भांगरभूंय | प्रतिनिधी
१२ ते १६ जानेवारी मेरेन अधिवेशन
पणजी : बर्च बाय रोमिओ लेनीक लागिल्ल्या उज्यांत २५ जाणांक मरण आयिल्लें. हे घडणुकेचो विशय विधानसभा अधिवेशनांतूय तापतलो. विरोधी पक्ष खास चर्चेची मागणी करतले, अशी म्हायती गोवा फॉरवर्डचे आमदार विजय सरदेसाय हांणी दिली. विधानसभेचे अधिवेशन १२ ते १६ जानेवारी अशे पांच दीस जातलें.
राज्यपाल गजपती राजू हांणी अधिवेशनाचें समन्स जारी केलें. पयल्याच दिसा १२ तारखेर राज्यपालांचें अभिभाशण जातलें. गोंय विधानसभेंत अभिभाशण करपाची तांचो हो पयलोच वेळ. अधिवेशनाचो दीस (शुक्रार, १६ जानेवारी) हो खासगी कामकाजाचो दीस आसतलो.
बर्च बाय रोमिओ लेन घडणुकेक एक म्हयन्याचो काळ गेले उपरांत हें अधिवेशन जातलें. हे घडणूक प्रकरणाची गोंयच्या मुंबय उच्च न्यायालयान स्वेच्छा याचिके वरवीं दखल घेतल्या. मानवाधिकार आयोगान हे घडणुके प्रकरणांत सरकाराक नोटीस जारी केल्या. उपरांत आतां अधिवेशनांतूय हे घडणुकेचेर वादळी चर्चा अपेक्षीत आसा. नोकर भरती घोटाळो तशेंच बर्च घडणुके विशीं खासा चर्चेची मागणी विरोधी पक्षां वतीन करतले. हे विशीं विरोधी पक्षांची बसका जावन तातूंत निर्णय घेतले, अशी म्हायती सरदेसाय हांणी दिली.
आमदारांक २६ डिसेंबर २०२५ मेरेन प्रस्न सादर करचे पडटले. शुन्य प्रहर आनी लक्षवेधी सुचवणे खातीर त्याच दिसा सकाळीं १० वरां मेरेन ऑनलायन स्वरूपांत नोटीस दिवची पडटली. खासगी कामकाजाच्या दिसा खासगी प्रस्ताव चर्चे खातीर घेवपाक १ जानेवारी मेरेन नोटीस दिवप गरजेचें. अधिवेशनाची सविस्तर कार्यावळ कामकाज सल्लागार समितीचे बसकेंत थारतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
