भांगरभूंय | प्रतिनिधी
मामलेदाराचो आदेश : पंच इनासियो परेरा हांची म्हायती
पणजी : अॅथलेटीक स्टेडियम आनी श्यामा प्रसाद मुखर्जी स्टेडियम हे दोनूय सांताक्रुझ पंचायतीच्या तशेंच मतदासंघांच्या हद्दींत येतात असो आदेश तिसवाडीच्या मामलेदारान दिला. सांताक्रुजचे पंच इनासियो परेरा हांणी बुधवारा जाल्ले पत्रकार परिशदेंत ही म्हायती दिली. ही सांताक्रुजच्या लोकां खातीर एक अभिमानाची गजाल, तशेंच पंचायतीक आनीक महसूल मेळटलो अशें तांणी सांगलें.
ह्यान पयलीं अॅथलेटीक स्टेडियम बांबोळे आनी श्यामाप्रसाद स्टेडियम ताळगांवां आशिल्ल्याची नोंद आशिल्ली. हे विशीं आमकां आक्षेप आशिल्लो. हाका लागून आमी फाटले सात म्हयने प्रशासना कडेन विचारताले. निमाणें तिसवाडीच्या मामलेदारांनी दोनूय स्टेडियम सांताक्रुझ पंचायत तशेंच मतदासंघांत येतात, अशें स्पश्ट केलें. हे विशीं आतां एसएजी कडल्यान फुडली प्रक्रिया सुरू आसा. बेगीनूच स्टेडियमच्या हेर नाम्याचेर सांताक्रुझ येतलें असो विस्वास आसा, अशें परेरा हांणी म्हणलें.
कुजीराचें शिक्षण संकुलय सांताक्रुझ पंचायतीचे हद्दींत येता. हे विशीं आमी शिक्षण संचालकांक ईमेल केला. बेगीनूच तांकां मेळून आमी हो विशय मांडटले. पुरावे दिवन आमी हाचीय फाटपुरवण करतले. ह्या दोनूय स्टेडियमांचें उक्तावण करतना तेन्नाचे पंच वांगडी, आमदारांनी हे सांताक्रुजांत येता हें सांगप गरजेचें आशिल्लें. ह्यो सगल्यो गजाली दसका आदल्यो आसात. हाका लागून त्यो मुद्दम केल्ल्यो? काय चुकीन जाल्ल्यो? हे विशीं आतां हांव सांगपाक शकना, अणें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
