बांदिल्ल्या साधनसुविधांचो उपेग जावचो

भांगरभूंय | प्रतिनिधी

तात्पुरत्या साधनसुविधांचो उपेग इफ्फी वेळारय जावंक येता. भुरग्यां खातीर तातूंत खेळां सर्ती, कार्यावळी, शिबीरां, नाटकां कित्याक जावचीं न्हय?

राज्यांत आनी केंद्रात एकाच राजकी पक्षाचें सरकार आसल्यार कळाव लागलो तरी साधनसुविधा मार्गाक लागतात. बांदिल्ल्या
साधनसुविधांचो फुडाराक उपेग करपाक साधनसुविधा बांदचे आदीं येवजण केल्ली आसपाक जाय. तशें जाल्यार बांदिल्ल्यो साधनसुविधा कोसमेनात, येणावळय मेळटा, तोखणाये परस उदरगत लोकां मेरेन पाविल्ल्याचें समाधान म्हत्वाचें आसता.
राष्ट्रीय खेळां सर्ती खातीर सदां एकेच सुवातीर उरपी आनी तात्पुरत्या सुविधांची बांदावळ जाल्या. राष्ट्रीय खेळां सर्ती राज्यांत हाडपाचो निर्णय पयलींच्या गोंय सरकाराचो. कांय सुविधा बांदपाक पांच- सात वर्सां लागलीं, धा- पंधराच न्हय पंचवीस- तीस वर्सा आदीं बांदिल्ल्या सुविधांनी सुदारणा करुन ताचो उपेग राष्ट्रीय खेळांच्या सर्ती पासत केलो. सुविधा नाशिल्ल्यान 1-2 सर्ती हेर राज्यांनी घेवच्यो पडल्यो.
राष्ट्रीय खेळां सर्ती खातीर आदले मुख्यमंत्री मनोहर पर्रीकार हांणी बुन्यादी वावर केल्लो, तातूंतल्यान तांच्याच नांवाचें प्रकल्पय जाल्यात. गोंयांत जसो भारताचो आंतरराष्ट्रीय सिनेमा महोत्सव हाडटना मोख दवरिल्ली तशीच राष्ट्रीय खेळां सर्तींच्यो साधनसुविधा उबारपाक फुडें सरतना आदल्या मुख्यमंत्र्यांनी कांय विचार उक्तायले आसतले. तांच्या दोळ्यां मुखार राज्यांत नवे खेळगडे, उंचेल्या तांकीचे खेळां शिक्षण गोंयच्या तरनाट्यां खातीर मेळोवन दिवपाचें ध्येय आसले बगर खेलो इंडिया, राष्ट्रीय क्रीडा प्राधिकरणाचे नवे प्रकल्प दिसचे नाशिल्ले. मुख्यमंत्री डाॅ. प्रमोद सावंत, खेळां मंत्री गोविंद गावडे पयलींच्या सरकारांत आशिल्ले. केंद्रीय मंत्री श्रीपाद नायक हांचोय राष्ट्रीय खेळां सर्त गोंयांत हाडपाक व्हड वांटो आसा. दिल्ली, महाराष्ट्र, पंजाबा वरी आंतरराष्ट्रीय खेळांच्या सर्ती खातीर, खेळगड्यांक घडोवपी राज्यां प्रदुषणान घुसमटना गोंयांत राष्ट्रीय खेळां सर्त जावप हें व्हड जैत.
राष्ट्रीय खेळां सर्तींत वांटेकार जावन गोंयच्या खेळगड्यांनी आमीय खेळपांत फाटीं नात हें दाखोवन दिलां. गोंय म्हळ्ळ्यार फकत फुटबाॅल न्हय जाल्यार हेर खेळां प्रकारां खातीर राज्यांत वातावरण आसा. कांय सुविधांची तात्पुरती बांदावळ केल्यार आॅलिपिक्स खेळां सर्तीकूय गोंय योगदान दिवंक शकता, हें राष्ट्रीय खेळां सर्तीच्या आयोजनांतल्यान सरकारान दाखोवन दिलां. सरकार आनी खासगी कंपन्यांचे मजतीन विंगड विंगड खेळां सर्तीं खातीर वर्सुकी येवजण जाल्यार खेळां पर्यटनाची वाट गोंयां पासत मेकळी जातली.
राष्ट्रीय खेळां सर्ती खातीर बांदिल्ल्यो सुविधा सांबाळपा पासत, सुविधांच्या उपेगा खातीर खासा विभाग बांदकाम, खेळा प्राधिकरणांत आसपाची गरज आसा. त्यो सुविधा, मुळावण मोडनासतना कसल्या महोत्सव, उत्सवां खातीर उपेगांत हाडच्यो तें चिंतपी विभागांत आसपाक जाय.
राष्ट्रीय खेळां सर्ती निमतान कांय रस्ते, टाॅयलेट ब्लाॅकसय जाल्यात, उबंत पडिल्ल्या भौशीक टाॅयलेटसाचो वापर जालो, येणावळय मेळयली ताचो हिशोबय वेळार दिवपाक, घेवपाक सरकारा कडेन यंत्रणा आसतलीच. हजारांनी पुलीस हाडलें, ताणीं वावरय केलो, तांकां सदां सकाळीं कामाचें वांटपय करपी पुलीस अधिकारी आशिल्ले. अशा सर्तीं वेळार पुलिसांनी, आप वावुरप्यांनी भौशीक सुवातींचेरय कितें करप त्या आराखड्याची बांदावळ केल्यार फुडारांत आडमेळीं येवचीं ना. धा ते वीस हजार तरनाट्यांक आसपावन घेवपी खेळां सर्ती खातीर ताळयो मारपी, उमेद वाडोवपी मनीसबळय गोंयां भायल्यान अंदू आयलें. रांदपा वाडपाच्यो टीमी आशिल्ल्यो, बऱ्योच राज्या भायल्यान आयिल्ल्यो, सर्ती राष्ट्रीय पावंड्या वेल्यो म्हणून. अशे प्रशिक्षीत पंगड गोंयांत बांदपा पासत सरकारान तयारी केल्यार खर्च उणो जातलो. प्रशिक्षक, अधिकारी, खाशेले कर्मचारीय सर्तीक आयिल्ले. थोड्यांक उक्त्या सुवातीनीं न्हिदचें पडलें, कांपाला वेल्या नव्या मार्गाचो खूब जाणांनी लाव घेतलो. बरी वैजकी सुविधा दिवपा खातीर सरकारी, खासगी हाॅस्पिटलां वावुरलीं. खेळगडी कित्याक दुयेंत जाले? तांकां वेसनां लागल्यांत? जेवणा खाणा करपी, वाडपी, वेसनांनी बुडिल्ले आशिल्ले? हाचो नियाळ सरकारान घेवचो.
सर्तीं आदीं प्रॅक्टीस करप, खेळगड्यांक हाड- व्हर करपाक येरादारीच्यो सुविधा गोंय सरकारा कडेन उण्यो आशिल्ल्यो आसूंये. ते खातीर अडचण जावन खेळगडे दुयेंत जाले? गोंयां भायल्यान गाड्यो, बशीय आयिल्ल्यो दिश्टी पडटाल्यो, पार्किंगांतल्यान सरकाराक येणावळ मेळटलीच. तात्पुरत्या साधनसुविधांचो उपेग इफ्फी वेळारय जावंक येता. भुरग्यां खातीर तातूंत खेळां सर्ती, कार्यावळी, शिबीरां, नाटकां कित्याक जावचीं न्हय? फुकट नाका. इफ्फी खातीर, लुसोफोन खेळां सर्तीं पासत बांदिल्या सुविधांचो उपेग सरकार करना अशें न्हय, पूण कितली येणावळ येता? येणावळीचो विलो कसो जाता?
खेळां आनी युवा वेव्हार खात्यांत, राष्ट्रीय खेळां प्राधिकरणात योग्य थळावें मनीसबळ आसा? सरकाराक राष्ट्रीय खेळां सर्तींच्या अणभवांतल्यान अचूक म्हायती मेळ्ळ्या आसतली. ते प्रमाण फुडारा खातीर मनीसबळ निर्मणेची, प्रशिक्षणाची येवजण तयार करची पडटली. ते येवजणेतल्यान अणभव घेवन हजारांनी कुशळ मनीसबळाची हेर राज्यांक गरजे वेळार पुरवण करुंक गोंय मुखार आसपाक जाय.
शाळेंतल्यान हाचे मुखार तंत्रज्ञच न्हय जाल्यार मातयेंत हात घालून शेत रोवपी, किचनात भाजी कापपी, रांदपी मनीसबळच न्हय जाल्यार कुशळ मेस्त, प्लंबर, गवंडे, राखणेदळ, वेवस्थापक, देखरेख दवरपी घडोवचे पडटले. कुशळताय अभ्यासक्रमात खेळांचोय आसपाव करचो पडटलो. खेळांचे, शारिरीक शिक्षणाचें म्हत्व पालक, विद्यार्थ्यां मेरेन पावोवप हें आव्हान. ते खातीर जागृताय जाय, सरकाराक ताची जाणवीकाय आसा.
कुशळकाय अभ्यासक्रमांत बरे शिक्षक मेळोवपा खातीर शिक्षकांकय बदलांतले शिक्षण, प्रशिक्षण घेवपा खातीर तजवीज जावची. तंत्रज्ञान खेळांत, खेळामळांकय आयलां, पूण गोंयांत तें सगळे कडेन पावोवपाचे येत्न जाल्यात? गोंय खेळांच्या शिक्षणात फाटीं खंय, कित्यांक पडटा हाचो अभ्यास करुन खेळां सर्ती खातीरच न्हय जाल्यार नव्यो जावपी साधनसुविधा उपेगांत हाडपाची दिका निश्चित करची. अभ्यासांतल्यान पुराय चित्र, १०० टक्के सत कळटलें अशें न्हय, पूण फुडाराचे दिकेन वचपा खातीर गरज ती म्हायती मेळटली. म्हायती दिवपी, घेवपी, मेळोवपी कमीच आसले तरी मेळिल्ले इल्लेशे म्हायतीचे मजतीन देसाक एकठांय हाडपी सेतू बांदपाक येतात.
फाल्यांची, आजची पिळगी सरकार नव्यो वाटो सोदतलें म्हणून रावचीना, आपले परीन सुविधा उबारपा पासत येत्नय करपी आसात. गोंयांत नवे उद्येजक, उद्येगपती, वेवसायांत येवपीय आसात. देस विदेस पावंड्यारय आपली कुशळकाय दाखोवप्यांक सरकारान विश्वासांत घेतल्यार बांदिल्ल्या साधनसुविधांच्या बऱ्या उपेगाक अर्थिक बळगें मेळूंक शकता.
केंद्र सरकारान चंद्रार वचपाकय देसांतल्या व्हड कंपनींचो, तातूंतल्या कुशळ मनीसबळाचो आधार घेतलो. गोंय सरकाराकय बळगें दिवपी, उजू मार्ग दाखोवपी आसतले. बांदिल्ल्यो साधनसुविधा कोसमेवच्यो न्हय म्हणून मार्गदर्शकां कडेन बेगोबेग उलोवणी करचीं. सुविधा, साधनसुविधा आदींच वळेरी करुन त्यो सांबाळप, वापरप गरजेचें.

सुहासिनी प्रभुगांवकार
9881099260