बऱ्या विचारांनी समाजाक बरो मार्ग दाखोवंक मेळटा: डॉ. नूतन देव
भांगरभूंय | प्रतिनिधी
वैजकी मळार दोतोर म्हूण आपलें योगदान दितनाच, आपल्या मनांतले विचार लेख आनी काव्याच्या रुपांत हाडपाचे यत्न फोंडेची नामनेची दोतोर नूतन देव हांणी केल्यात. तांचीं आतां मेरेन पांच पुस्तकां उजवाडाक आयल्यांत. आभाळ (मराठी कविता), चार शब्द प्रेमाचे (मराठी कविता आनी ते विशींचे लेख), कवितेची धून (कोंकणी कविता), कोठये कूड (कोंकणी लेख) आनी काल तांचें ’काव्य चित्र’ हें कवितांचें पुस्तक उजवाडाक आयलां. डॉ सुनील काकोडकार हांणी काडिल्ल्या चित्रांचेर तांणी कविता बरयल्यो. चित्रकार आपल्या चित्रांतल्यान कितें सांगूंक सोदता ताचेर तांणी काव्य रचलां. सदांच हांसत्या मुखामळान
डॉ. नूतन देव हांणी दुयेंतींक तपासले आनी ३२ वर्सां सरकारी सेवेंत काम करून निवृत्त जातकच आपल्या लिखाणाक एक नवी दिशा दिली. आमच्या प्रतिनिधीन तांचे कडेन संपर्क सादलो तेन्ना तांणी सांगलें:
दोतोरकी करतना साहित्याचें लिखाण करतालीं? काय निवृत्त जातकच तुमकां बरयन दिसलें?
- आदीं वाचन चड जातालें. भलायकी केंद्रांनी, हॉस्पिटलांनी दुयेंतींक तपासपाक वतना तसो वेळ मेळनाशिल्लो, पूण हांव बरोबर एक पुस्तक दवरतालें आनी वेळ मेळटा तशें वाचतालें. जीण बरे तरेन मुखार व्हरतलो आनी हेरांकय बरो मार्ग दाखयतलो जाल्यार वाचन जायच. तातूंतल्यान खूब कितें शिकपाक मेळटा. सरकारी सेवेंत आशिल्लें तेन्ना बरोवपाक वेळ मेळ्ळो ना, मात निवृत्त जातकच बरोवपाक सुरुवात केली आनी आज मेरेन बरयत आसा.
तुमका बरोवपाची उर्बा कोणाकडल्यान मेळ्ळी?
नामनेची लेखिका माधवी देसाय हांणी शारदा ग्रंथ प्रसारक मंडळांतल्यान संमेलनां सुरू केल्लीं. एका संमेलनांत हांवें एक कविता वाचिल्ली, तांकां ती खूब आवडली. तेन्ना तांणी परत परत बरय म्हूण सांगतकच म्हाका उर्बा मेळ्ळी आनी हांव बरयत रावलें. माधवीताईक लागून हांव बरोवपाक शकलें. तांच्या ’सौदामिनी’ पुस्तकांत तांणी म्हज्या वावराचोय आस्पाव केल्लो.
तुमच्या घरांत बरोवपाची वा वाचनाची आवड कोणाक आशिल्ली?
- म्हजो बापूय कांय तेप म्हज्या म्हऱ्यांत रावतालो. बाबा सिर्वीस करतालो आनी निवृत्ते उपरांत ताणें कविता खूब बरयिल्ल्यो. तांचें वाचनूय खूब आशिल्लें. म्हज्या घरकाराकूय वाचपाक आवडटा. हे खातीर कुटुंबा कडल्यान एक तेंको मेळ्ळो.
अशें म्हणटात की संगीत आनी वाचन दुयेंतींक लेगीत बरे करता, हातूंत कितलें तथ्य आसा?
- कांय दुयेंसां बाबतींत, हय, दुयेंतींक तांचो खूब लाव जाता. बऱ्या विचारांनी मन सामकें हलकें जाता. दयेंती ७५ टक्के बरो जावंक शकता. दोतोरांनी दुयेंती कडेन विस्वासान आनी आपुलकेन उलयल्यार लेगीत तांचे मदीं सकारात्मकताय येता.
निवृत्त जाले उपरांत तुमी आतां समाजा खातीर योगदान कशीं दितात?
- हांव स्नेहमंदिर, मातृछाया आनी दिलासांत वचून जाण्ट्या पिरायेच्या दुयेंतींक तपासतां आनी तांच्या वांगडा वेळ घालयतां. तांकां खूब बरें दिसता.
तुमच्या ह्या नव्या पुस्तका विशीं सांगशात?
डॉ सुनिल काकोडकार हांणी एकदां म्हाका तांणी काडिल्लें चित्र धाडिल्लें. हांवें ताचेर काव्य रचलें आनी तांकां धाडलें. अशें करीत करीत सुमार ४५ चित्रांचेर हांवें कविता बरयल्यो आनी तांणीच मागीर हें पुस्तक उजवाडाक हाडपाची सुचोवणी केली. जी खरेपणांत आयली.
तुमी दोतोरकीच्या माध्यमांतल्यान लोकांची सेवा करतना कितलें समाधान मेळटालें?
खूब समाधान मेळटालें. पगाराची आशा नाशिल्ली. काम करप होच ध्येय आशिल्लो. ते खातीर खूब काम केलें आनी लोकांची सेवा केली. ते खातीर म्हाका म्हज्या घरच्यांनीय खूब तेंको दिलो.
साहित्य रचतना कितलें समाधान मेळटा?
खूब बरें समाधान मेळटा. लिखाण करतना वेळ बरो वता. तातूंतल्यान लोकांक एक बरो विचार दिवंक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
