भांगरभूंय | प्रतिनिधी
घुसखोरांक आडावपाक शीम घट करपाक जाय. थंय कडक बंदोबस्त आसचो.
कोरगांवां बिराडाक रावपी एका 34 वर्सां पिरायेच्या बांगलादेशी नागरिकाक पुलिसांनी अटक केली. ताचे कडेन पासपोर्ट, व्हिसा, प्रवासाचीं कागदां कांयच नाशिल्लें. म्हणल्यार तो बेकायदेशीर पद्दतीन भारतांत घुशिल्लो आनी उपरांत गोंयांत पाविल्लो. तो हांगा नेमकें कितें करतालो, ताचो तपास पुलिसांनी केलाच आसतलो. सध्या बांगलादेश आनी भारतां मदीं तणाव आसा. खास करून थंयच्या कांय हिंदूंक जिवेशीं मारपाच्यो घडणुको घडल्यात. अशे फाटभुंयेर हांगा इतले पयस बांगलादेशी सांपडप, तोय बी बेकायदेशीर रितीन आयिल्लो ही हुस्क्याची, तणाव निर्माण करपी गजाल. गोंयांत कसलींच कायदेशीर कागदां, परवाने नासताना हेर देशांतलें कितले लोक रावतात, ताचो सरकारी यंत्रणेन सोद घेवपाक जाय. कांय जाणांच्या मतान गोंयांत साडेसात लाख (गोंयची लोकसंख्या 15 लाख) रोहिंग्या मुस्लीम आसात. हो समाज म्यानमारांतल्या राखीन प्रदेशांतलो. तांकां थंय बांगलादेशी घुसखोर थारावन नागरिक म्हूण मान्यताय, हक्क दिवंक नात. देखून ते दर्यांत बोटींचेर रावल्यात वा भारता सयत मेळटा थंय घुसल्यात. जर गोंयांत इतले रोहिंग्या आसात, जाल्यार भारतांत कितले आसतले? 2016 त केंद्र सरकारान भारतांत 2 कोटी बांगलादेशी अवैध पद्दतीन रावतात, अशें सांगिल्लें. मात ते विशीं मागीर वाद जाल्लो. 2020 त कांय लाख बांगलादेशी व्हिसा सोंपूनय रावतात, अशें सरकारान जाहीर केल्लें. हे पुलिसांनी अटक केल्ल्या नागरिकांचे आंकडे. बेकायदेशीर रावपी चड आसतले.
भारतांत बेकायदेशीर घुसपाक मेळप ही सरकारी यंत्रणांचीच चूक म्हणची पडली ना? स्थलांतर करतात, ते सगलेच गुन्यांवकार नासतात. मात वेवस्था तांकां तशी मानता. पोट भरपाक गेल्लो मनीस हो परिस्थितीचो निर्वासीत आसता. तरीय बेकायदेशीर स्थलांतर करप हें चुकीचेंच. तें थांबोवपाक कारणांचेर उपाय जाय, मनशांचेर न्हय. भारतांत व्हीसाचेर आयिल्ले, व्हीसा सोंपून राविल्ले आनी बेकायदेशीर पद्दतीन बांगलादेशी रावतात. सगल्यांक व्हिसा लागता. नेपाळी सोडून. थोडे अवैधपणान शीम हुपून येतात. बोगस कागदां करून देशांत आयिल्लेय बांगलादेशी आसात. फाटीं गोंयांत, मुंबय कांय जाणांक धरिल्ले. रोजगार, थंयची समाजीक, अर्थीक स्थिती, दळडीर, जमीन खारट जावप, मोड, हुंवारा सारकीं सैमीक संकश्टां हींय स्थलांतराचीं कारणां. सध्या बांगलांदेशांतली समाजीक स्थिती भिरांकूळ आसा. देखून शांती, पोटा खातीर लोक दुसरे कडेन वचपाक लागल्यात. मानवी तस्करीय जाता.
घुसखोरांक आडावपाक शीम घट करपाक जाय. थंय कडक बंदोबस्त आसचो. कागदपत्रां, बायोमेट्रीक्स तपासप गरजेचें. पोटाची भूक ही मनशाक कितेंय करपाक लायता. स्थलांतरीत लोक हे परिस्थितीचे बळी आसतात. एकलो भारतांत आयलो, काय तो दुसऱ्याक हाडटा. फटीचीं कागदांय सहज करून मेळटात. थोड्यांक धरल्यार कितें जातलें हेंय खबर नासता. जो मेरेन सामान्य भौसाक गरजेची आशिल्ली उदरगत जायना, तो मेरेन स्थलांतरां जायत रावतलीं. पूण तशें करप हो व्हडलो गुन्यांव, हें सगल्यांनीच मतींत घेवंक जाय. तांकां हांगा हाडटा कोण, तें सोदून तांकां ख्यास्त करूंक जाय. ह्या स्थलांतरितांचो गुन्यांव, आतंकवादी कारवायां खातीर वापर जावं येता. हें चड धोक्याचें. ते नदरेन तपास जावचो. स्थलांतर करपाकूय जाय, जाल्यार तें कायदेशीर पद्दतीन करचें. संवसारांत सगल्यांत चड स्थलांतर भारतीय करतात. उपरांत चीन. सुमार एक कोटी 85 लाख भारतीय संवसारभर स्थायीक जाल्यात. चीनी 1 कोटी 17 लाख. मेक्सिकनूय तितलेच. हुस्क्याची गजाल म्हणल्यार हें स्थलांतर वाडत आसा. आतां हें सगले कायदेशीर पद्दतीन गेल्यात काय बेकायदेशीर पद्दतीन तें कळना. सांपडले जाल्यार थंयचीं सरकारान तांकां परत मायदेशाक धाडटात. झुजां, गरिबी, अस्थीर सरकारां हीं आयज कांय देशांतली समस्या जाल्या आनी स्थलांतराचीं कारणांय!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
