भांगरभूंय | प्रतिनिधी
दावखुरो फास्ट बॉलर शोरिफूल इस्लामाचें कारकिर्दींतलें सर्वोत्कृश्ट प्रदर्शन आनी मुखेली लिटन दास हाच्या नाबाद अर्द शेंकड्याच्या नेटार येजमान बांगलादेशान तिसरे आनी निमाणे वन डे मॅचींत अफगाणिस्तानाक सात विकेटींनी हारयलो.
ह्या जैतान बांगलादेशान माळेंत धूप जावपा पसून स्वताक वाटायलो. अफगाणिस्तानान सुरवातीच्यो दोन मॅची जिखून माळ पयलींच जिखिल्ली. शोरिफूलान 21 धांवड्यो दिवन चार विकेटी घेतल्यो आनी अफगाणिस्तानाचो डाव 45.2 ओव्हरींनी 126 धांवड्यांचेर गुठलावपाक म्हत्वाची भुमिका वठयली.
अफगाणिस्तानाचे फकत चार बॅट्समन दोट्टी आंकडो हुपपाक शकले. हातूंत अजमुतुल्लाह ओमारजईन सगल्यांत चड 56 धांवड्यो केल्यो. बांगलादेशा वतीन शोरिफूला खेरीत तस्कीन अहमद आनी ताईजूल इस्लाम हाणें दरेकी दोन विकेटी घेतल्यो. अणभवी शाकिर अल हसनान फायदेशीर बॉलींग घाली. ताणें 10 ओव्हरींनी 13 धांवड्यो दिवन 1 विकेट घेतली.
मोखीचो फाटलाव करपी बांगलादेशाची लेगीत सुरवात बरी जाली ना. ताणें 28 धांवड्यांचेर ताणें दोन विकेटी वगडायल्यो.
लिटन दास (नाबाद 53) आनी शाकिब (39) हांणी तिसरे विकेटी खातीर 61 धांवड्यांची भागिदारी करून पंगडाक मोखीच्या लागसार व्हेलो. तौहीद हिरदोय हाणें नाबाद 22 धांवड्यो केल्यो. ताका लागून बांगलादेशान 23.3 ओव्हरींनी 3 विकेटी वगडावन 129 धांवड्यो करून सोंपें जैत जोडलें.
आतां ह्या पंगडां मदीं दोन टी-20 मॅचींची माळ जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
