भांगरभूंय | प्रतिनिधी
खबरां संस्था
लाहोरः बांगलादेशाच्या 334 धांवड्यांच्या चेंपणा खाला खेळगी जिगरबाज अफगाणिस्तानान निमाणे 89 धांवड्यांनी हार खाली तरी आपल्या जिगरबाज खेळान क्रिकेट मोगींचीं मनां मात जिखली. ही मॅच बांगलादेशा खातीर आशिया कप सर्तींतलें आपलें आव्हान तिगोवन दवोरपा खातीर निर्णायक म्हत्वाची आशिल्ली. अफगाणिस्ताक झेपचें ना अशें 335 धांवड्यांचे आव्हान दिवंन तांणी ही मॅच जिखली आनी आयिशा कप सर्तींतल्या ब गटातलें आपलें आव्हान जितें दवोरले. बांगलादेशाच्या 334 धांवड्यांचो फाटलाव करतना अफगाणिस्तानाचो डाव 44.3 ओव्हरींत 245 धांवड्यांत ,सोपलो.
बांगलादेशाच्या व्हडल्या धांवड्याच्या चेंपणा खाला खेळटना अफगाणिस्तानाची पयली विकेट 1 धांवडेचेर पडली. मात इब्राहीम झद्रान आनी रमत शहा हांणी दुसरे विकेटी खातीर 78 धांवड्यांची भागिदारी करून डाव साल्वार केलो. कॅप्टन हसमतुल्ला शाहिदी खेळटालो तो मेरेन अफगाणिस्तानाची जैताची आस्त आशिल्ली. मात शोरीफील इस्लामान ताका कॅच आवट करतगीर तांची जैताची आस्त सोपली. इब्राहीम झद्रानान 10 चौके आनी एका सक्यान 74 बॉलांच 75 धांवड्यो केल्यो. रमत शहान 5 चौक्यांनी 33 धांवड्यो करून ताका बरो वांगोड दिलो. हसमतुल्ला आनी नजिबुल्ला झद्रान (17) हाणी चवथे विकेटी खातीर 52 धांवड्यांची भागिदारी करून डावाक आकार दिलो. ताचे पयलीं हसमतुल्लान तिसरे विकेटी खातीर इब्राहिम वांगडा 52 धांवड्याची म्हत्वाची भागिदारी केली. हसमतुल्लान 60 बॉलांत 6 चौक्यांनी अर्द शेंकडो (51) करून कॅप्टनाची खेळी केली. तो आवट जातगीर हेर तीन बॅट्समन सवाय भितर आवट जाले. राशिद खानान 15 बॉलांत 3 चौके आनी एका सक्यान 24 धांवड्यो केल्यो. तास्कीन अहमदान ताका कॅच आवट करून बांगलादेशाचें जैत निश्चीत केले. तास्कीन अहमदान 44 धांवड्यांत 4 आनी शोरीफुल इस्लामान 36 धांवड्यांत 3 विकेटी घेतल्यो.
आशिया कप सर्तींत तिगोन रावपा खातीर अफगाणिस्ताना आडची मॅच बांगला देशाक जिखपाकूच जाय आशिल्ली. आपल्या डावांत 334 धांवंड्यांचो दोगोर उबो करून ताणी जैताची तयारी करून दवोरली. टॉस जिखून पयलीं खेळून ताणी 5 आवट 334 धांवड्यो केल्यो. मेहदी हसन मिराज आनी नजमुल हसन शांतो हाच्या शेकड्यांच्या नेटार आनी अफगाणिस्ताक सामकार सामकें कुस्तार अशें लक्ष्य दवोरलें.
बांगलादेशा वतीन मेहदी हसन मिराजान दुखापत जावन रिटायर जावचे पयलीं 112 आनी नजमुल हसन शांतोन 104 धांवड्यो केल्यो. त्या भायर शाकिब अल हसनान नाबाद 32 आनी मोहम्मद नईमान 28 आनी रहिमान 25 धांवड्यांचें योगदान दिलें. अफगाणिस्ताना वतीन मुजीब उर रहमन आनी गुलबदीन नायब हाणी देरकी एक विेकेट घेतली, बांगलादेशाचे तीन बॅट्समन रनआवट जाले. तिसरे विकेटी खातीर शांतो आनी मिराजान 194 धांवड्यांची विक्रमी भागिदारी केली. आशिया कप सर्तींत बांगलादेशा वतीन केल्ली ही सगल्यांत व्हडली भागिदारी आसा. मेहदीन 119 बॉलांत 7 चौके आनी 3 सक्यांनी 112 आनी शांतोन 1005 बॉलांत 9 चौके आनी 2 सक्यांनी 104 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
