बर्च : बसके उपरांत फुडलो निर्णय

भांगरभूंय | प्रतिनिधी

मुख्यमंत्री आयज घेतले उंचेल्या पावंड्या वयली बसका

हेर संबंदीत अधिकारी लेगीत सरकाराच्या रडाराचेर

परवाने दिवपी अधिकारी अहवालाक लागून संकश्टांत

भांगरभूंय । प्रतिनिधी

पणजी : बर्च बाय रोमियो लेन क्लब दुर्घटणे प्रकरणांत दंडाधिकाऱ्यांचे चवकशी अहवालाचेर मुख्यमंत्री आयज उंचेल्या पावंड्याचेर बसका घेतले. अहवालांतलो निश्कर्श आनी शिफारशींचेर अधिकाऱ्यां कडेन बसका घेवन फुडलो निर्णय जातलो, अशी म्हायती मुख्यमंत्री डॉ. प्रमोद सावंत हांणी दिली.

बर्च बाय रोमियो लेन क्लबाक 6 डिसेंबरच्या रातीं उजो लागलो. ह्या उज्यांत कर्मचारी आनी पर्यटकां सयत 25 जाणांक मरण आयलें. हाचे उपरांत 8 डिसेंबराक सरकारान दंडाधिकाऱ्यांच्या फुडारपणा खाला चवकशी समिती स्थापन केली. उत्तर गोंयचे जिल्होधिकारी अंकीत यादव हे चवकशी समितीचे अध्यक्ष आशिल्ले. दक्षीण गोंयचे पुलीस अधिक्षक टिकमसिंग वर्मा, फोरेन्सीक सायन्स खात्याचे संचालक आशुतोष आपटे आनी उजो पालोवपी दळाचे उपसंचालक राजेंद्र हळदणकार हे हेर वांगडी आशिल्ले. समितीन मंगळार 23 डिसेंबराक सरकाराक अहवाल सादर केलो. अहवालांत पंचायत संचालनालया सयत हेर खातीं तशेच अधिकाऱ्यांचेर बडी मारल्या. ह्या अहवालाचेर सरकार कितें निर्णय घेता, ते विशीं उमळशीक आसा. अहवालाचेर मुख्यमंत्री डॉ. प्रमोद सावंत हांणी मात अजून मेरेन भाश्य करूंक ना. अहवालांत दरेकी खात्यां खातीर तरेकवार शिफारशी आसात. हाका लागून अधिकाऱ्यां कडेन पयलीं आपूण बसकेंत चर्चा करतलो. अहवाल समजून घेतले उपरांतूच भाश्य करतलो, अशें मुख्यमंत्र्यांनी सांगलें.

बर्च दुर्घटणा घडले उपरांत जिल्हो पंचायत वेंचणूक जाली. ताचे पयलीं मुख्यमंत्र्यां सयत सगळे मंत्री प्रचारांत व्यग्र आशिल्ले. समितीन अहवाल सादर केले उपरांत नातलाची धूम आशिल्ली. हाचे उपरांत मुख्यमंत्र्यांनी सोमारा दिल्ली वचून नव्या कार्यकारी अध्यक्षांची भेट घेतली. हाका लागून अहवाल सादर जाल्या उपरांत ताचे विशीं निर्णय घेवपाक मुख्यमंत्र्यांक वेळ मेळूंक ना.

कागदपत्रांची तपासणी तशेंच प्रत्यक्ष पळोवणी करिनासतानाच खात्यांनी परवाने दिल्या. पंचायत संचालनालया सयत प्रदुशण नियंत्रण मंडळ तशेंच हेर संबंदीत खात्यांचेर अहवालात फोग काडला.

पंचायतींन दिल्ल्या वेपारी परवान्याचेर आदारीत हेर सगळ्या खात्यांनी तरेकवार परवाने दिले. हे परवाने दिवंक नाशिल्ले जाल्यार क्लबांतल्यो कार्यावळी पयलीच बंद जातल्यो आशिल्ल्यो. पंचायत खात्यां सयत हेर खात्यांनी कागदपत्रांची तपासणी करूंक ना. परवाने रद्द करपाची कारवाय करूंक ना, हे खातीर खात्यांचेर फोग काडला.

हे दुर्घटणे उपरांत सरकारान तेन्नाच्यो पंचायत संचालक सिद्धी हळर्णकार, प्रदुशण नियंत्रण मंडळाच्यो तेन्नाच्यो वांगडी सचीव शमिला मोंतेरो आनी हडफडे पंचायतीचे तेन्नाचे सचीव रघुवीर बागकार हांकां निलंबीत केले. आतां अहवाल सादर जाल्ल्यान हेर संबंदीत अधिकारी लेगीत सरकाराच्या रडाराचेर आसा.

चवकशी समितीन बर्च बाय रोमियो लेन क्लबाची पळोवणी करून सीसीटीव्ही फुटेज ताब्यांत घेतली. तेन्नाच्यो पंचायत संचालक सिद्धी हळर्णकार, प्रदुशण नियंत्रण मंडळाच्यो तेन्नाच्यो वांगडी सचीव शमिला मोंतेरो, हडफडेंचे तेन्नाचे पंचायत सचीव रघुवीर बागकार हांचे सयत जमनीचो धनी प्रदीप घाडी आमोणकार हांच्यो जबान्यो चवकशी समितीन घेतल्यो. बनावट सेल डीडच्या आदारान लुथरा भावांनी कांय परवाने घेतल्यात. सेल डीडाची लेगीत अधिकाऱ्यांनी सारकी पळोवणी करूंक ना. ह्या अहवालाक लागून तेन्नाच्या पंचायत संचालकां सयत हेर परवाने दिवपी अधिकारी संकश्टांत सांपडल्यात. बर्च बाय रोमिओ लेन दुर्घटणे प्रकरणी हणजूण पुलिसांनी गुन्याव नोंद केला. क्लबाचे धनी गौरव लुथरा आनी सौरभ लुथरा सयत क्लबाच्या अधिकाऱ्यांक अटक केल्या. गुन्यांव प्रकरणांत हणजूण पुलिसां कडल्यान तपास सुरू आसा. हो तपास अजून पुराय जावंक ना.