भांगरभूंय | प्रतिनिधी
सत्तरींतली घडणूक; बोंडला प्राणी संग्रहालयांत धाडलो
भांगरभूंय । प्रतिनिधी
वाळपयः खोतोडें पंचायतींतल्या शिरसोसडे वाठारांत बांयंत पडिल्ल्या बिबट्याक रान खात्याच्या अधिकाऱ्यांनी झुजा पांवड्याचेर यत्न करून जिवदान दिलें.
फाटल्या कांय दिसां सावन तो बिबटो शिरसोडें आनी भोंवतणच्या गांवांनी वावुरतालो. ताणें आतां मेरेन साबार सुण्यांक मारल्यात ताका लागून ह्या वाठारांतले लोक ह्या बिबट्याच्या भंयान वावुरताले.
मेळिल्ले म्हायती प्रमाण शिरसोडें वाठारांत एके बांयंत बिबटो पडिल्ल्याची म्हायती रान खात्याच्या अधिकाऱ्यांक मेळ्ळी. वाळपयचे रान अधिकारी शामसुंदर गांवस आनी म्हादय अभयारण्याचे अधिकारी गिरीश बैलुडकर हांणी ताकतिकेन घडणुकेचे सुवातेचेर धांव मारून त्या बिबट्याक खर मेहनतीन भायर काडलो.
बिरेस्तारा रातीं तो बिबटो बांयंत पडिल्लो. तो व्हडा व्हडान आड्डुपाक लागिल्ल्यान गांवांतल्या लोकांक तो बांयंत पडिल्ल्याची खबर गांवच्या लोकांक कळ्ळी. तांणी ताकतिकेन हे संबंदांत वाळपय रान खात्याचे यंत्रणेक हे विशीं म्हायती दिली. बांयंत पडिल्ल्या बिबट्याक पळोवपाक लोकांनी व्हड प्रमाणांत गर्दी केल्ली. ह्या संबंदांत रान अधिकारी शामसुंदर गांवस हांचे कडेन संपर्क केलो तेन्ना तांणी सांगलें, त्या बिबट्याक कसलीच दुखापत जावंक ना. तो तंदुरुस्त आसा, पूण भियेल्ले अवस्थेंत आशिल्लो. ताका लागून ताका बोंडला प्राणी संग्रहालयांत धाडला. ताची वैजकी तपासणी केल्या, अशी म्हायती तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
