भांगरभूंय | प्रतिनिधी
ढाका, खबरां संस्था: देशद्रोहाच्या आरोपा खाला अटक केल्ले बांगलादेशांतले हिंदू फुडारी चिन्मय कृष्णा दास ब्रह्मचारी हांकां बांगलादेशांतल्या न्यायालयान जामीन न्हयकारून तांकां बंदखणींत धाडले. तांचे अटके आड चितगांव आनी ढाका हांगा आंदोलनां सुरू आसात. मजगतीं, भारता कडल्यान घटनेचेर हुस्को उक्तायला. हिंदूं सयत सगळ्या अल्पसंख्याकांचे सुरक्षीततायेची हमी बांगलादेशान दिवची, अशें भारतान म्हणलां.
बांगलादेश पुलिसांनी सोमारा चिन्मॉय कृष्णा दास ब्रह्मचारी हांकां ढाक्यांतल्या हजरत शाहजलाल आंतरराष्ट्रीय विमानतळ वाठारांतल्यान अटक केली. ते चितगांवा कडेन वताले. ते ‘सम्मिलीता सनातनी जोत’ हे हिंदू संघटणेचे फुडारी. दास आनी १८ जाणां आड ३० ऑक्टोबराक केश दाखल केल्या.
बांगलादेशाची आदले प्रधानमंत्री खालिदा झिया हांचे ‘बांगलादेश नॅशनॅलिस्ट पार्टी’च्या फुडार्यान तांचे आड कागाळ केल्या. २५ ऑक्टोबराक हिंदू समुदायाच्या रॅली मजगतीं बांगलादेशच्या राष्ट्रीय बावट्याचो अपमान करपाचो आरोप तांचेर आसा. खटल्याचेर सुनावणे मजगतीं चितगांवचे महादंडाधिकारी काझी शारिफुल इस्लाम हांणी तांकां जामीन न्हयकारलो. चितगांवां भायर तांकां अटक केली. कायद्या प्रमाण, २४ वरां तांकां न्यायालयीन कोठयेंत दवरप गरजेचें आसा, अशें तांणी म्हणलें. शेख हसीना सरकार कोसळिल्ल्याक ५० जिल्ह्यांनी हिंदू अल्पसंख्याकांचेर दोनश्यां परस चड हल्ले जाल्यात.
मजगतीं, भारतान हे घडणुकेचेर हुस्को उक्तायला आनी बांगलादेश सरकाराक हिंदूं सयत सगळ्या अल्पसंख्याकांचे सुरक्षिततायेची हमी दिवपाक सांगलां. दास हांकां अटक केले उपरांत परराष्ट्र मंत्रालयान निवेदन प्रसिद्ध केलां. तातूंत म्हणलां, हे घडणुके उपरांत हिंदू आनी हेर अल्पसंख्याकांचेर बांगलादेशांतल्या अतिरेकी घटकां कडल्यान हल्ले केले. अल्पसंख्याकांचीं घरां आनी वेवसायीक आस्थापनांची लुटमारीच्यो जायत्यो घडणुको नोंद केल्यात. तशें,, बांगलादेशांतल्या देवळांनी चोरी आनी देवतांच्या विटंबनाच्यो घडणुकोय घडल्यात. दुर्दैवान, हे घडणुकेंतले दोशी सद्या ओगी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
