भांगरभूंय | प्रतिनिधी
दे शभर आयज 21 ऑक्टोबराक पुलीस हुतात्मा दीस पाळटात. राष्ट्रा खातीर बलिदानाची, त्यागाची भावना दवरून कामार आसतना शहीद जाल्ल्या जायत्या पुलीस कर्मचाऱ्यांच्या उगडासाक हो दीस पाळटात.
21 ऑक्टोबर 1959 दिसा भारत- तिबेट शिमेचेर आनी 2500 हॉट ग्रीन शिमेचेर आशिल्ल्या लडाखाचे हद्दींत बर्फान भरिल्ल्या निर्जन वाठारांत कुलकुल्याचे थंडेंत गस्त घालतना धोकादायक पद्दतीन लिपून बशिल्ल्या चीनी सैनिकांनी केल्ल्या हल्ल्यांत पुलीस दळाचे 10 पुलीस हवालदार शहीद जाल्ले. हो दीस याद करून देशांतल्या आतंकवादी हल्ल्यांत, नक्सलवादी कारवायांनी, समाजीक अशांतताय आनी हिंसक कृत्यांनी ड्युटीचेर शहीद जाल्ल्या पुलीस जवानांची याद ह्या दिसा करतात.
24 वरां ड्युटी अशें पुलिसांचें वर्णन करतात. कारण ते लोकांची सेवा करपाक 24 वरां तयार आसतात, मागीर तो गणेशोत्सव आसूं वा नवरात्री, आसूं वा दिवाळी, ईद आसूं वा नाताळ, देशांतल्या लोकांक सुरक्षीत दवरपाक ते सदांच तयार आसतात. जेन्ना आमी आमच्या कुटुंबा वांगडा हे उत्सव मनयतात तेन्ना ते आपल्या सुरक्षे खातीर कुटुंबा पासून पयस रावतात. तांकां लागूनच आमी सगळे उत्सव खोशेन मनोवपाक शकतात. लश्करांतल्या जवानां इतलेंच तांकां म्हत्व आसा. मोर्चा, आंदोलन, वेंचणुको पुलिसां बगर जावंक शकनात. थंय सदांच पुलीस तैनात आसतात. खंयच्याय आपत्तींत सैमीक आसूं वा मनशान तयार केल्ली आसूं, भौसाची राखण करपा खातीर पुलिस सगळ्यांत पयलीं हाजीर रावतात. 26/11 पाकिस्तानांतल्या कडव्या धर्मांध संघटनांनी आतंकवाद्यां कडल्यान मुंबयचेर केल्ल्या हल्ल्यांत पुलिसांनी भौशीक सुरक्षे खातीर कितें करूं येता तें संवसारान पळयलां. पुलीसांच्या शौर्याक लागूनच आतंकवाद्यांनी मुंबयचेर हल्लो करपाची येवजण तांकांच भुजली. सगल्या आतंकवाद्यांनी मारून उडयले. एकल्याक धरलो. पुलिसांनी आपलो जीव धोक्यांत घालून मुंबय वाटायली. ह्या हल्ल्यांत जायते पुलीस शहीद जाले. स्वताचो बळी दिवन पुलिसांनी मुंबयकार आनी थंय आशिल्ल्या हेर राज्यांतल्या लोकांचो जीव वाटावलो.
1992 वर्सा मुंबयच्या जातीय दंगलींत लेगीत पुलिसांचें काम तुळा जावची ना, अशें आशिल्लें. कोरोना सारकिल्ल्या धामींत पुलिसांचें म्हत्व आनीक कळ्ळें. कोरोना धामींतल्यान देशांतल्या लोकांक वाटावपा खातीर पुलिसांनी केल्ल्या वावराक अंत नाशिल्लो. कोरोनान हजारांनी पुलीसांक मरण आयलें तरी पुलीस आपल्या कर्तव्या पसून फाटीं सरूंक नात. प्रधानमंत्र्यान ताच्या वावराक लागून ताका कोव्हीड वाॅरियर ही पदवी दिली. देशांत कायदो आनी सुवेवस्था तिगोवन दवरपा खातीर ते कुटुंबाची पर्वा करिनासतना, विसव घेनासतना बारा ते अठरा वरां ड्युटी करून लोकांची, मांयभुंयेची राखण करतात.
आतंकवादी, नक्सली ह्या सारक्या राश्ट्रविरोधी शक्तीं आड झुजतना कांय जाण वीरमरण मरतात. अशा शहीद सैनिकांची याद करून तांचे पवित्र यादीक नमन करप हें देशांतल्या दरेका नागरिकाचें कर्तव्य. सगळ्या पुलीस, अधिकारी आनी कर्मचाऱ्यां खातीर हो दीस खूब म्हत्वाचो. पुलीस हुतात्मा दिसा निमतान हुतात्मा पुलीसांक आर्गां.
आवटो हुकूमशहा
संवसारांत जायते आवटे हुकूमशाय जाल्यात. हाका लागून संवसार खूब फावटी संकश्टांत पडलां. ह्या आवट्या हुकूमशाहांक लागून जायतीं झुजां जाल्यांत. उत्तर कोरियाचो हुकूमशाह किम जोंग उन हो असोच एक शिरफाल्त हुकूमशाह. तो केन्ना कितें थारायत ताचो नेम ना. आतां लेगीत ताणें असो निर्णय घेवन पुराय संवसाराचो मनस्ताप वाडयला. ताणें आतां उत्तर कोरियाचें संविधानच बदल्लां. किम जोंग उनान आपलें संविधान बदलतना दक्षीण कोरियाक आपलो क्रमांक एक दुस्मान जाहीर केला. ताणें आपल्या संविधानांत तसो उल्लेख केला. दुस्मानाचो उल्लेख करपी एकूच संविधान अशी आतां उत्तर कोरियाची वळख निर्माण जाल्या.
किम जोंग उनान जानेवारींत दक्षीण कोरियाक आपलो क्रमांक वन दुस्मान म्हूण जाहीर केल्लो. इतलेंच न्हय तर उत्तर कोरिया सावन दक्षीण कोरिया मेरेनचे रस्तो आनी रेल्वे मार्गूय कापून, तोडून, मोडून उडयिल्लो. त्या संविधानांतय उल्लेख केला की जर… कोरियान आमचे जमनीच्या, हवेच्या, उदकाच्या 0.001 मिमी.चेर लेगीत घुरी घाली जाल्यार आमी दक्षीण कोरिया कडेन झुज करतले. आमी झुजांतय अणुशस्त्रांचो वापर करतले. किम जोंग उनान फकत संविधान बदलून दक्षीण कोरियाक क्रमांक 1 दुस्मान जाहीर केला, पूण ताणें आपल्या सैन्यांत 14 लाख नवे सैनिक भरती करपाचो आदेशूय दिला.
उत्तर कोरियांत आतां 12 लाख सैनिक आसात आनी 6 लाख सैनिक राखीव दवरल्यात. तांकां हे 14 लाख सैनिक मेळटले. उत्तर कोरिया आयज अणुशस्त्रां आशिल्लें राश्ट्र आसा. ह्या देशांत जायतीं अणुशस्त्रां आसात. तशेंच तो सतत क्षेपणास्त्रांची चांचणी करीत आसता. क्षेपणास्त्रांची चांचणी करता आनी रोखडीच अमेरिकेक शिटकावणी दिता. अर्थांत ताका रशिया आनी चीन हांचो पुराय तेंको आसा आनी तो हें सगळें तांच्याच जिवार करता, पूण हें करतना तो संवसाराक फोंडांत घालपाचे दिशेन व्हरता.
किम जोंग उनाक जाप दिवपाक दक्षीण कोरिया तयार आसा. किम जोंग उन हाच्या नाका जाल्ल्या कर्तुबांक लागून दोनूय कोरियन देशांनी तणाव वाडला. उत्तर कोरिया आनी दक्षीण कोरिया हांचे मदली दुस्मानकाय संवसाराक नवी न्हय. दशकां सावन हे दोनूय देश दुस्मान आशिल्ले. ही दुस्मानकाय थांबना पूण वाडत आसा. आतां किम जोंग उनान संविधानांत केल्ल्या ह्या बदलाक लागून ह्या दोनूय देशां मदीं ती आनीक वाडटली. ताका लागून झुज जावंक शकता. रशिया- युक्रेन आनी इझ्राएल- हमास झुजाक लागून संवसार पयलींच त्रासांत आसा, तातूंत हें नवें झूज सुरू जाल्यार संवसाराचो हुस्को आनीक वाडटलो.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
