बनावट शिक्षणीक प्रमाणपत्रां

भांगरभूंय | प्रतिनिधी

-रॅकेट उक्ताडार, 5 दुबावितांक अटकम्हापशेंः बनावट शिक्षणीक प्रमाणपत्रां दिवन तरणाट्या कडल्यान लाखांनी रुपया घेवपी रॅकेट गुन्यांव फांट्यान उक्ताडार हाडलें. ह्या टोळयेंतल्या पांच जाणांक पुलिसांनी अटक केल्या. बनावट प्रमाणपत्रांचो वापर करून सरकारी नोकरी मेळयिल्ल्या व्यक्तींचोय आस्पाव आसा.

वायलेट खांडेपाल ऑफ ग्रेस एज्युकेशन ह्या बनावट संस्थे वतीन ही बनावट प्रमाणपत्रां दिताले. ही संस्था चलोवपी व्यक्तींचो पुलीस सोद घेतात. ह्या बनावट शिक्षणीक प्रमाणपत्रां वरवीं जायत्या जाणांनी सरकारी तशेंच खाजगी आस्थापनांनी नोकरी मेळयिल्ल्याचो प्रकार हे टोळये कडल्यान उक्ताडार आयला.

अटक केल्ल्या दुबावितांत बिंदी रामकृष्ण परब (34, गवंडळी, कुमारजुंवें), भावेश बाळकृष्ण हळदणकार (33, सडेतीवाडाे- चोडण), निरज गोविंद गावडे (31, गावंकारवाडाे- पिळगांव), विष्णूदास देमू भोमकार (42, खंडीवाडाे करमळी) आनी यशवंत रामा खोलकार (37, तांबडीमाती, ताळगांव) हांचो अटक केल्ल्यां मदीं आस्पाव आसा.

शिक्षणीक पात्रताये विशीं दिशाभूल करपा खातीर बनावट मार्कशीट आनी विवीध संस्थांची बनावट प्रमाणपत्रां तयार केल्ल्याचो बिंदी परब हिचेर दुबाव आसा. तिणें 15 ते 20 अशी बनावट प्रमाणपत्रां तरणाट्यांक दिल्यात. जाल्यार दुबावीत आरोपी भावेश हळदणकार हो वायलेट खांडेपाल ऑफ ग्रेस एज्युकेशन हे संस्थेचो एजंट म्हूण काम करतालो. तशेंच दुबावीत विष्णूदास भोमकार हाणें बनावट प्रमाणपत्राच्या आदाराचेर सरकारी नोकरी आनी हेरांनी खाजगी नोकरी मेळयली.

दुबावीत शिक्षणीक वर्सा खातीर यत्ता 10 ते 12वीच्या बनावट प्रमाणपत्रा खातीर 25 ते 35 हजार रुपया आनी पदवी अभ्यासक्रम प्रमाणपत्रां खातीर 55 हजार ते 1.35 लाख रुपया शुल्क घेताले. आनी उपरांत संबंदितांक पास जाल्ल्याचे बनावट प्रमाणपत्र दिताले. ही रक्कम गुगल पे वा रोख रकमे वरवीं घेताले. ह्या टोळयेंतल्या हेर दुबावितां सयत वयल्या एज्युकेशन संस्थेच्या चालकाचो पुलीस सोद घेतात.

पुलिसांनी ह्या प्रकरणांत भा. न्या. सं. च्या 336(3), 3(5)(6) कलमां खाला गुन्यांव नोंद केला. गुन्यांव फांट्याचे पुलीस अधिक्षक राहूल गुप्ता आनी उपअधिक्षक राजेश कुमार हांच्या मार्गदर्शना खाला निरिक्षक विकास देयकार, निनाद देऊलकार, दत्ताराम राऊत हांच्या फुडारपणा खाला पंगडान केली. फुडलो तपास पुलीस करतात.

———————–

पणजे वायलेट खांडेपाल ऑफ ग्रेस एज्युकेशनाचें कार्यालय 2020 त सुरू केल्ले. ह्या कार्यालया वतीन विवीध शिक्षणीक संस्थांच्या नांवान बनावट प्रमाणपत्रां दिताले. हो प्रकार गुन्यांव फांट्याच्या पुलिसांच्या निदर्शनाक आयले उपरांत मंगळारा 12 वेर विवीध सुवातेर धाड घालून सगल्या दुबावितांक अटक केल्या.