भांगरभूंय | प्रतिनिधी
पणजी ः कोविड काळांत गोंयां सयत देशभरांत विदेशी पर्यटकांचो आंकडो उणो जाल्लो. पूण फाटल्या कांय वर्सांत हो आंकडो वाडत आसा. बरी सेवा, अविस्मरणीय अणभव आनी बऱ्यो ऑफर दिल्यार फुडाराक विदेशी पर्यटकांचो आंकडो वाडटलो असो विस्वास भारतीय हॉटेल संघटनेचे अध्यक्ष के बी काच्रू हांणी उक्तायलो. शुक्रारा तांणी प्रसार माध्यमां कडेन संवाद सादलो. ह्या वेळार संघटनेचे सचीव एम पी बेझबारुआह हाजीर आशिल्ले.
काच्रू हांणी सांगलें, 2024 हें वर्स पर्यटना खातीर बरें आशिल्लें. तशेंच 2025 वर्सा जातले अशी आस्त आसा. फुडल्या वर्सांनी देशांत कोविडा पयलींच्या परस चड विदेशी पर्यटक येवपाची शक्यताय आसा. केंद्र आनी राज्य सरकार पर्यटनाक मुळाव्यो सुविधा निर्माण करतात ही बरी गजाल. सध्या कांय पर्यटक भारत सोडून हेर आशियाई देशांनी वतात. पूण भारतांत आमी खाशेलीं पर्यटन थळां सोदून काडलीं जाल्यार विदेशी पर्यटक ताका प्रतिसाद दितले हें निश्चीत. पर्यटकांक बरो अणभव मेळ्यार तें चड पयशे खर्च करपाक तयार आसतात.
पर्यटनाचे नदरेन आमी विचार करपाची गरज आसा अशें तांणी सांगलें. आंतरराष्ट्रीय बाजारांत सर्त आसा हें आमी समजून घेवपाक जाय आनी ते प्रमाण आमच्या धोरणांची येवजण करपाक जाय. देशांत भोंवपी थळाव्या पर्यटकांचोय आमी विचार करपाक जाय. तांचो फायदो हॉटेलकारांक तशेंच पर्यटन क्षेत्रांतल्या हेर भागधारकांक जातलो. सध्या संघटनेतल्या वेगवेगळ्या हॉटेलांनी कुशळटाय विकासाचे उपक्रम चालीक लावन थळाव्या लोकांक रोजगार दितात.
गोंयांतल्या पर्यटनाक जातलो फायदो …
काच्रू हांणी सांगलें काल मुख्यमंत्री डॉ. प्रमोद सावंत हांची आमी भेट घेतली. गोवा बियोंड बीचेस, माईस क्षेत्रा खातीर सुविधा वाडोवप, पर्यावरणाक अनुकूल पर्यटन सारकिल्ल्यो गजाली गोवा सरकार पर्यटन वाडोवपा खातीर करता अशें तांणी सांगलें. ह्या सगळ्या गजालींचो गोंयांतल्या पर्यटनाक फायदो जातलो. आमी बेगीनूच संघटनेचो गोंय चॅप्टर सुरू करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
