बांगलादेशाची आदली प्रधानमंत्री शेख हसीना हांकां फाशीची ख्यास्त

भांगरभूंय | प्रतिनिधी

ढाका : बांग्लादेशच्या इंटरनॅशनल क्रायम्स कोर्टान आदली प्रधानमंत्री शेख हसीना हिका दोशी थारावन फाशीची ख्यास्त दिल्या. तिचे सयत आदले गृह मंत्री असदुज्जामान खान कमाल आनी आदले पुलीस महासंचालक चौधरी अब्दुल्ला अल-मामून हांकांय मरण ख्यास्त दिवपाचो निर्णय दिला. न्यायालयान म्हणलें, ह्या तिगांयवेले गुन्यांव मानवते आड आसात. न्यायालयान हसीनावेलो निर्णय ६ भागांनी, ४५३ पानांच्या अहवाला वरवीं दिलो. पोरूंच्या जुलय विद्रोहांत नागरिकांचेर फारपेट करपाचो आदेश दिल्ल्याचो आरोप तिचेर सिद्ध जाल्ल्याचें कोर्टान नमूद केलें.

विद्यार्थ्यांचेर अत्याचार
निर्णयांत म्हणलां, जानेवारी २०२४ उपरांत शेख हसीना तानाशाही कडेन वळ्ळी. २०२४चे वेंचणुकेंत तिणें विरोधकांक चेंपले आनी विद्यार्थी आंदोलन रस्त्यार देंवले उपरांत तांचेर फारपेट केली. ह्या सगल्या घडणुकांनी हसीना दोशी आशिल्ल्याचें कोर्टान स्पश्ट केलें.

हसीनाची फुडें कितें परिस्थिती?
शेख हसीना सध्या भारतांत लिपून आशिल्ल्यान फुडली प्रक्रिया घुस्पल्ले वरीं जावपाक शकता. बांग्लादेश सरकार आतां इंटरपोल वरवीं आंतरराष्ट्रीय अटक वॉरंट जारी करतलें. बांग्लादेश सरकार इंटरपोलकडेन हसीना आड रेड कॉर्नर नोटिसीची मागणी करतलें. इंटरपोल ही संवसारांतलीं सगल्यांत व्हड आंतरराष्ट्रीय पुलीस संस्था आशिल्ल्यान अशे नोटिसीक लागून आरोपी खंयच्याय देशांत सांपडल्यार तांकां अटक करूं येता.

भारताची भुमिका निर्णायक
शेख हसीना भारतांत आशिल्ल्यान बांग्लादेश भारताक अधिकृत तरेन म्हायती दितलें, रेड नोटीस जारी जाली.
हाचे उपरांत भारताचेर निर्णयाची जापसालदारकी येता, हसीनांक अटक करपाची काय ना? तिका बांग्लादेश कडेन दिवची काय ना? जर भारतान सहकार्य करूंक ना, जाल्यार बांग्लादेश हो मुद्दो जोड राष्ट्रां मेरेन व्हरपाक शकता आनी भारताचेर आंतरराष्ट्रीय चेंपण हाडपाचो यत्न करपाक शकता.

आंदोलनांत कितल्या विद्यार्थ्यांक मरण?
संयुक्त राष्ट्रां प्रमाण सुमार ६५० लोकांक मरण आयलें. मानवी हक्क तेंको सोसायटी म्हणटा, चडांत चड ८१९ जाणांक मरण आयलां. मेडिसिन्स विथआऊट बॉर्डर्स हांच्या अहवाला प्रमाण, ५६८ विद्यार्थ्यांक ह्या आंदोलनांत मरण आयलें. युनोच्या राजकी अधिकार कार्यालयाचो अदमास आसा- तीन सप्तकांच्या दडपशाये मजगतीं १,४०० मेरेन लोकांक मरण आयलें, मात नेमको आंकडो उपलब्ध ना.