बांगलादेश सुपर आठांत

भांगरभूंय | प्रतिनिधी

संवसारीक टी-20 क्रिकेट सर्तीचे 37वे मॅचींत बांगलादेशान नेपाळ पंगडाक 21 धांवड्यांनी हारोवन सुपर आठांत सुवात मेळयली. बांगालदेशाच्या जैतांत तनजीम हसन साकीब आनी मुस्तफिजूर रहमान हे बॉलर पर्जळ्ळे. साकिबान सात धांवड्यो दिवन चार विकेटी घेतल्यो, जाल्यार रहमानान सात धांवड्यो दिवन तीन विकेटी मेळयल्यो.

अर्नोस वेल मैदानाचेर नेपाळान टॉस जिखून बांगलादेशाक पयलीं बॅटींग करपाचें आमंत्रण दिलें. नेपाळाच्या बॉलरांनी मुखेली रोहीत पॉडेलाचो निर्णय योग्य थारायतना बांगलादेशाचो डाव 19.3 ओव्हरींनी 106चेर सोंपयलो. बांगलादेशाच्या शाकीब अल हसनान सगल्यांत चड 17 धांवड्यो केल्यो. महमुदुल्लाहान 13, जाकेर अलीन 12, लिटन कुमार दासान 10, रिशाद हुसैनान 13 धांवड्यो केल्यो. पांच बॅट्समनांक दोट्टी आंकडो लेगीत हुपपाक जमलो ना. तस्कीन अहमदान नाबाद 12 धांवड्यांचें योगदान दिलें.

नेपाळा वतीन सोमपाल कामी, दिपेंद्र सिंह एेरी, रोहीत पॉडेल आनी संदीप लामिछाने हाणें दरेकी 2 विकेटी मेळयल्यो.

ते उपरांत बांगलादेशाच्या बॉलरांनी 106 ह्या ल्हान स्कोराची येसस्वी रितीन राखण केली. नेपाळाची सुरवात बरी जाली ना. तिसरे ओव्हरींत तनजीमान कुशल भुर्तेलाक (4) बोल्ड करून बांगलादेशाक पयलें येस मेळोवन दिलें. तेच ओव्हरींत तनजीमान अनील साह (0) बाद करून आपली दुसरी विकेट मेळयली. पांचवे ओव्हरींत रोहीत पॉडेल (1) लेगीत तनजीमाचो शिकार थारलो. आसिफ शेख 17 धांवड्यो करून बाद जालो. संदीप जोरा (1) हाका लेगीत तनजीमान तंबूंत धाडलो. एका वेळार 26 धांवड्यांचेर 5 विकेटी व्हगडावन नेपाळाचो पंगड संकश्टांत सांपडिल्लो. अशा वेळार कुशल मल्ला आनी दिपेंद्र सिंह एेरी हांणी 52 धांवड्यांची भागिदारी करून नेपाळाक मॅचींत परतून हाडलो. पूण, मुस्तफिजूर रहमानान 17वे ओव्हरींत मल्लाक (27) बाद करून नेपाळाचे आशेचेर उदक रकयलें. दिपेंद्र सिंह एेरी 25 धांवड्यांचेर बाद जालो. ते उपरांत पांच बॅट्समनांक खातें लेगीत उगडपाक जमलें ना आनी नेपाळाचो डाव 19.2 ओव्हरींनी 85 धांवड्यांचेर सोंपलो.

ह्या जैता सयत बांगलादेशान सुपर आठांतली आपली सुवात निश्चीत केली. तनजीमाक ताच्या उत्कृश्ट कामगिरी खातीर प्लॅयर ऑफ द मॅच पुरस्कार भेटयलो.

बांगलादेशा वतीन तनजीम हसन साकिबान चार विकेटी घेतल्यो. मुस्तफिजूर रहमानान तीन विकेटी घेतल्यो. शाकीब अल हसनान दोन बॅट्समनांक आनी तस्कीन अहमदान एका बॅट्समनाक बाद केलो.