारांक ही गजाल खबर आसा. खुद्द राजकी मळाचेर वावुरप्यांक, काॅण्ट्रेक्टरांक हाचे परस चड सविस्तर म्हायती आसतली. काॅण्ट्रेक्टरांक हाचेर आवाज काडूं येतालो, मात सगलेच ओगी आसात. काॅण्ट्रेक्ट मेळोवपाक तें मंजूर जावचे पयलींच 10 टक्के दिवचे पडटात खंय. मागीर अर्थांत टक्केवारी दिवपाचेर जाल्लो खर्च भरून काडपाक काॅण्ट्रेक्टर उणाक दर्ज्याचें काम करता आनी पावसाची एक दडक पडली काय रस्तो व्हांवन वता. देखून बांदकाम खात्याचेर भ्रश्टाचाराची म्होर बसल्या, ती अजून तशीच आसा.
गोंयांत पयलीं पयशेकार गोंयकार काॅण्ट्रेक्टां घेताले. मागीर केरळांतले काॅण्ट्रेक्टर आयले. हालीं कांय गोंयकारूय ह्या वेवसायांत आसात. चाळीस वर्सां पयलीं रस्त्याचीं कामां कर्नाटकांतले मानाय करताले. मागीर बिहार, युपीचे आयले. आतां हरयाणाचे दिसतात. बदल हो सैमाचो नेम. सगलें बदलत आसा. आतां व्हडलीं कंत्राटां भायल्यो कंपनी घेतात. अशेंच एक कंत्राट एमव्हीआर कंपनीक मेळ्ळां. पेडण्यां कोसळपी पालसणांच्या विशया वयल्यान ह्या काॅण्ट्रेक्टराक आतां काळे वळेरेंत घालचो अशी विरोधकांनी मागणी केल्ली. पयर भाजपाच्या कोर ग्रुपाचे बसकेंतूय सगल्यांनीच काॅण्ट्रेक्टर कंपनीच्या विरोधांत सूर लायलो. आदल्या उपराष्ट्रपतींच्या नांवाचो वापर करून काम मेळयिल्ल्याचो आरोपूय बसकेंत जालो खंय. कांय जाणकारांच्या मतान, ही कंपनी तशी गोंयांत 15 -20 वर्सां सावन वावुरता. गोंयांतलीं बरींच उदरगतीचीं कामां तिणें केल्यांत, पूण हे रस्त्याचें काम सगल्यांक दीसपट्टें दिसपी. म्हणटकच ताचो दर्जो कितें तें लोकांक रोखडेंच समजता. पेडण्यां म्हामार्गाचेर फाटल्या कांय दिसां सावन पालसणां कोसळत आसात. ताका लागून लोकां मदीं तिडक निर्माण जाल्या. सरकाराक टिका सोंसची पडटा. ह्या सगल्यांचो परिणाम फुडले विधानसभा वेंचणुकेचेर जावचो न्हय, हे खातीर सत्ताधारी आमदारांनी ह्या काॅण्ट्रेक्टरा आड खर भुमिका घेतल्या. फुडले वेंचणुकेंत चाळिसा मदले उणेच 39 जागे मेळटले, अशी आस्त कांय फुडाऱ्यांनी उक्तायल्या. तातूंत लोकांच्यो एकान एक समस्या सोडयात, अशे निर्देश वरिश्ठ केंद्रीय मंत्र्यांनी दिल्यात. म्हणटकच आमदारांक कसलोच धोको पत्करपाचो ना. काॅण्ट्रेक्टर कंपनीचेर कारवाय करची, अशी तांची मागणी. मात ती पुराय जातलीच हाची खात्री कोण दितलो?
एनडीए सरकाराची आवडटी येवजण आशिल्ली स्मार्ट सिटी देशांत चालीक लागली. गोंयांत अजून तिचें काम सोंपना. वर्स अखेरेक पसून तें पुराय जायत हाची खात्री ना. ताच्या दर्ज्या विशीं खुद्द मंत्रीच उलयतात. देखीक सांतिनेजाचो सिवरेज प्रकल्प ते काकुलो माॅला मेरेन येवपी रस्तो. ताचेर वेगान गेल्यार उमथून पडत इतली गाडी हालता. कांय कडेन रस्तो वयर सकयल आसा. फुटपाथ रुंद जाल्ल्यान पार्किंगाचो जागो अशीर जाला. स्मार्ट सिटीचे आदले सीईओ चौधरी हांची पुलिसां वतीन चवकशी जावची अशी मागणी आमदारांनी केली खंय. ती करचीच, पूण जीं बाबत कामां जाल्यांत तीं पावसा उपरांत काॅण्ट्रेक्टरां कडल्यान पुराय करून घेवचीं. ह्या स्मार्ट सिटीच्या पुराय कामाचेर श्वेतपत्रिका काडल्यार बरी. कामांक सुरवेक उशीर कित्याक जालो, ताचेरूय उजवाड घालूं येता.
एमव्हीआर कंपनी विशीं लोकप्रतिनिधींनी तिडक उक्तायली, पूण उरिल्ल्या बांदकाम काॅण्ट्रेक्टराचें कितें? कारण राज्यभरांत डांबरीकरण जाता, रुंदीकरण जाता, पालिकां वतीन रस्त्यांची, गटारांचीं कामां जातात, तांचो दर्जो कितलो उंचेलो आसता, ताचोय अभ्यास जावंक जाय. मे म्हयन्यांत केल्ले रस्ते परत आॅक्टोबरांत करपाचो वेळ जायते फावटी आयला. मडगांवां तर काम सुरू जावचे पयलींच कामाचे पयशे दिवपाचो प्रकार घडिल्ल्याच्यो खबरो छापून आयिल्ल्यो. रस्त्याचें काम कोणे घेतलां, कितल्या दिसांनी तें पुराय जातलें, हाचो तकटो कामाच्या जाग्याचेर लावप सक्तीचें जावंक फावो. म्हणटकच पालिका, पंचायत, नागरीक हांकां काॅण्ट्रेक्टराक जाब विचारपाक मेळटलो. कारण उदरगतीच्या कामांचेर खर्च जाता तो पयसो लोकांच्या बोल्सांतल्यान वता. रस्तो उणोच पांच वर्सां तरी तिगपाक नाका? नाजाल्यार तो काॅण्ट्रक्टरान परत फुकटांत बांदून दिवप ही ताची लागणूक. बांदकाम खातें बदनाम जालां, निदान हाचे मुखार तरी ताची लोकांनी तोखणाय करची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
