भांगरभूंय | प्रतिनिधी
नवी दिल्ली, खबरां संस्था ः बांगलादेशांत 2021 वर्सा सावन हिंदू लोकांचेर हल्लो करपाच्यो 3,582 घडणुको घडल्यात. रंगपूर-चिट्टागोंग सारक्या वाठारांनी अल्पसंख्यांकांचेर हिंसाचार चालूच आसा. अशें परराश्ट्र राज्यमंत्री कीर्तिवर्धन सिंह हांणी राज्यसभेंत सांगलें.
शिवसेनेचे (यूबीटी) खासदार अनिल देसाय हांच्या प्रस्नाक जाप दितना भारतान पाकिस्ताना कडेन अल्पसंख्यांकांचेर हिंसाचाराच्यो 334 व्हड प्रकरणा उपस्थित केल्या अशें सांगलें. अमेरिकेंत, कॅनडा आनी ब्रिटनांत हिंदू लोकांचेर हल्लो आनी देवळां तोडफोड करपाच्यो घडणुको घडल्यात. फाटल्या वर्सा सावन अमेरिकेंत हिंदू देवळांची तोडफोड करपाच्यो 5 आनी कॅनडांत 4 घडणुको घडल्यात अशें परराश्ट्र राज्यमंत्री कीर्ति वर्धन सिंह हांणी सांगलें.
राज्यसभेंत विचारिल्ल्या हेर प्रस्नांची जाप…
1 जुलय मेरेन 6,774 भारतीय कामगार इझ्रायलांत
अंदूं 1 जुलय मेरेन 6,774 भारतीय कामगार इझ्रायलांत गेलें. नोव्हेंबर 2023 वर्सा जाल्ल्या द्विपक्षीय करारा प्रमाण हे सगळे थंय कामाक गेल्यात. मार्च 2024 वर्सा लेबनानांतल्यान जाल्ल्या हल्ल्यांत भारतीय शेतकी कामगाराक मरण आयिल्ल्याचें सरकारान सांगलें. जाल्यार 3 भारतीय जखमी जाल्ले.
आयुष्मान भारत येवजणेंत फटवणूक, 1,504 हॉस्पिटलांक दंड
आयुष्मान भारत-प्रधानमंत्री जन आरोग्य येवजणेंतल्या अनियमितताये खातीर आनी फटवणूक केल्ल्यान आतां मेरेन 1,114 हॉस्पिटलांक पॅनलांतल्यान वगळ्ळ्यात. 1,504 हॉस्पिटलांक 122 कोटी रुपया दंड घालून 549 हॉस्पिटलांक निलंबित केल्यात अशें केंद्रीय भलायकी आनी कुटुंब कल्याण राज्यमंत्री प्रतापराव जाधव हांणी सांगलें.
देशभरांत 2.16 लाख सिकल सेल दुयेंती
17 राज्यांनी 6.04 कोटी लोकांची सिकल सेल दुयेंसाची चांचणी जाल्या, तातुंतल्या 2.16 लाख लोकांक संसर्ग जाल्ल्याचें दिसून आयलां. ही चांचणी ‘राष्ट्रीय सिकलसेल अॅनिमिया निर्मूलन अभियान’ खाला केल्या अशें भलायकी मंत्री जे.पी. नड्डा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
