भांगरभूंय | प्रतिनिधी
येजमान बांगलादेशान अफगाणिस्ताना आड चालू आशिल्ले टॅस्ट मॅचींत 370 धांवड्यांची म्हत्वाची आघाडी घेतली. दुसऱ्या दिसा वट्ट 16 विकेटी पडल्यो. बांगलादेशान काल सकाळीं फकत णव धांवड्यां भितर पांच विकेटी वगडायल्यो अशे तरेन ताचो पयलो डाव 382चेर सोंपलो. ते उपरांत अफगाणिस्तानाचो पयलो डाव 39 ओव्हरींनी फकत 146चेर सोंपलो. दुसऱ्या दिसाचो खेळ सोंपलो त्या वेळार बांगलादेशान आपल्या दुसऱ्या डावांत एक विकेट वगडावन 134 धांवड्यो केल्ल्यो.
फास्ट बॉलर निजातुल्लाह मसुदान अफगाणिस्ताना वतीन पदार्पण करतना पांच विकेटी घेतल्यो. ताच्या यत्नाक लागून बांगलादेशाक पयरच्या आपल्या स्कोरांत फकत 20 धांवड्यांची भर घालपाक शकलो.
आपले पयले टॅस्टीच्या पयल्याच बॉलाचेर विकेट घेवपी मसुदान स्विंग आनी वेगाचो पुर्ण फायदो करून घेतलो. ताचे खेरीत फास्ट बॉलर यामिन अहमदजईन 39 धांवड्यो दिवन 2 विकेटी घेतल्यो.
बांगलादेशाच्या बॉलरांनी लेगीत बरें प्रदर्शन करून अफगाणिस्तानाचो डाव रोखडोच सोंपयलो. इबादत हुसैनान 47 धांवड्यो दिवन 4 विकेटी घेतल्यो. शरीफुल इस्लामान 28 धांवड्यो दिवन दोन आनी स्पिनर तैजुल इस्लामान सात धांवड्यो दिवन 2 विकेटी घेतल्यो. दुसऱ्या दिसाचो खेळ सोंपलो त्या वेळार नजमुल हुसैन 54 आनी ओपनर जाहीर हसन 54 धांवड्यो करून खेळटालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
