भांगरभूंय | प्रतिनिधी
उच्च न्यायालयाचे स्वेच्छा दखल याचिकेची आयज सुनावणी
गोंयच्या हिता खातीर मूळ कारणां मेरेन वचून उपाय येवजण करतले
गोंयांतल्या बेकायदो बांदकामाचेर खर कारवाय करपाचो सरकाराचो हावेस
भांगरभूंय । प्रतिनिधी
पणजी : हडफडेंच्या बर्च बाय रोमियो लेन क्लब उज्याचें प्रकरण गोंयांतल्या मुंबय उच्च न्यायालयान गंभीरपणान घेतलां. गोंयच्या हिता खातीर मूळ कारणां मेरेन वचून योग्य उपाय येवजण करतलें. तशेंच बेकायदोपणाक राखण दिवपी शक्ती उद्ध्वस्त करप गरजेचें आसा, अशें निरिक्षण न्या. सुमन श्याम आनी न्या. अमीत जामसंडेकर ह्या दोन वांगड्यांच्या न्यायपिठान नोंद केलें. मजगतीं, वयले दुर्घटणे संबंदांत स्वेच्छा दखल याचिकेची सुनावणी मंगळारा 13 जानेवारीक दवरल्या.
6 डिसेंबराक जाल्ल्या हडफडेंच्या बर्च बाय रोमियो लेन क्लबा मदल्या भिरांकूळ उज्यांत 25 जाणांक मरण आयिल्लें, जाल्यार 6 जाण जखमी जाल्ले. ह्या संबंदांत प्रदीप घाडी आमोणकार आनी सुनील दिवकार हांणी याचिका दाखल केली. तशेंच ऐश्वर्या साळगांवकार हांणी ही जनहीत याचिका दाखल करून हे घडणुकेची चवकशी न्यायालयाचे देखरेखी खाला विशेश तपास पंगडा वरवीं (एसआयटी) करची, अशी मागणी केल्ली.
मजगतीं, याचिकादारा वतीन अॅड. रोहीत ब्राझ डिसा हांणी वयले दुर्घटणेची म्हायती दिवन संबंदीत क्लबाक कशे तरेन अभय दिली, ताची म्हायती दिली. तशेंच बयलो क्लब मातयेभरवण करपाच्या आदेशाक पंचायत संचालनालयान स्थगिती दिल्ली, संबंदीत क्लब बेकायदो आसतना तातूंत वेवसायीक वापर करतात, हाची न्यायालयांत म्हायती दिली. हे दुर्घटणेची गोंयांतल्या मुंबय उच्च म्यायालयान स्वेच्छा दखल घेवन अॅड. रोहीत ब्राझ डिसा हांची अमिकस क्युरी म्हूण नेमणूक केली. तशेंच ह्या संबंदांत दोन सप्तकांत सविस्तर याचिका दाखल करपाचे निर्देश दिले.
मजगतीं, सोमारा 12 जानेवारीक याचिकेची सुनावणी जाली तेन्ना, प्रादेशीत आराखड्यांत संबंदीत क्लब हडफडेंचे कोर्दिनीचो आगर ह्या मिठागरांत आसा. मात दर्यादेग वाठार वेवस्थापन आराखड्यांत (सीझॅडएमपी) वयलें मिठागर वगळ्ळां. ते प्रमाण, गोंय दर्यादेग वाठार वेवस्थापन प्राधिकरणान (जीसीझॅडएमए) दुर्घटणेच्या दोन सप्तकां आदीं वयल्या क्लबाक जारी केल्ली नोटीस रद्द केल्या. अश्या वेवसायीक वापर करपी बांदकामांक बांदकाम नेम खरपणान पाळप गरजेचें आसा, अशी म्हायती अमिकस क्यूरी अॅड. रोहीत ब्राझ डिसा हांणी दिली.
संबंदीत क्लब पुराय तरेन बेकायदो आसा. ते मातयेभरवम जावप गरजेचे आसात. वयलो क्लब मातयेभरवम करपाचो आदेश जारी केल्लो, मात ह्या आदेशाक संबंदीत प्राधिकरणान अनिश्चीत काळ स्थगिती दिल्ली. हो स्थगिती आदेश जारी करपी अधिकाऱ्याक निलंबीत केला. सरकार अश्या बेकायदो वेवसायीक आस्थापनांचेर खर कारवाय करपाक तयार आसा.
गोंयांतल्या बेकायदो बांदकामांचेर खर कारवाय करपाचो सरकाराचो हांवेस आसा, अशी म्हायती अॅडव्होकेट जनरल देविदास पांगम हांणी न्यायालयांत दिली. मजगतीं, न्यायालयान ह्या प्रकरणाची फुडली सुनावणी मंगळारा 13 जानेवारीक दवरून सरकाराक हे याचिकेंत प्रतिवादींची वळेरी सादर करपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
