भांगरभूंय | प्रतिनिधी
दोन मोटारी जप्त; हेर दुबावितांचो सोद सुरू
भांगरभूंय । प्रतिनिधी
म्हापशें : बस्तोड्यां रोडरेज वयल्यान गुरवार बायले सयत तिच्या घरकाराक मारपेट केल्ल्या प्रकरणांत अटक केल्ल्या तिनूय दुबावितांक म्हापशें न्यायालयान 5 दिसांची पुलीस कोठडी फर्मायल्या. जाल्यार ह्या प्रकरणांत वापरिल्ल्यो दोन मोटारी पुलिसांनी जप्त केल्या. हेर दुबावितांचो सोद चालू आसा.
ह्या हल्ल्या प्रकरणांत पुलिसांनी पिराझोन – मयडेंचो रंगनाथ विश्वनाथ शेट्ये (55), विनोद नारायण शेट्ये उर्फ शेटकार (47) आनी कौशल तुळशीदास शेट्ये (32) ह्या तिगांक पुलिसांनी मंगळारा राती अटक केल्ली. म्हापशें पुलिसांनी बुधवारा ह्या हल्ल्या खातीर वापरिल्ल्यो जीए 03 एएफ 2360 आनी जीए 03 झेड 4139 नंबराच्यो मोटारी जप्त केल्यात. ह्यो मोटारी तुळशीदास शेट्ये आनी कार्तीक शेट्ये हांचे मालकीच्यो आसात.
फिर्यादी श्रुती शिरोडकार (नास्नोळें) आनी तिचो घरकार विवेक शिरोडकार दोगांय ह्या हल्ल्यांत गंभीर जखमी जाल्ले. तांचेर सध्या खाजगी हॉस्पिटलांत उपचार चालू आसात. ह्या प्रकरणांत पिडीत कुटुंबियांनी मंगळारा 3 मेक दुबावितां मदल्या तुळशीदास, कार्तीक आनी रुत्वीक अशीं तिगांचीं नांवां पुलिसांक दिल्लीं. मजगतीं, हें प्रकरण 2 मेक रातच्या 8.30 वरांच्या सुमाराक तार बस्तोडें जंक्शना लागसार मयडें रस्त्या वयल्या फिर्यादींच्या शॉरमा गाड्याचेर घडिल्लें. पुलिसांनी ह्या प्रकरणांत भा.दं.सं.च्या 126(2), 352, 351(3), 118(2) आनी 3(5) कलमा खाला अज्ञात 20 ते 25 जाणां आड गुन्यांव नोंद केला. फुडलो तपास पुलीस अधिक्षक राहूल गुप्ता आनी निरिक्षक निखील पालेकार हांच्या मार्गदर्शना खाला उपनिरिक्षक बाबलो परब करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
