भांगरभूंय | प्रतिनिधी
दंडाधिकारी चवकशी अहवालांतलो निश्कर्श
भांगरभूंय । प्रतिनिधी
पणजी : बर्च बाय रोमियो क्लब आशिल्ल्या सर्वे नंबर 158/0 आनी 159/0 ह्या जमनीचेर 1998-1999 त सुनील दिवकार आनी प्रदीप आमोणकार हांणी मेझन हॉटेला खातीर बेकायदो बांदकाम केलें. बेकायदो बांदकाम प्रकरणांत हेच मुखेल दोशी आसात, असो निश्कर्श दंडाधिकाऱ्यांच्या अहवालांत आसा. शेतजमनीचें रूपांतरण करपा सयत बेकायदो पद्दतीन मिठागराच्या जाग्याचेर बांदकाम जालें. हें भूमहसूल कायद्याच्या कलम 32चें उल्लंघन थारता, अशें अहवालांत म्हणलां.
हडफडें पंचायतीचे तेन्नाचे सरपंच रोशन रेडकार आनी पंचायत सचीव रघुवीर बागकार हांकां परवान्या खातीर दोशी थारावन अहवालांत कारवायेची शिफारस केल्या.
बर्च बाय रोमियो लेन क्लबाक उजो लागून 25 जाणांक मरण आयलें. दुर्घटणेचे चवकशे खातीर सरकारान अंकीत यादव हांच्या फुडारपणा खाला दंडाधिकारी चवकशी समिती स्थापन केल्ली. हे समितीन अहवाल सादर केलो. ह्या अहवालाचे कार्यवाही संबंदांत मुख्यमंत्री डॉ. प्रमोद सावंत हांणी अधिकाऱ्यांची बसका घेवन कारवाय करपाचे निर्देश दिल्यात.
मुळावें बेकायदो बांदकाम सुनील दिवकार आनी प्रदीप आमोणकार हांच्या हडफडेंचे कोर्दिनिचो आगोर हे सर्वे नंबर 158/0 आनी 159/0 जमनी भोंवतणी मिठागरां (सॉल्ट पॅन्स) आशिल्लीं. सिल्वेरा कुटुंबान ही जमीन 1986 ते 1988 त अनिल मडगांवकार आनी ख्रिस्टीन मडगांवकार हांकां विकलीं. उपरांत ही जमीन तांणी सुनील दिवकार आनी प्रदीप आमोणकार हांकां 1995 त हस्तांतरीत केली. हाचे उपरांत पंचायती कडल्यान परवाने घेतले उपरांत 1998- 1999 त मेझन हॉटेलाचें बांदकाम जालें.
बार्र, रेस्टॉरंण्ट आनी नायट क्लब चलोवपा खातीर हडफडें नागवा पंचायतीन 16 डिसेंबर 2023 ह्या दिसा सुरिंदर कुमार खोसला हांकां वेपारी परवानो दिलो. हो परवानो 31 मार्च 2024 ह्या दिसा सोंपलो. परवानो सोपले उपरांत ताचें नुतनीकरण करूंक ना. वेपारी परवानो नासतना क्लब सुरू आशिल्लो. पंचायतीन क्लब सील करपाची कारवाय करूंक ना. हाचे खातीर तेन्नाचे सरपंच तशेंच सचीव दोशी थारता.
वेपारी परवान्याची मुजत सोंपल्या उपरांत लेगीत क्लब सील केलो ना वा हेर खात्यांक हांवें कळयलें ना, हे पंचायत सचिवान जबानी वेळार सांगलें.
पंचायतीन क्लब सील करूंक ना वा परवाने निलंबीत करपा विशीं संबंदीत खात्यांक कळोवंक ना, अशें सरपंचान लेगीत जबानींत सांगलें.
घर नंबर वा वेपार परवानो दितना पंचायत सचिवान जाग्याची पळोवणी करूंक ना. वेपारी परवानो दितना सोपस्कार लेगीत सारके करूंक नात, अशें अहवालांत म्हणलां. तशेंच वीज तशेंच उदकाचे जोडणे खातीर बेकायदा बांदकाम आसून लेगीत एनओसी दिल्ल्याचें स्पश्ट जाता.
बर्च बाय रोमिओ लेन क्लबाक आपत्कालीन एक्झीट, सुरक्षा यंत्रणा वा उजो पालोवपी यंत्रणा नाशिल्ली. तशेंच अबकारी वा हेर परवाने बनावट कागदपत्रांच्या आदारान घेतिल्ल्याचें अहवालांत म्हणलां. अबकारी खात्याक परवान्या खातीर सादर केल्लें अजय गुप्ता हाचें पुलीस क्लिअरन्स प्रमाणपत्र लेगीत बनावट आसा, अशें अहवालांत म्हणला.
अहवाला उपरांत मुख्यमंत्र्यांनी दिल्ले निर्देश
– योग्य तरेन परवानो दिवंक नाशिल्ल्यान पंचायत सचिवाचेर फौजदारी कारवाय करची
– सोपस्कार करिनासतना एनओसी दिवपा खातीर सरपंचांचेर कारवाय करची
– जमीन रुपांतरणाची महसूल सचिवान चवकशी करची
– एनओसी दिवपाची शिफारस करपी प्रदुशण नियंत्रण मंडळाच्या अधिकाऱ्यांक निलंबीत करचे
– उजो पालोवपी दळ, पुलीस, वीज, एफडीए, पर्यटन, वेवसायीक शुल्क अधिकाऱ्यांक कारणां दाखय नोटीस दिवची
– जिवीत हानी आनी लुकसाण भरपाय दिवपा खातीर मजूर आनी रोजगार खात्याक निर्देश दिवचे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
