भांगरभूंय | प्रतिनिधी
म्हापशें: कळंगूटे महेंद्र बिश्नोई नांवाच्या मनशान बनावट जल्म दाखलो आनी हेर बोगस कागदपत्रांच्या आदारान राबितो दाखलो मेळयला असो गंभीर आरोप समाज कार्यकर्ते संजय बर्डे हांणी केलो.
मंगळारा म्हापश्यां आयोजीत केल्ले पत्रकार परिशदेंत ते उलयताले. ह्या वेळार शंकर पोळजी, सतीश मोरे, गुरूदास वेर्णेंकार आनी हेर हाजीर आशिल्ले.
संजय बर्डे हांणी म्हणलें, महेंद्र बिश्नोई हाचो जल्म गोंयांत जाल्लो ना. ताणें बनावट कागदपत्रांच्या आदारान आपलो जल्म दिवचले जाला असो दावो करून ह्या आशयाचें बनावट जल्म प्रमाणपत्र सादर करून पंदरा वर्सांचो राबितो दाखलो मेळयला.
उमतावाडो कळंगूटे एका इमारतीच्या फ्लॅटांत रावपी बिश्नोई हाका हो राबितो दाखलो बार्देसाचे तेन्नाचे मामलेदार प्रतापराव गांवकार हांणी दिला.
प्रत्यक्षांत महेंद्र बिश्नोई हाणें ह्या राबितो दाखल्या खातीर जो जल्म दाखलो सादर केला, त्याच नोंदणी क्रमांकाचेर एका थळाव्या चलयेचो जल्म दाखलो उपलब्ध आसा अशी म्हायती आरटीआय अर्जा खाला मेळ्ळ्या असो दावो बर्डे हांणी केलो.
अशेच तरेन हेरांनी लेगीत बनावट राबितो दाखलो तशेंच जल्म दाखलो मेळयिल्लो आसुये अशी खर शक्यताय आसा. हो भ्रश्टाचाराचोच प्रकार आसून हाचे फाटल्यान कांय प्रशासकी अधिकारी गुथल्यात. अशे तरेन बिगर गोंयकारांक बनावट प्रमाणपत्रां दिवप्यांचेर खर कारवाय करची. संबंदीत अधिकाऱ्यांक तत्काळ निलंबीत करचे अशी मागणी बर्डे हांणी केली.
मजगतीं, बिगर गोंयकार अशा बनावट दस्ताऐवजाचो वापर करून गोंयांतल्या सरकारी येवजण्यांचो गैरफायदो घेवंक शकतात. सद्या म्हजें घर येवजण सरकारान चालीक लायल्या आनी अशा बनावट कागदपत्रांच्या आदारान थळाव्यांचे अधिकार चोरपाची शक्यताय न्हयकारूं येना असोय दुबाव बर्डे हांणी उक्तायलाे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
