बऱ्या फुडारा खातीर बचतीचीं पांच पावलां

भांगरभूंय | प्रतिनिधी

मनशान पयलीं म्हयन्याळ्या उत्पन्नाचो आनी खर्चाचो अर्थसंकल्प तयार करचो. मागीर गरजो, इत्सा आनी बचत अशे विभागणी करात. 50, 30 आनी 20 टक्के ह्या प्रमाणांत ती आसूंक जाय.

वेवसायीक आनी निवृत्त जाल्ले लोक तशेंच फाटल्या सहस्त्रकांतले तरणाटे, सगळेच आपल्या फुडारा खातीर पयशे वाटोवपाचे मार्ग सोदतात. ताचेर जायतीं पुस्तकां बरयल्यांत. तातूंत अर्थीक तत्वां स्पश्ट केल्यांत आनी प्रोत्साहन दिवपी आंकडेवारीचें चित्रण आसा. पूण बचती विशीं सहज उपलब्ध आशिल्लें गिन्यान आसून लेगीत अर्थीक स्थिरतायेचो मार्ग अस्पश्ट उरला.

हालींच्या आंकड्यां प्रमाण पयशे सांठोवपाचे प्रमाण उणें जालां. 2021 ते 2023 वर्सां मदीं एकूण राष्ट्रीय उत्पादनाच्या (जीडीपी) तुळेंत अर्थीक बचत उणी जाल्ल्याचें दिसून आयलां. हो भारतीय रिझर्व्ह बँकेचो आंकडो. 2021 वर्सा अर्थीक बचतीची टक्केवारी 7.2 आशिल्ली. 2023 वर्सा ती 5.1 मेरेन देंवली. राष्ट्रीय सांख्यिकी कार्यालयान 2022 वर्सा घरगुती बचतीची तुळा फाटल्या वर्सा कडेन केल्या. घरगुती बचतींतूय उणाव जाल्ल्याचें तातूंतल्यान दिसून आयलें. हो उणाव 1.60 लाख कोटी रुपया आसा. वैयक्तीक रिणांतय वाड जाल्या अशें  राष्ट्रीय सांख्यिकी कार्यालयाच्या आंकड्यां प्रमाण दिसून आयलां.

अर्थीक समृद्धी येता तेन्ना आमी ती फुडले पिळगेक हस्तांतरीत करतात. ताचे वेगवेगळे वर्ग केल्यात. असो विभाग करचे परस अर्थीक बऱ्यापणा कडेन पांच उपाय म्हणून पळोवप बरे. त्या पांच पांवड्यांत अर्थसंकल्प तयार करप, रिण फारीक करपाक प्राधान्य दिवप, बचत करप, बचतींत विविधताय हाडप आनी विमो करप हांचो आस्पाव जाता. ह्यो संवयी वाडयल्यार सुरक्षीत फुडारा खातीर बचत करपाक मदत जाता.

स्वताचो बरो अर्थसंकल्प तयार करपाक जमप आनी तो बरो तयार करप हें बरी अर्थीक येवजण करपाक खूब म्हत्वाचें. तरणाट्यांचें एक उदाहरण म्हणून घेवया. आपूण बचत करपाक शकना म्हणून तांकां राग येता. पूण तांणी तांचें विद्यार्थी रीण मतींत घेवन ते प्रमाण बजेटींग तयार करूंक नाशिल्ल्यान अशें जावं येता. तशेंच, एका कर्मचाऱ्यान घराच्या ईएमआय फारीकणी रक्कमेची चुकीची गणना केल्यार तांचें अर्थसंकल्पय वायट जावंक शकता. ते सारकें केलें ना जाल्यार ताचो परिणाम फकत बचतीचेर जायना, पूण लोकां मदीं वाद वा संघर्शाचें वातावरण तयार जावंक शकता.

मनशान पयलीं म्हयन्याळ्या उत्पन्नाचो आनी खर्चाचो अर्थसंकल्प तयार करचो. मागीर गरजो, इत्सा आनी बचत अशे विभागणी करात. 50, 30 आनी 20 टक्के ह्या प्रमाणांत ती आसूंक जाय. म्हणल्यार उत्पन्नांतले 50 टक्के गरजेच्या वस्तूंचेर, 30 टक्के गरजांचेर आनी उरिल्ले 20 टक्के बचतीचेर खर्च करपाक जाय. हो नेम एलिझाबेथ वॉरेनाच्या तत्वाचेर आदारिल्लो आसा. एलिझाबेथ वॉरेन ही अमेरिकन राजकारणी आनी आदली कायद्याची प्राध्यापिका. ताच्या तत्वा प्रमाण कर वजा उपरांत पयशे सांठोवपाची रणनीती 50/ 30/ 20 आसूंक जाय. कर भरून ताचें उत्पन्न एक लाख रुपया जाल्यार म्हयन्याक 20 हजार रुपया वाचोवंक मेळटा. दर म्हयन्याक खूब शिस्तबद्धपणान बचत केल्यार वर्साचे अखेरेक 2 लाख 40 हजार रुपया मुजत ठेव मेळप शक्य आसा.

आयचो युग डिजिटल. ह्या युगांत वैयक्तीक रीण, क्रेडीट कार्ड आनी “पे लेटर” येवजण्यो लेगीत मेळटात. अशा वेळार मनाचेर नियंत्रण दवरप आनी शिस्त सांबाळप कठीण जाता. अशा वेळार रिणाची नियोजन रणनिती वापरची पडटा. म्हणल्यार व्याजदरांची तुळा करप, वाटाघाटी करप आनी कृती आराखडो थारावप सारकिल्ल्यो सादी गजाली मान्य रिपेमेंट सुनिश्चीत करपा खातीर करूं येतात.

एकदां बजेट तयार जाले उपरांत ताचेर दसून रावप खूब गरजेचें. बचतीचीय येवजण करची. ते खातीर सांठयल्ल्या पयशांनी म्युच्युअल फंड, शेअर मार्केट, रियल इस्टेट ह्या येवजण्यांनी गुंतवणूक करपाक जाय. तुमची बचत परतून गुंतवणूक करप ही फकत बरी कल्पना न्हय तर व्याज वा लाभांश मेळोवपाची तुमची तांक वाडयता. अर्थीक पोर्टफोलियो तयार करतना विमो आनी टर्म-प्लान जोडपाक उणें म्हत्व दितात. पूण तशें करुं नाका. जिणेचो आनी वैजकी उपचाराचो वाडत आशिल्लो खर्च पळयल्यार आपल्या जिणे पद्दतीक फावो असो विमो मेळोवप ही काळाची गरज.

अर्थसंकल्प तयार करप, रिण फारीक करपाक प्राधान्य दिवप, वाजवी बचत, गुंतवणूक विविधताय आनी विमो हें खूब म्हत्वाचें. खंयच्याय पिरायेचेर वा जिणेच्या पांवड्यार बऱ्या फुडारा खातीर पयशे सांठोवप सदांच बरें. ह्या पांच मुळाव्या अर्थीक संवयांचो आस्पाव केल्यार तरणाटे, वेवसायीक आनी निवृत्त जाल्ल्या लोकांक एक घटमूट अर्थीक बुन्याद तयार करपाक मदत जावंक शकता. ह्या पावलांक लागून फुडल्या वर्सांनी दरेकल्याक चड अर्थीक सुरक्षीतताय आनी समृद्धी मेळटली.

– 

बिभू प्रसाद मोहपात्रा, 

कार्यकारी संचालक, 

पंजाब नॅशनल बँक