बांगलादेशांतले हिंदू चलयेन प्रधानमंत्री मोदी हांकां पत्र बरोवन मागली मजत
भांगरभूंय | प्रतिनिधी
ढाका, खबरां संस्था: प्रधानमंत्री शेख हसीना हांच्या राजीनाम्या उपरांत आनी देश सोडल्या उपरांतूय बांगलादेशांत हिंसाचार चालूच आसा. हसीना हांच्या अवामी लीग पक्षाचे समर्थक हिंदू लोकांच्या घरांनी घुसून तांचे कडल्यान पयशे लुट्टात. तशेंच घरां मोडटात. इतलेंच न्हय पयशे मेळना जाल्यार तांकां जिवे मारपाच्योय घडणुको घडपाक लागल्यात. हे विशीं सोशल मिडियाचेर एका हिंदू चलयेचें पत्र बरेंच व्हायरल जातना दिसता. तिणे भारता कडेन मजत मागल्या. १२ वेंत शिकपी एके हिंदू विद्यार्थीनीन हें पत्र बरयलां. ‘स्पुटनिक इंडिया’न हें पत्र शेअर केलां. ह्या पत्रांत ती चली भारत सरकारा कडेन मदतीची मागणी करता.
देशांत हिंदूंक लक्ष्य करून हल्ले करतात. जें शब्दांत सांगप कठीण आसा. विशेश म्हळ्यार बायलो आनी भुरग्यांक लक्ष्य करतात. तीं छळ आनी बलात्काराचे बळी थारतात. हिंदू वेवसायूय लक्ष्य करतात. हिंदूंची दुकानां लुटतात. हिंदूंच्या जिवाच्या आनी घरांचे सुरक्षितताये खातीर समाजकंटक लाखांनी रुपयांची मागणी करतात. हिंदूंनी देश सोडूंक ना जाल्यार ताचे वायट परिणाम भोगाचे पडटले अशी धमकी दितात.
भारत सरकारा आनी प्रधानमंत्री नरेंद्र मोदी हांचे कडेन मागणी करपाचें आसा, तांणी आमकां बेगोबेग मजत करची. आमकां आमच्या देशांत शांतीकायेन जगपाचें आसा. म्हाका खबर आसा भारत सरकार आमचे खातीर काळजींत आसा आनी मजत करपाचो यत्नूय करता आसूं ये. मात कळाव केल्यार व्हड लुकसाण जावपाची शक्यताय आसा. बांगलादेशांतल्या सगळ्या हिंदूंच्या वतीन हांव तुमकां बांगलादेशांतल्या समाजकंटकांचेर कारवाय करपाची मागणी करतां. तुमी आतां मेरेन उबारिल्ल्या पावला खातीर हांव तुमचें उपकार मानपाक सोदतां, अशें ते चलयेन पत्रांत बरयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
