बर्च बाय रोमिओ लेन प्रकरणी उच्च न्यायालयान घेतली स्वेच्छा दखल

भांगरभूंय | प्रतिनिधी

अॅड. डिसाची अॅमिकस क्युरी म्हूण नेमणूक

भांगरभूंय।प्रतिनिधी
पणजी : बर्च बाय रोमिओ लेन क्लबाक लागिल्ल्या उजो प्रकरणाची गोंयातल्या मुंबय उच्च न्यायालयान स्वेच्छा याचिका दाखल करून दखल घेतल्या. हे याचिकेत उच्च न्यायालयाक आवश्यक ती म्हायती दिवपा खातीर अॅड. रोहित ब्राझ डिसा हांची अॅमिकस क्युरी म्हूण नेमणूक केल्या. हे याचिकेचेर 8 जानेवारी 2026 दिसा फुडली सुनावणी जातली.
वेवसायिक बांदकामा आनी ती मोडपाचेर दिल्या स्थगितीचो विशय आता उच्च न्यायालयात पावला. बर्च बाय रोमिओ लेन क्लबच्या जमिनीसंबंदी प्रदीप घाडी आमोणकार हांणी उच्च न्यायालयात याचिका घाली. हे याचिकेचेर सुनावणीवेळार व्यावसायिक बांदकामांक दिल्ले स्थगितीचेर लेगीत चर्चा जाली. बेकायदा बांदकामां आनी ताचे परिणामाविशी उच्च न्यायालयान हुस्को उक्तायलो. हाका लागून न्यायालयान स्वेच्छा याचिका दाखल करून घेतली.
बर्च बाय रोमिओ लेन क्लबाक शनवारा 6 डिसेंबराक उजो लागून 25 जाणाक मरण आयलें. हे दुर्घटनेची दंडाधिकाऱ्यामार्फत चवकशी सुरू आसा. दंडाधिकाऱ्यानी जमिनीच्या कागदपत्रां संबंदी प्रदीप घाडी आमोणकार, सुनील दिवकार या दोगांची चवकशी केल्या. चवकशी सुरू आसताना प्रदीप घाडी आमोणकार हांणी गोंयातल्या मुंबय उच्च न्यायालयात चवकशेची मागणी करपी याचिका घाली. हे याचिकेचेर आयज न्यायमुर्ती सारंग कोटवाल आनी न्यायमुर्ती आशिश चव्हाण हांचे खंडपीठामुखार सुनावणी जाली. राज्यात वेवसायिक बांदकामांचे प्रमाण वाडत आसा. बर्च बाय रोमिओ लेन दुर्घटने उपरांत सरकारान समिती स्थापन करून क्लब, रेस्टॉरंटा, हॉटेल्स हांचे परवान्यांची तपासणी सुरू केल्या. परवाने नाशिल्ल्या दियाज (हणजूण), सीओ2 (वागातोर) या क्लबांक सील ठोकले. पंचायतीन मोडपाचे आदेश दिवन लेगीत पंचायत संचालनालयान आदेशाक स्थगिती दिल्यान कारवाय जावंक पावली ना. सुनावणीवेळार हो विशय चर्चेक आयलो आनी उच्च न्यायालयान स्वेच्छा याचिका दाखल करून घेतली.