भांगरभूंय | प्रतिनिधी
पर्यावरण दाखलो घेंवक नाशिल्ल्यान टीसीपीचो आदेश
पणजीः बांबोळे वर्ल्ड वायड रिसोर्टाचें मेगा प्रकल्पाचें बांदकाम बंद उडोवपाचे आदेश नगर नियोजन खात्यान दिल्यात. ह्या बांदकामा खातीर नगर नियोजन खात्याचो दाखलो घेतना संबंदीत अधिकार्यां कडल्यान गरजेचो ना हरकत दाखलो घेवंक नाशिल्ल्यान खात्यान ही कारवाय केल्या. आमदार विरेश बोरकार हांच्या यत्नांक निमणें येस फावो जालां.
बांबोळ वर्ल्ड वायड रिसोर्ट हांचो मेगा हॉटेल प्रकल्प आकार घेता. हो प्रकल्प कसलेच गरजेचे परवाने घे नासतना, हाचें बांदकाम चल्लां. देखून पर्यावरणाचें लुकसाण जालां असो आरोप करीत थळावे आमदार विरेश बोरकार हांणी कितलींशींच आंदोलनां केल्लीं. नगर नियोजन खात्यान दिल्ले परवाने रद्द करून बांदकाम बंद करपाची मागणी करत बोरकार आनी रेव्ह्युलेशनरी गोवन्स पक्षाच्या फुडार्यां सयत पणजे उप नगर नियोजकाचे कचेरे भायर फाटले तीन दीस धरणें आंदोलनाचेर बसल्यात.
ह्या आंदोलनाची नगर नियोजन खात्यान निमणी दखल घेत बांबोळे चलिल्लें हें बांदकाम बंद उडोवपाचो आदेश काडलो.
उप नगर नियोजक प्रकाश बांदोडकार हांणी काडिल्ल्या आदेशांत म्हणलां, बांबोळे प्लॉट क्रमांक ३५८ भितर हाॅटेल इमारतीच्या बांदकामा खातीर नगर नियोजन खात्यान तांत्रीक दाखलो दिल्लो. मात, बांदकाम सुरू करचे पयलीं संबंदीत अधिकार्यां कडल्यान गरजेचो ना हरकत दाखलो घेवपाची अट घालून हो तांत्रीक दाखलो दिल्लो.
पर्यावरण प्रभाव मुल्यांकन अधिनेम २००६ खाला पयलीं पर्यावरण दाखलो घेनासतना ह्या प्रकल्पाचें बांदकाम चालीक लायलां अशें खात्याचे नदरेक आयलें. देखून २६ मार्च २०२४ वर्सा खात्यान दिल्ले तांत्रीक दाखल्याचे अटीचे हे उल्लंघन जाता. ह्यो अटी पुराय करूंक नाशिल्ल्यान हे प्रकल्पाचें काम बंद करचें, असो आदेश खात्यान काडला.
दोन दिसां पयलीं वर्ल्ड वायड रिसोर्ट हांणी बांदकाम सुरू करचे पयलीं पर्यावरण दाखलो घेंवक नाशिल्ले कारणान पर्यावरण प्रभाव मुल्याकन प्राधिकरणान हें बांदकाम बंद उडोवाचो आदेश दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
