भांगरभूंय | प्रतिनिधी
भांगरभूंय । प्रतिनिधी
पोरणे गोंयः उत्तर गोंयच्या उपजिल्होधिकाऱ्याचे सूचोवणे वयल्यान सान्ताक्रूज पंचायत मंडळान मंगळाराक बांबोळे गोंय वैजकी हॉस्पिटला (जीएमसी) भायर गाडेवाले आनी हेर विक्रेत्यांनी केल्लें अतिक्रमण मोडून तांचो माल जप्त केलो. गोंयांत जावपी जी-20 परिशदेच्या कांय बसकांचे फाटभुंयेर रस्त्यार केल्ली अतिक्रमणां काडून उडोवपाक संबंदीत पंचायत मंडळाक सांगलां. ते प्रमाण जीएमसी कडेन ही कारवाय केली.
अतिक्रमणा मोडून उडोवपाचें काम सान्ताक्रूजची सरपंच जेनिफर ओलिव्हेरा आनी उपसरपंच डॉमनीक परेरा हाच्या मार्गदर्शना खाला जालें. ह्या वेळार पंचायत सचीव महेश नायक आनी पंचायत कर्मचारी हाजीर आशिल्ले. दीन दयाळ गाडेवाले तशेंच हेर विक्रेत्यांनी अतिक्रमणां केल्लीं.. जीएमसी वाठारांत पयलीं आशिल्ल्या गाडेवाल्यांची पुनर्वसणूक केल्या. मात ताणीचे हें अतिक्रमण केल्लें. ताचे सुवाते भायर दवोरिल्लो माल पंचायत कर्मचाऱ्यांनी जप्त करून रिक्शांत घालून व्हेलो. फुटपाथाचेर बसून भाजी विकपाक बशिल्ल्यांची भाजी लेगीत व्हेली.
जी 20 परिशदे पुरती ही कारवाय मर्यादीत आसची ना अशें उपसरपंच डॉमनीक परेराक सांगलें. जीएमसी वाठारूच न्हय जाल्यार पुराय पंचायत वाठारांत आमी अतिक्रमणांक थारो दिवचे नात अशें तांणे सांगलें. फूटपाथ लोकांक चलपा खातीर आसात हें गाडेवाल्यांनी मतींत दवोरपाक जाय अशें तांणे सांगलें.
मजगती, जी 20 परिशदेक येवपी मानस्ते पोरण्या गोंयांतल्या चर्चींक भेट दिवपाची शक्यताय आशिल्ल्यान थंयच्या गाडेवाल्यांनी अतिक्रमण केल्लें आसल्यार तें काडपाची सूचोवणी पोरणे गोंय पंचायतीक केल्ली. मात गाडेवाल्यांनी स्वता जावून अतिक्रमणा काडून रस्तो मेकळो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
