भांगरभूंय | प्रतिनिधी
२० जाणांच्या अनवळखी टोळये आड गुन्यांव नोंद
म्हापशें ः बस्तोडच्या रोडरेज वेल्यान जाल्ल्या वादांतल्यान गुरवार बायले सयत घोवाक बरीच मारपेट केली. हे विशीं पुलिसांनी २० जाणांचे टोळये आड गुन्यांव नोंद केला. हे दुबावीत टोळयेंत २- ३ पुलीस, वीज कर्मचारी आनी वकील आशिल्ल्याचो दावो पिडेस्ताच्या कुटुंबियांनी केला. मजगतीं, फोन करून हें प्रकरण मिटोवपाचो यत्न ही टोळी करता, अशी म्हायती शिरोडकार हांच्या घरच्यांनी दिली.
ह्या हल्ल्यांत फिर्यादी श्रृती शिरोडकार (जयदेववाडो, नास्नोळा) आनी तिचो घोव विवेक शिरोडकार हीं दोगां जखमी जाल्यांत. तांचेर खाजगी हॉस्पिटलांत उपचार सुरू आसात. मंगळारा सकाळीं पिडेस्तांच्या कुटूंबियांनी दुबावितां मदले तुळशीदास शेट्ये, कार्तिक आनी रूत्विक अशा तिघांचीं नांवां पुलिसांक दिल्यां. हे तिगूय मयडेचे. ते प्रमाण म्हापशें पुलीस दुबाविताक सोदतात.
ही घडणूक सोमारा २ जुनाक रातच्या सुमार ८.३० वरांचेर तार बस्तोडेंच्या जंक्शना लागसारा मयड्या रस्त्यार घडलो. कागाळदार पिडेस्तांचो तार बस्तोडा जंक्शना लागसारा चिकन शोरमाचो वाहन वजा गाडो आसा. जखमी दोगांय ह्या गाड्याचेर वेवसाय करतना ह्या हल्ल्याचो प्रकार घडलो.
हे घडणुके पयलीं म्हणल्यार सकाळीं मयड्यां रस्त्या कुशीक वाहन पार्कींगच्या रोडरेजवेल्यान पिडेस्त विवेक आनी दुबावितां मदीं वाद जाल्लो. हाचो जाब विचारपा खातीर दुबावीत तीन- चार गाडयो घेवन घडणुके सुवातेर आयले. गाड्यार वेवसाय करपी विवेक शिरोडकार हाका आडोवन गाळी संवल्यो. उपरांत सुरयेचो भंय दाखोवन दांडो, लोखणाच्यो सरयो आनी थापटां मुटी घालून मारपेट केलो. घोवाक वाटावपा खातीर गेल्ली कागळदार श्रृती शिरोडकार हे बायलेचे केंस धरले आनी तिकाय बडयली. तशेंच दुबावितांनी विवेकाचे कपडे काडले आनी ते घडणुके सुवाते वेल्यान पळून गेले.
घडणुके उपरांत रातचे दोगांय जखमी जिल्लो हॉस्पिटलांत उपचारा खातीर दाखल जाले. जखमी विवेकाक गोमेकोंत धाडलो. जाल्यार श्रृती हिका डिस्चार्ज दिलो. उपचारा उपरांत विवेकाक सकाळीं डिस्चार्ज दिलो. उपरांत दोगांय जखमींची सकाळीं भलायकी इबाडिल्ल्यान तांकां खासगी हॉस्पिटलांत दाखल केलीं.
पुलिसांनी हे विशीं भा. दं. सं. च्या १२६ (२), ३५२, ३५१(३), ११८(२) आनी ३(५) कलमां खाला अनवळखी २० ते २५ जाणां आड गुन्यांव नोंद केला. फुडलो तपास पुलीस उपनिरीक्षक बाबलो परब हे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
