भांगरभूंय | प्रतिनिधी
श्रीलंकेन आशिया करंड क्रिकेट सर्तीक जैतान सुरवात केली. बांगलादेशान दिल्ले 165 धांवड्यांचे मोखीचो फाटलाव करतना श्रीलंकेक घाम आयलो. पूण, चरिथ असंलका (नाबाद 62) आनी सदीरा समराविक्रमा (54) हांचे 78 धांवड्यांचे म्हत्वाचे भागिदारीन बांगलादेशाच्या हातांतल्यान मॅच गेली आनी श्रीलंकेन 5 विकेटींनी जैत जोडलें. ते पयलीं महिश थिक्षनान 19 धांवड्यो दिवन 2 आनी मथिशा पथिराणा हाणें 32 धांवड्यो दिवन 4 विकेटी घेतल्यो. हांचे उत्कृश्ट बॉलिंगेक लागून बांगलादेश बॅकफुटाचेर गेलो.
मोखीचो फाटलाव करपी श्रीलंकेची सुरवात बरी जाली ना. 15 धांवड्यांचेर दोनूय ओपनर तंबूंत परतले. तस्कीन अहमद आनी शॉरीफूल इस्लाम हांणी वळेरेन पथुम निसंका (14) आनी दिमुथ करुणारत्ने (1) हाका बाद केलो.
ते उपरांत शाकिर अल हसनाच्या उत्कृश्ट बॉलाचेर कुशल मॅण्डिस (5) बोल्ड जालो आनी श्रीलंकेक 43 धांवड्यांचेर तिसरो धपको बसलो.
शाकिब, मेहदी हसन मिराज आनी मेहदी हसन हांचे बॉलिंगे मुखार श्रीलंकेच्या बॅट्समनांक धांवड्यो करप कठीण जाल्लें. चरिथ असंलका आनी सदीरा समराविक्रमा हांच्या संयमाचो कस लागलो. दोगांयनी संयमी खेळी करून बांगलादेशाच्या बॉलरांक प्रती जाप दिली. सेट जाल्या उपरांत दोगांयनी हात मेकळे करपाक सुरवात केली. दोगांयनी अर्द शेंकड्याची भागिदारी लेगीत पुर्ण केली. सदीरान 59 बॉलांनी अर्द शेंकडो पुर्ण केलो. 27.2 ओव्हरींनी श्रीलंकेच्यो 3 बाद 118 धांवड्यो जाल्यो. हेच परिस्थितींत बांगलादेशाच्यो 4 बाद 115 धांवड्यो जाल्ल्यो. ताका लागून मॅचींतली उमळशीक कायम आशिल्ली.
जैता खातीर 44 धांवड्यांची गरज आसतना ही जोडी फुटली. सदीरा (54) मुखार येवन मारपाच्या यत्नांत मेहदी हसनाच्या बॉलाचेर बोल्ड जालो. ताणें बाद जावचे पयलीं चरिथा वांगडा चवथे विकेटी खातीर 119 बॉलांनी 78 धांवड्यांची भागिदारी केली.
शाकिबान श्रीलंकेच्या धनंजय डी सिल्वाक (2) बोल्ड करून मॅचीतली उमळशीक वाडयली. पूण, चरिथान एक बाजू सांबाळून धरली. ताणें 85 बॉलांनी अर्द शेंकडो पुर्ण केलो. 38वे ओव्हरींत श्रीलंकेच्या डावांतलो पयलो सको आयलो. चरिथान 92 बॉलांनी पांच चवक्यांचे आनी एका सक्याचे मजतीन 62 धांवड्यो करून नाबाद उरलो. दासून शनाकान नाबाद 14 धांवड्यो केल्यो. श्रीलंकेन 39 ओव्हरींनी 5 विकेटी वगडावन 165 धांवड्यो करून जैत जोडलें.
ते पयलीं नजमूल होसैन शांतो हाणें बांगलादेशाक दोनश्याच्या लागसार व्हेलो. मथिशा पथिराणा हाणें बांगलादेशाचो डाव गडगडावन उडयलो. 6 बाद 162 वयल्यान 164चेर ताचो डाव सोंपलो. शांतोन 122 बॉलांनी सात चवक्यांचे मजतीन 89 धांवड्यो केल्यो. थिक्षानान आठ ओव्हरींनी 19 धांवड्यो दिवन 2 विकेटी घेतल्यो. पथिराणान आठ ओव्हरींनी 32 धांवड्यो दिवन चार विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
