भांगरभूंय | प्रतिनिधी
अॅड. कार्लुस फेरेरा हांचो आरोप: तपास सुशेगाद
पणजी : बस्तोड्यां जाल्ल्या हल्लो प्रकरणांतलो एक दुबावीत हो भाजपा वांगडी आशिल्ल्यान तपास सामको सुशेगादीन चल्ला. दुबावीत आनी तपास अधिकार्याचे लागींचे संबंद आशिल्ल्यान तपास अधिकारी बेगोबेग बदलपाची मागणी हळदोणेंचे आमदार अॅड. कार्लुस फेरेरा हांणी केल्या.
फेरेरा हांणी कॉंग्रेस हावजांत पत्रकार परिशद घेतली. ह्या वेळार तांचे वांगडा प्रदेश कॉंग्रेस अध्यक्ष अमित पाटकार हजर आशिल्ले.
पार्किंगा वेल्यान जाल्ल्या वादा उपरांत गुरवार बायलेचेर हल्लो करपाचो प्रकार सामको गंभीर आसा. हे विशीं कारवाय करपाचो उलो मुख्यमंत्र्यान जरी दिलां तरी तपास सामको सुशेगाद चल्ला. तपास अधिकारी पीएसआय बाबलो परब हांचे दुबाविता कडेन लागींचे संबंद आसात. निश्पक्ष तपासा खातीर तपास अधिकारी बदलपाची गरज आसा. दुबावीत भाजप वांगडी आशिल्ल्यान तपासांत हस्तक्षेप तशेंच चेंपण येता. दुबाविताचो गॉडफादर कोण? असो प्रस्न फेरेरा हांणी पत्रकार परिशदेंत केलो.
राज्यांत बायलो सुरक्षीत नात हें ह्या हल्ल्यांत सिद्ध जाल्लें. भाजप सरकाराच्या काळांत कायदो आनी सुवेवस्था इबाडिल्ल्याचो आरोप अमित पाटकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
