भांगरभूंय | प्रतिनिधी
ईद उल अधा – इस्लामी पंचांगांतल्या जुल हिज्जा म्हयन्याच्या धाव्या दिसा दरवर्सा कुरबानी वा बलिदान हो उत्सव मनयतात. तो इब्राहिम पैगंबर (अब्राहम) (PBUH) हांच्या व्हड बलिदानाचें प्रतिबिंब आसा. जो सदांच आपल्या निर्मात्याचे आज्ञेक शरण येवपाक तयार आशिल्लो. ह्या कामा खातीर आपलो एकलोच पूत बळी दिवपाक तो तयार जाल्लो. ताची भक्ती पळोवन ईश्वरान ताच्या पुताचे सुवातेर मेंढर दवरलो आनी संवसाराच्या स्वामी कडेन ताची निश्ठा पळोवन ताणें ताका लोकांचें फुडारपण दिलें. ताकाच लागून अब्राहमाक एक धर्मीक, आज्ञापालन करपी म्हूण वळखतात. जाणें त्या ईश्वराचो संदेश लोकांक सुमार 4500 वर्सां आदीं पावयलो. मोयजेस, जेजू आनी निमाणें मुहंमद (PBUH) सारकिल्या उपरांतच्या ईश्वराचे दूत येवपाच्या बऱ्याच आदीं ते दूत म्हणुन ईश्वराचे आग्नेन नेमले गेले आनी म्हुण आयज ज्यू, क्रिस्तांव आनी मुसलमान हांचे मदीं तांकां खूब मान्यताय मेळ्ळ्या.
बळीच्या मांसाची गजाल म्हणल्यार इस्लाम धर्मांत तें खावप आनी नात्यांतल्या लोकांक, गरीबांक आनी गरजेवंतांक खावपाक दिवप. ईश्वराक अर्पण करून ताचो नाश करपाक निषेध आसा. ईश्वराक अन्नाची गरज ना. तो सगळ्यांक अन्न दिता. कुराणांत म्हळां, ‘तांचें मांस वा रगत अल्लाक पावना, तुमची धर्मीकताय ताचे कडेन पावता. अशे तरेन ताणें जनावरांक तुमचे अधीन केल्यात, जाका लागून तुमी अल्लाच्या दिल्ल्या ह्या मार्गदर्शना खातीर अल्लाची स्तुती करची आणि हे पैगंबर, जे बऱ्या मार्गाचेर आसात तांकां खुशालकायेची बातमी दियात.’ (कुराण 22:37).
बळी दिवपा खातीर जनावरांक कित्याक मारतात? संवसारांतल्या चड करून सगळ्या धर्मांत पुर्विल्ल्या काळा सावन पशुबळी दिवपाची चाल आसा. मनुस्मृती 4:27, अथर्ववेद – 9: 4 ह्या सारक्या हिंदू शास्त्रांत पशुबळीचे श्लोक मेळटात. क्रिस्तांव धर्मांत, ओल्ड टेस्टामेंट बायबलांत जिनेसीस 22: 2 अब्राहामाच्या बलिदानाची काणी सांगता. जाकोबाच्या बळीचो उल्लेख जेनेसिस 31:54 त मेळटा.
इस्लाम धर्म मानता की मनशा सयत सगळ्या प्राण्यांचो आनी विश्वाचो स्वामी एक ईश्वरच आसा. ताणें सगळ्यांक निर्माण केला आनी जनावरां हीं पर्यावरण यंत्रणेचोच एक भाग आसा. ईश्वरान तांचे जिणेची पद्दतय थारायल्या आनी ते फकत एक ईश्वराचीच आज्ञा पाळटात. “चिन्नां विशीं म्हणल्यार, फकत धर्तरेचेर हालपी खंयच्याय प्राण्याचेर आनी हवेंत उडपी खंयच्याय सुकण्याचेर एक नदर मारात: तेंय तुमचे सारकेंच. तांच्या जिविताचे मार्ग आदींच थारावपाक आमी कांयच कमी करूंक ना: मागीर निमाणें ते सगळे आपल्या प्रभू कडेन एकठांय जातात. (कुराण 6:38).
अन्नाची गरज भागोवपाक ईश्वरानं दर एका जिवाक दुसऱ्यांच्या अधीन केला. देखून मनशा परस खूब नेटान वाडपी जीव भरपूर प्रमाणांत मेळटात. दर एका जिवाची गरज भागोवपा खातीर पर्यावरण यंत्रणेचो समतोल कसो दवरचो तें ईश्वराक खबर आसा.
संवसारांत शिवराक आनी मांसाहारी अशे दोनूय प्रकारचे प्राणी आसात. तेच रीतींन ईश्वरानं दरेकल्याक अन्न सेवन करपाक गरजेचे गूण दिल्यात. मनशाक सर्वाहारी केला. ताका शाकाहारी आनी मांसाहारी अशे दोनूय प्रकार खावपाची खुबी तातून घाल्या. देखून जेवणाच्या हेतून मारप हें अनैतिक अशें म्हणप चुकीचें थारतलें. खंयच्याय निरपराधी जिवाक मारप वा जनावरांक वा सुकण्यांक खावपा खातीर कत्तल करप वा हानी करप हाका इस्लाम धर्म सक्त मनाय करता. निमाण्या संदेशाच्या शिकवणेंत आमकां जायते प्रसंग मेळटात, जातूंत तांणी जनावरांक आनी सुकण्यांक मोग आनी दया दाखयल्ली.
एक फावट मुहंमद पैगंबर (स.अ.व.) हांचे वांगडा एक साथीदारांचो पंगड प्रवास करतालो. प्रेशीत तांकां कांय काळ सोडून गेले. तांचे गैरहजेरेंत त्यांनी एक सुकणें ताच्या दोन पिलां वांगडा पळयलें आनी तांणी पिलां घोंटेरांतल्यान भायर काडलीं. आवय सुकणें दुख्खान पाखां फडफडयत हवेंत वळवळटालें, तेन्ना पैगंबर परतले. तांणी म्हणलें, ह्या सुकण्याची पिलां घेवन कोणें ताची भावना दुखयल्या? पिलांक परत दिवचें.” (हदीस मुस्लिम)
मुहंमद पैगंबरान (PBUH) म्हणलें, “खरें म्हणल्यार अल्लान सगळ्या गजालीं खातीर बरेंपणाची आज्ञा केल्या; देखून मारतना बऱ्या पद्दतीन मारप, आनी कत्तल करताना बऱ्या पद्दतीन कत्तल करप. (हदीस मुस्लिम ५१६७) देखून इस्लाम धर्मांत मेरुरज्जूक जखमी करिनासतना वाऱ्याची नळी आनी गळ्यांतली रगतपेशी अचूक कापतात. हाका लागून जनावराक बेगीन मरण येता आनी उण्यांत उणी वेदना जाता.
गरजेवंतांक अन्न दिवपा वांगडाच, पशुबळी उत्पन्नाचो एक स्त्रोत जावन देशाची अर्थवेवस्था वाडपाक आदार करता, गांवगिऱ्या लोकांक पोट भरता, निरुपयोगी पशुधनाच्या खर्चाचेर ताण उणो जाता, पशुधन उत्पादन तिगून उरता. जनावराची बळीन फकत मांस मेळना तर मोलादीक उपउत्पादन हि मेळटात जे देश विदेश निर्यात जातात आणि देशाचे अर्थीक उदरगतीखातीर फायदेशीर थारता.
अशे तरेन बलिदान करपी व्यक्ती, समाज आनी राश्ट्राच्या आध्यात्मिक, समाजीक आनी अर्थीक बऱ्यापणाक योगदान दिता.
नजराना दरवेश
8975074456
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
