भांगरभूंय | प्रतिनिधी
पुणे, खबरां संस्था : फाटल्या कांय दिसांनी मनशाक बर्ड फ्लू संसर्ग जावपाच्यो घडणुको उजवाडाक आयल्यांत. अस्तंत बंगालांत अंदूं जून म्हयन्यांत चार वर्सां पिरायेचे चलयेक बर्ड फ्लू जालो. मनशा खातीर बर्ड फ्लूचो धोको वाडत गेल्ल्यान हो संसर्ग जावचो न्हय म्हणून एक वासीन तयार केलां. तिची क्लिनीकल ट्रायल बेगीनूच जातली.
संवसारीक भलायकी संघटना आनी ‘मेडिसीन्स पेंटट पूल’ (एमपीपी) ह्या संस्थांच्या जोड पालवान एमआरएनए तंत्रज्ञान हस्तांतर उपक्रम चालीक लायतात. उण्या उत्पन्नाच्या आनी मध्यम उत्पन्नाच्या देशां खातीर ‘एमआरएनए’ आदारीत वासीन तयार करता. ह्या उपक्रमांतल्यान ‘सिनर्जियम बायोटेक’ कंपनीन मनशां खातीर बर्ड फ्लूचें वासीन तयार केलां. आतां ताची वैजकी चांचणी सुरू जातली. ती येसस्वी जाले उपरांत वासिनाचें तंत्रज्ञान हेर उत्पादक भागीदारांक दितले. तांतल्यान व्यापक पांवड्यार हें वासीन मेळटलें.
हे संबंदी संवसारीक भलायकी संघटनेचे महासंचालक डॉ. टेडरॉस ऍडहनोम घेब्रेयेसिस हांणी सांगलें : उण्या आनी मध्यम उत्पन्नाच्या देशां खातीर ‘एमआरएनए’ तंत्रज्ञानाचेर आदारिल्ल्या वासिनाचें संशोधन, विकास आनी उत्पादन करपा खातीर परस्पर सहकार्याचेर भर दिता. हाका लागून फुडाराक व्हडली धाम पातळटली तेन्ना हे देश ताका सक्षमपणान तोंड दिवंक शकतले. फुडल्या संकश्टांक तोंड दिवपाची तयारी हे पद्दतीन खूब प्रभावीपणान करूं येता.
फुडाराक म्हासाथीचें संकश्ट
बर्ड फ्लू हो भलायकेक व्हड धोको जाला. सुकणीं आनी जनावरां मदीं ताचो व्हड प्रमाणांत प्रसार जाता. संसर्ग जाल्ल्या सुकण्यांच्या आनी जनावरांच्या संपर्कांत येवपी लोकांचेर आतां ताचो परिणाम जावपाक लागला. हाका लागून फुडाराक ह्या दुयेंसांचो व्हड हुंवार येतलो असो अदमास आसा. हाका लागून संवसारीक भलायकी संघटनेन पयलींच ही म्हामारी हाताळपा खातीर पावलां उबारल्यांत. तातूंतल्यान बर्ड फ्लूचें वासीन तयार केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
