भांगरभूंय | प्रतिनिधी
मुंबय, खबरां संस्था ः बलात्कार बळींच्या भुरग्यांक दत्तक घेतले उपरांत डीएनए चांचणी करप हें योग्य न्हय. ताचो भुरग्यांच्या फुडाराचेर वायट परिणाम जावंक शकता, असो म्हत्वाचो निकाल मुंबय उच्च न्यायालयान एका प्रकरणांत दिला. निवाडो दितना न्यायालयान 17 वर्सां पिरायेचे चलयेचेर बलात्कार करून तिका कुमारी माता करपाक लायिल्ल्या दुबाविताची न्यायालयान जामिनाचेर सुटका केली.
न्यायाधीश जी. ए. सनाप हांच्या एकल खंडपिठान वयलो निवाडो दिला. बलात्कार पिडेस्त बायलेन चलयेक जल्म दिल्या उपरांत भुरग्यांक समाजसेवी संस्थेक दत्तक दिल्लें. हे संबंदी न्यायालयान पुलिसांक विचारलें की दत्तक घेवपाच्या वेळार भुरग्याची डीएनए चांचणी केल्ली काय? मागीर भुरग्याक ‘जल्माक येतकच रोखडेंच संस्थेक दिल्ले. भुरग्याक पयलींच दत्तक घेतिल्ल्यान संबंदीत संस्था ताच्या आवय- बापायची वळख दाखोवपाक सोदना’ अशें पुलिसांनी न्यायालयांत स्पश्ट केले. ‘भुरग्याक पयलींच दत्तक घेतिल्ल्यान डीएनए चांचणी करपाची गरज ना. हाचो भुरग्याच्या फुडाराचेर वायट परिणाम जावं येता’ अशें याचिकेच्या निर्णयांत खंडपिठान सांगलें.
मजगतीं, बळी आशिल्ल्या कुमारी मातेच्या आवय- बापायन बलात्कार केल्ल्याच्या आड न्यायालयांत खटलो दाखल केल्लो. हातूंत बळी चलयेक 17 वर्सां पिरायेचेर ह्या तरणाट्या कडेन मोग जालो. दोगांयचोय एकमतीन संबंद आशिल्लो अशें तरणाट्याच्या वकिलान न्यायालयांत सांगलें. हे प्रकरणांत त्या तरणाट्या आड बलात्कार केल्ल्याचो आरोप करुन गुन्यांव नोंद केल्लो.
ह्या प्रकरणांत पुलिसांनी ताका 2020 वर्सा अटक करुन अडेज वर्सां बंदखणींत दवरलो. इतलेंच न्हय तर आरोपपत्र जारी जालां तरी आरोप अजून खाशेल्या न्यायालयांत निश्चित जावंक. आतां भुरग्याचो डीएनए जावंक शकना. शारिरीक संबंद एकमतान जाल्ले. हो खटलो आतां खंयचे दिकेन वयतलो? अशे परिस्थितींत ताका जामीन मेळूं येता असो युक्तिवाद ताच्या वकिलांनी केलो. न्यायालयान तें मान्य करून तरणाट्याक जामीन दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
