भांगरभूंय | प्रतिनिधी
अायज संवसारांत जांचे पांय धरचे अशें पांय मेळनात. जर मेळ्ळेच जाल्यार ते धरल्यार कितें चुकलें, अशें 35 वर्सां पयलीं साहित्यीक पु. ल. देशपांडे हांणी म्हणिल्लें. हाचो अर्थ, आदर्श घेवचो अश्यो व्यक्ती आयज खूब उण्यो जाल्यात. सगल्यांचेच पांय मातयेचे, हेंवूय कालांतरान दिसून येता… आनी आयज मनीस जांचो आदर्श घेवपाक जायना, जांचें अनुकरण करपाक जायना, नेमकें तांचेंच अनुकरण करतना दिसता. सरकारी मळाचेर तर हें प्रकर्शान जाणवता. अर्थांत सगलेच लोक तशे नात. पूण, चडशे आसात. तांकां सुवार्था बगर दुसरें कांयच दिसना. ‘तो खायना, मागीर आमी इल्लें खाल्यार कितें जाता’, ही तांची मानसीकताय. आयच्या संवसाराचो नेम- सांपडटा तो चोर, उरिल्ले सगले साव!
दोन दिसां पयलीं लोकसभा वेंचणुकेचे फाटभुंयेर दिल्लींतल्या दोगां वेवसायिकांक 16 लाख रुपयांक फटोवपी दोन सरकारी कर्मचाऱ्यांक आनी तांच्या दोग इश्टांक पयर अटक जाल्या. तातूंतल्या सरकारी कर्मचाऱ्यांक निलंबीत केल्यात. आपूण आयकर अधिकारी आशिल्ल्याचें सांगून तांणी वेवसायिकांक आडायले आनी तांचे पयशे जप्त केले. कालूय दोन पुलिसांकूय ह्या प्रकरणांत निलंबीत केल्यात. वेर्णें पुलिसांनी काल सांजमेरेन आठ लाख रुपया जप्तूय केल्ले. हातूंतल्या कांय जाणांक वेंचणूक भरारी पंगडांत नेमिल्ले. एकलो पालिकेंत अभियंतो आसा. स जाणांक अटक केल्या, हाचो अर्थ सगल्यांनी मेळून हें कर्म केलां आसतलें. तपासा उपरांत सत्य भायर सरतलेंच. पूण, जांकां तळें राखून दिलां, तांणीच उदक विकपाचो हो यत्न. आयकर अधिकारी अशें सांगून भरारी पंगडान रक्कम जप्त केल्या, अशें त्या वेवसायिकाचे कागाळे उपरांत कळ्ळें. पूण, पयशे खंय गेले तें समजलें ना. तांकां पांय फुटिल्ले. मागीर आयकर विभागान पुलिसांक कळयलें. पयशे खंय आसात, तें पळोवपाक सांगलें. पुलिसांनी वेंचणूक अधिकाऱ्यांक विचारलें. तांकां कागाळेंत दाबोळी भरारी पंगडांतल्या दोगांनी पयशे घेतल्यात अशी नोंद आसा तें कळ्ळें. थळाव्या पुलिसांक चवकशीचे आदेश दितकच तांकां ह्या पंगडांत कोण आशिल्ले ताची म्हायती मेळ्ळी. पूण सगल्यांनी हात वयर केले. आमकां मोटारींतल्यान कोण तरी व्हडली रक्कम घेवन येता, असो संदेश मेळिल्लो. पूण, मोटार आडावन तपास केलो तेन्ना रोख रक्कम मेळूंक ना, अशी फटास मारली. उपरांत तांणी उलट- सुलट जापो दिल्यो. ताचे वयल्यान पुलिसांक ते फट उलयतात, तें कळ्ळें. बॅगांत पयशे न्हय, सोरो मेळ्ळो, अशीय जाप मुखेल दुबावितान दिली. अभियंत्यान आपूण हांगां येवंकूच ना, अशें हड्ड्यार हात दवरून सांगलें. पूण सीसीटीव्ही कॅमेऱ्यांत तो सांपडलो आनी सगलें प्रकरण भायर सरलें. पयश्यां खातीर मनीस खंयच्या पांवड्यार पावता, ताचें हें जिवें उदाहरण.
ह्या प्रकरणाचो बारीकसाणेन सोक्षमोक्ष लावपाची गरज आसा. कारण, दुसरे कडेन खंय अशेंच चलता जाल्यार तें बंद जातलें. रातचे नोटी घेवन हेडप्यांनीय विचार करचो. आपले कडेन पयशांची रिसीट, हिशोब दवरचो. हे दीस वेंचणुकांचे. मतदारांक पयशे वांटपाक कांय वावुरपी हेडपाक लागल्यात. मतदानाच्या चार दीस पयलीं पांयांक रोंदां लावन ते भोंवतले. बरेच मतदारूय उक्तेपणी मता फाटल्यान पांच, धा हजार मागतात. सोऱ्याच्योय न्हंयो व्हांवतल्यो. तेन्ना शक्य आसा त्या वेवसायिकांनी कायदेशीर म्हालूच व्हरचो. रातचे दुबावीत रितीन फिरचे न्हय.
आयज जो तो खंय हात मारपाक मेळटलो, तेंच पळयता. म्हयन्याक 50, 60 हजार रुपया पगार आशिल्ली व्यक्ती पसून चुकीच्या मार्गाक लागता हाका कितें म्हणपाचें? कांय जाण खंय भायर हात मारून मेळटात, त्या पयश्यांचेर सुसेगाद जगतात. बँकेंत जमा जावपी पगाराक हात पसून लावपाची तांकां गरज पडना खंय. हाचे वयल्यान वाचप्यांनी कितें तो अदमास काडचो. लोकांचीं कामां फटाफट केलीं, तांकां मजत केली… अशें करपी थोडेच आसात. उरिल्ले कार्यालयांत कामाक लागून आयिल्ल्या लोकांक तुच्छ वागणूक दितात. जणू काय तो आपल्या भाटांत काम करपी मानायूच! मतदानाक अजून म्हयनो आसा. तो मेरेन हे पयशे जप्त करपाचे, सोरो जप्त करपाचे काम नेटान चलतलें, पूण जें कितें मेळटा, तें कायदेशीर मार्गान सरकारी यंत्रणां कडेन पावपाक जाय. जप्त केलां तें बेकायदेशीर ना, जाल्यार तें संबंदीत व्यक्तींक परत मेळपाक जाय. इतली तरी पारदर्शकताय सरकारी यंत्रणांनी दवरल्यार बरी!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
