भांगरभूंय | प्रतिनिधी
ॲडव्होकेट संघटणेची केंद्रा कडेन मागणी
पणजी: बांगलादेशांत अटक केल्ले ‘इस्कॉन’चे स्वामी चिन्मय कृष्णदास ब्रह्मचारी हांची सुटका करप आनी बांगलादेशांतल्या अल्पसंख्यांक हिंदूंचेर जावपी भिरांकूळ अत्याचार आडावपाक केंद्र सरकारान बेगोबेग हस्तक्षेप करचो, अशी मागणी करपी निवेदन आदर्श राष्ट्ररचने खातीर कार्यरत आशिल्ल्या ॲडव्होकेट संघटणेन प्रधानमंत्री नरेंद्र मोदी हांचे कडेन केल्या. संघटणे वतीन प्रधानमंत्री कार्यालयांत धाडपा संबंदीचें निवेदन उत्तर गोंयचे अतिरिक्त जिल्लोधिकारी महादेव आरोंदेंकार हांकां दिलें. संघटणेच्या शिष्टमंडळांत यश नायक, रूपेश गांवस, सुशांत धाऊसकार, सुनील सिरसाट, सुधांशू मोरजकार, संतोष अनुर्लेकर आनी सुरक्षा गांवस हांचो आसपाव आशिल्लो.
निवेदनांत म्हणलां, फाटलीं कितलींशींच दसकां बांगलादेशी हिंदूंक थंयचे लोक लक्ष्य करतात. वर्स १९५१ त बांगलादेशांतल्या हिंदूंचो आंकडो २२ टक्के आशिल्लो. आतां तो ८ टक्क्यांचेर पावला. अल्पसंख्य आशिल्ल्या हिंदूंचें धर्मीक स्वातंत्र्य आनी सुरक्षा हे विशीं प्रस्न उप्रासला. भारतांतल्या अल्पसंख्यांक मुसलमानांच्या मागण्यां खातीर आग्रो करपी भारतांतले धर्मनिरपेक्ष आनी पुरोगामी अशें म्हणून घेवपी गट बांगलादेशांतल्या हिंदूंचेर जाल्ल्या अत्याचारा विशीं एक उतर पसून काडिनासतना ओगी रावल्यात. भारत सरकारान थंय बांगलादेशांतल्या ‘इस्कॉन’चे स्वामी चिन्मय कृष्णदास ब्रह्मचारी हांची रोखडीच सुटका करून तांकां सुरक्षा दिवची आनी थंय अल्पसंख्यांक संरक्षण कायदो लागू करचो, हे खातीर बांगलादेश सरकाराचेर खर चेंपण हाडपाक जाय. भारत सरकारान बांगलादेशांतल्या हिंदू समुदायांच्या सुरक्षा आनी मानवी हक्क मेळोवन दिवपाक संयुक्त राष्ट्रां सारक्या आंतरराष्ट्रीय संस्थेची मजत घेवपाक जाय.
ह्या निवेदनाच्यो प्रती केंद्रीय गृहमंत्री, केंद्रीय कायदो आनी न्याय मंत्री हांकांय धाडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
