भांगरभूंय | प्रतिनिधी
डेहराडून, खबरां संस्था ः बर्ड फ्लू (H5N1) चो धोको वाडत आसा. H5N1 फ्लू संबंदी उत्तराखंडांत अर्लट जारी केला. केरळांतय हो व्हायरस नेटान पातळत आसा. एव्हियन इन्फ्लूएंझा (H5N1) व्हायरस सगळ्या तरांच्या सुकण्यांच्या जातींक पातळूंक शकता. केरळांत बदकांत एव्हियन इन्फ्लूएंझा व्हायरस मेळ्ळे उपरांत उत्तराखंडांतय अलर्ट जारी केला. केरळांत आतां मेरेन तीन हजारां परस चड सुकण्यांक मरण आयलां.
पशुपालन संचालनालयान सगल्या जिल्ह्यांतल्या पशुवैजकांक सुकण्यांक असामान्य मरण आयले जाल्यार तांचे नमुने भोपाळांतल्या उच्च सुरक्षा पशु रोग प्रयोगशाळेंत धाडपाचे निर्देश दिला. तशेंच राज्यभरांतल्या स्थलांतरीत सुकण्यांचेर पशुपालन खातें नदर दवरुन आसा.
उत्तराखंडांत सुकण्यांचे नमुने तपासतले
उत्तराखंडांत सुकण्यांचे नमुने घेवन तांची तपासणी जातली. राज्यांतल्या 13 जिल्ह्यांतल्यान वेगवेगळ्या सुकण्यांचे 50-50 नमुने घेतले. राज्यांतल्या सगल्या जिल्ह्यांनी हाजीर आशिल्ल्या सुकण्यांचे सेरो सॅम्पलिंग जातले. नमुने घेतले उपरांत सुकण्यांच्या कुडींत अँटीबॉडीज तयार जाता काय ना तें पळयतले.
अमेरिकेंत गायींक बर्ड फ्लू
अमेरिकेंत H5N1 फ्लूक लागून दूद वेवसायाक लुकसाण जाला. अमेरिकेंत गायांक बर्ड फ्लूची लागण जाल्या. अमेरिकेंतल्या 9 राज्यांतल्या 36 गायांक बर्ड फ्लूची लागण जाल्या. अशें परिस्थितींत अमेरिकेच्या अन्न आनी वखदां प्रशासनान दुदाच्या नमुन्यांची चांचणी करपाचो निर्णय घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
