भांगरभूंय | प्रतिनिधी
मयें मतदारसंघांत ५० कोटींच्या उदरगतीच्या येवजण्यांची बुन्याद
दिवचल: भारतीय जनता पक्षाक लागूनच आयज मयेंच्या लोकांक पुरायेन स्वातंत्र्य मेळ्ळां. तशेंच सुविधा मेळून मालकी हक्कूय दिल्यात. सरकारी जमनीर दर्जेदार प्रकल्प आयल्यार ताका विरोध करपाची प्रवृत्ती येवपी पिळगे खातीर घातकी आसा. हाका लागून गांवच्या बर्या खातीर बर्या प्रकल्पांक ग्रामस्थांनी सहकार्य करचें. सरकार पुरायेन जनतेच्या फाटल्यान आशिल्ल्यान सेगीत उदरगत करपाचें काम चालू आसा, अशें मुख्यमंत्री डॉ. प्रमोद सावंत हांणी सांगलें.
मयां मतदारसंघांत सुमार ५० कोटी रुपया खर्च करून कृषी, वीज, पर्यटन मळार, तशेंच पुरायेन उदरगतीच्या वाठारांत ५० कोटी रुपया खर्चून विंगड विंगड येवजण्यो चालीक लायतले. मुख्यमंत्र्यांनी डिजिटल पद्धतीन बुन्यादी फातर मयें पंचायत सभाघराञत उबारलो. ह्या वेळार आमदार प्रेमेन्द्र शेट, सरपंच कृष्णा चोडणकार, जिल्लो पंचायत अध्यक्ष शंकर चोडणकार, महेश सावंत, उत्तर गोंय भाजप अध्यक्ष दयानंद कारबोटकार, मंडळ समिती पदाधिकारी, विवीध पंचायतीचे सरपंच, पंचायत वांगडी, भाजप पदाधिकारी, ग्रामस्थ आनी कार्यकर्ते हजर आशिल्ले.
मयें मतदार संघ हो एक गांवगिरो मतदारसंघ जरी आसलो तरी हांगचो पांचवो सैम संवसाराक भुलयता.हाका लागून शेती बागायती, दूद उत्पादन मळार नवे पिळगेन वेगान वैभव मेळोवन दिवपा खातीर विशे यत्न करचे. सरकार हे खातीर सगळे तरेचें सहकार्य दिवपाक बांदील आशिल्ल्याचें तांणी सांगलें.
पर्यटन वाठाराच्या नांवान संवसाराच्या नकाशाचेर पाविल्ल्या मयें गांवाक नवी दिका दिवपा खातीर आनी नवे पिळगेच्या बर्या फुडारा खातीर मयें गांवांत सरकारी जमनींत आंतरराष्ट्रीय दर्जाचें कायदो महाविद्यालय आनी हेर प्रकल्प राबोवपाचो सरकाराचो संकल्प आसा. हाका थळाव्यांनी जर सहकार्य करूंक ना जाल्यार गांवची उदरगत जातली तरी कशी? असो प्रस्न हजर करतना कॉंग्रेस तशेंच गोवा फॉरवर्ड हे राजकारण करून दिशाभूल केल्ल्यान ताचे पसून सांबाळून रावात अशी शिटकावणी दितना, अशे तरेचो विरोध करपी मनोवृत्ती विशीं मुख्यमंत्र्यांनी तिडक उक्तायली.
कांय दिसां पयलीं ह्या प्रकल्पा खातीर बसका घेवन विरोध केल्ल्यान मुख्यमंत्री आयचे कार्यावळींत बरेच तिडकले. गोवा फॉरवर्ड आनी कॉंग्रेसीन कितें दिवे लायले? हें सगळ्यांक खबर आसा, अशी टिका तांणी केली.
मयें लोकांक खरें स्वातंत्र्य दिवपा खातीरी भारतीय जनता पक्षाचें डबल इंजिन सरकार सेगीत कार्यरत आसा. कायदेशीर प्रक्रिया पुराय केल्ल्यांक सनदी दिल्यात. शेती आनी हेर विशींच्यो सनदीय मेळटल्यो.
नव्या प्रकल्पा वरवीं दर्जेदार शिक्षण आनी संवसारीक पांवड्यार उडी मारपाची संद युवा पिळगेक मेळटली. हाका लागून विरोध करपाची मनोवृत्ती सोडून दियात आनी सरकाराची उदरगत प्रक्रियेक सहकार्य करीत गावाचें बरें लक्षांत दवरात असो उलो मुख्यमंत्र्यान मारलो. पर्यटनाच्या नांवान पांचवेंचार आनी शुद्ध हवा, रम्य निसर्ग पळोवपा खातीर संवसारांतले लोक गोंयां कडेन आकर्शीत जातात. हें गोंय पांचवेंचार दवरपा खातीर सगल्यांनी योगदान दिवप गरजेचें. नितळसाण राखात अशें मुख्यमंत्र्यानी स्पश्ट केलें.
दरेक मतदारसंघांत ५००, ५०० कोटीं परस चड उदरगतीच्यो येवजण्यो डबल इंजिन सरकार राबयता. हाका लागून बर्या गजालींक ग्रामस्थांचें सहकार्य अपेक्षीत आसा. सहकार्य केल्यार जायते बरे प्रकल्प हाडून दरेका मतदारसंघाचो कायापालट करप शक्य आशिल्ल्याचें मुख्यमंत्र्यांनी ह्या वेळार स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
