भांगरभूंय | प्रतिनिधी
पणजी : बांबोळे बसस्टॉपार विद्यार्थिनीं मुखार पोजडें वागिल्ले खातीर एका ४० वर्सां पिरायेच्या मनशाक आगशी पुलिसांनी फकत १२ वरांनी अटक केली. ही घडणूक ५ ऑगस्टाक घडली. आठ विद्यार्थिनींनी हे विशींची कागाळ पुलिशेंत दाखल केल्ली. अटक केल्ल्या आरोपीचें नांव अल्ताफ हुसेन (४०, रा. गुडी-पारोडा, सासश्टी) अशें आसा.
हे विशीं पुलिसांनी दिल्ले म्हायती प्रमाण, अल्ताफ हो आपल्या काळ्या टीव्हीएस ज्युपिटर स्कुटरींत बस स्टॅण्डा लागसार आयलो आनी विद्यार्थिनीं सामकार रावन पोजडें वागून थंयच्यान पळून गेलो.
विद्यार्थिनींनी कागाळ नोंद केले उपरांत आगशी पुलीस निरीक्षक अनंत गांवकार हांच्या मार्गदर्शना खाला उपनिरीक्षक ऋषिकेश रायकार, कॉन्स्टेबल राजू आटार आनी संजय वरक हांणी हे विशीं बेगोबेग तपास घेवपाक सुरवात केली. सीसीटीव्ही फुटेजीच्या आदारार स्कुटरीचो नोंदणी नंबर मेळोवन आरोपीचो सोद घेतलो. वट्ट १२ वरांनी बांबोळेच्यान दुबाविताक ताब्यांत घेतलो. चवशे वेळार तांणी आपले वागणुकेची कबुली दिली. ह्या प्रकरणाचो पुलीस सध्या तपास करतात. उत्तर गोंय पुलीस अधीक्षक राहुल गुप्ता आनी पणजेचे उपअधीक्षक सुदेश नायक हांच्या मार्गदर्शना खाला तशेंच आगशी पुलीस स्टेशनाचे निरीक्षक अनंत गांवकार हांच्या नेतृत्त्वा खाला उपनिरीक्षक ऋषिकेश रायकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
