भांगरभूंय | प्रतिनिधी
खबरां संस्था
अॅडलेडः टी-20 वर्ल्ड कपाचे सुपर 12चे आपले निमणे मॅचींत बांगलादेशाक 4 विकेटींनी हारोवन पाकिस्तानान उपांत्य फेरयेंत प्रवेश केलो. बांगलादेशान पयलीं खेळून 20 ओव्हरींत 8 बाद 127 धांवड्यो केल्यो. ताका जाप दितना पाकिस्तानान 18.1 ओव्हरींत पांच विकेटी वोगडावन 128 धांवड्यो केल्यो.
बांगलादेशान पाकिस्तानाक 128 धांवड्याचें जैताचें लक्ष्य दिल्लें, ताचो फाटलाव करतना पाकिस्तानाच्या मोहम्मद रिझवान आनी कॅप्टन बाबर आझमान सावकास सुरवात केली. पयले विकेटी खातीर तांणी 57 धांवड्यांची भागिदारी केली. मात ओपनर म्हणून तांणी लजेक घालपी विक्रम केलो, पयल्या विकेटी खातीर तांणी अर्द शेंकड्याची भागिदारी केली खरी मात ती लेगीत कासवाचे गतीन, दोगानीय 63 बॉलांत 67 धांवड्यो केल्यो. टी-20त खंयच्याय देशान पयले विकेटी खातीर केल्ली ही सगल्यांत सावकाश अर्द शेंकड्याची भागिदारी थारली. ते खेळटाले तेन्ना पाकिस्तानाचो धांवड्यांचो वेग ओव्हरीक 5.42 धांवड्यो आशिल्लो.
बाबर 25 धांवड्यो करून बाद जातगीर रिझवान लेगीत आवट जालो. ताणे पाकिस्ताना खातीर सगल्यांत चड 32 धांवड्यो केल्यो. ते उपरांत पाकिस्तानाचो डाव परत गडगडलो. हॅरीश (31) आनी मसूदान (24) डाव साल्वार केलो. 19 वे ओव्हरींत पाकिस्तानात जैत मेळयलें. बांगलादेशाच्या तस्कीन अहमद सोडून बाकीच्या बॉलरांनी दरेकी एक विकेट घेतली. नसुम अहमदान 4 ओव्हरींत फकत 14 धांवड्यो दिल्यो.
ताचे पयलीं टॉस जिखून बांगलादेशान पयलीं खेळटना बरी सुरवात केली. पॉवर प्ले सोपलो तेन्ना तांच्या नांवार 1 बाद 40 धांवड्यो लागिल्ल्यो. मात उपरांत गळटेक सुरवात जाली. पंगडाचो अर्द शेंकडो लागसर 4 विकेटी पडल्यो. मात नजमुल हुसेन शांतोन पंगडा खातीर सगल्यांत चड धांवड्यो केल्यो. ताणे 46 बॉलांत 6 चौके मारून 50 धांवड्यो केल्यो. ताका लागून बांगलादेशान 20 ओव्हरींत 8 बाद 127 धांवड्यो केल्यो. पाकिस्ताना वतीन शाहिन आफ्रिदीन 4 ओव्हरींत 22 धांवड्यो दिवंन 4 विकेटी घेतल्यो. शादाब खानान 2 आनी हॅरीश रौफ, इप्तिकार अहमदान दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
