भांगरभूंय | प्रतिनिधी
पणजी : आंबेडें- नगरगांवच्या श्रवण देविदास बर्वे खून प्रकरणांत वाळपय पुलिसांच्या तपासाक वेग आयला. शुक्रारा ह्या प्रकरणांत वासुदेव ओझरेंकार (४२, आंबेडे- नगरगांव) हाका अटक केली. शेनवारा रातीं श्रवणाचो बापूय आनी भावाकूय अटक केली. वासुदेवाचे मजतीन श्रवणाचो गळो अंदुंन खून केल्ल्याचें पुलीस तपासांत स्पश्ट जालें. मजगतीं ह्या प्रकरणांत आनीकूय कांय गजाली उक्तडार येवं शकतात, अशें उत्तर गोंय पुलीस अधीक्षक अक्षत कौशल हांणी सांगलें. संपत्ती संबंदी वाद आनी हेर गजालींचे फाटभूंयेर पुलीस तपास करतात. दरेके गजालीचो बारकायेन अभ्यास करतात, अशेंय तांणी सांगलें.
पुलिसांक श्रवणाच्या दुबावीत मरणाची खबर मेळ्ळे उपरांत फॉरेन्सिक टिमीक संपर्क केलो. वाळपय पुलिसांनी गुन्यांव नोंद करून तपास सुरू केलो. ह्या प्रकरणाचो तपास करपा खातीर एक पंगड स्थापन केलो. श्रवणाच्या दुबावीत मरणा उपरांत शुक्रारा सांजेवेळार पुलिसांनी १८ जाणांक ताब्यांत घेतिल्ले. मात, थळाव्यांक बळयां ह्या प्रकरणांत घुस्पावपाचो यत्न पुलीस करतात असो आरोप करून सुमार १०० ग्रामस्थांनी वाळपय पुलीस स्टेशनाक धडक दिल्ली. ग्रामस्थांनी ताब्यांत घेतिल्ल्यांक बेगोबेग सोडपाची मागणी केल्ली. उपरांत पुलिसांनी १५ जाणांक मुक्त केल्ले. उरिल्ल्या तिगांक पुलीस फुडले चवकशे खातीर पर्वरे घेवन गेल्ले. हातुंतल्या दोगांक सोडले. वासुदेवाचे चवकशे मजगतीं ताणेंच खून केल्ल्याचो दुबाव आयलो म्हूण ताका बंदखणेंत दवरलो.
पुलिसांनी दिल्ले म्हायती प्रमाण, वासुदेवान देविदास बर्वे आनी उदय बर्वे हांचे वांगडा १३ तारखेर कट रचलो, असो दुबाव आसा. तपासा मजगतीं, वाळपय पुलीस स्टेशनांत श्रवणा आड बापायक मारपेट केल्ल्याचे ५ गुन्यांव नोंद आशिल्ल्याचें मुखार आयलां. हातुंतल्या एका प्रकरणांत ताका अटकूय जाल्ली.
फाटल्या पांच वर्सां सावन श्रवण घरच्यां पसून वेगळो रावतालो. ताचे कुटुंबा कडेन बरे संबंद नाशिल्ले, हेंय पुलिसांच्या तपासा वेळार स्पश्ट जालें. श्रवण आंबेडें रावतालो. जायार ताचें कुटूंब होंडा- सत्तरी रावतालें. ताचो बापूय ताका केन्नाय मेळपाक वतालो. तो स्वता वेगळो रावतालो काय ताच्या कुटुंबान ताका वेगळो केल्लो, हो प्रस्न आशिल्ल्याचें कौशल हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
