भांगरभूंय | प्रतिनिधी
-एमटीएस विरेश गांवकार हांचे आड गुन्यांव नोंदपणजीः केपेंच्या उपजिल्हो दंडाधिकाऱ्यान सय केल्ल्या कागदपत्रांचो गैरवापर करून आनी बनावट कागदपत्रां सादर करून तीन बँकांनी 37 लाख रुपयांची फटवणूक एमटीएसान केल्या. हे प्रकरणांत केपे पुलिसांनी उपजिल्होधिकारी कार्यालयांतल्या एमटीएस विरेश गांवकार हांचे आड गुन्यांव नोंद केला.
मेळिल्ले म्हायती प्रमाण, केपेंचे उपजिल्होधिकारी मनोहर कारेकार हांणी ह्या प्रकरणांत कागाळ दाखल केल्या. ते प्रमाण विरेश गांवकार हो दुबावीत केपे उपजिल्होधिकारी कार्यालयांत एमटीएस म्हणून काम करता. 5 नोव्हेंबर 2024 ते 13 डिसेंबर 2024 ह्या काळांत बनावट अधिकृत कागदपत्रां सादर करून जायत्या वित्तीय संस्थांक फटोवन रीण मेळयलां अशें उक्तें जालें. तातूंत पगार प्रमाणपत्रां, कार्यालयीन शिक्को, आनी उपजिल्लो दंडाधिकाऱ्याची सय आशिल्ल्या कागदपत्रांचो (म्होर) हांचो आस्पाव आसा. ही कागदपत्रां उपजिल्हो दंडाधिकाऱ्यान जारी करूंक नाशिल्ले. ते प्रमाण विरेश गांवकार ह्या दुबावितान सांगेंतल्या समृद्धी पत सहकारी संस्था कडल्यान 10 लाख रुपया रीण घेतलें. हाचे खातीर तांणी 4 नोव्हेंबर 2024 दिसाचें निवृत्त नोंदणी पगार प्रमाणपत्र दाखयलें. हाचे भायर दुबावीत गांवकारान केपेंतल्या दीनदयाळ भोवउद्देशी सहकारी संस्थे कडल्यान 12 लाख रुपया रीण घेतलें. हाचे खातीर तांणी 8 नोव्हेंबर 2024 दिसा निवृत्त नोंदणी दाखयली. तशेंच केपे अर्बन मल्टीपर्पज को-ऑपरेटिव्ह सोसायटी लिमिटेडच्या सांगें फांट्या कडल्यान 15 लाख रुपया रीण घेतलें. ते खातीर ताणें वयल्या सोसायटीक 13 डिसेंबर 2024 दिसा निवृत्त नोंदणी दाखयली. मजगतीं, उपजिल्लो दंडाधिकाऱ्याच्या कार्यालयांत वयली नोंदणी कागदपत्रां तपासतकच ते वेगवेगळ्या प्रमाणपत्रां खातीर जारी केल्ल्याचें कळ्ळें अशें कागाळींत म्हणलां. हाची दखल घेवन केपें पुलीस स्टेशनाचे निरिक्षक अर्जुन सांगोडकार हांच्या मार्गदर्शना खाला बायलां उपनिरिक्षक जॉयस कारवाल्हो हांणी भारतीय दंड संहितेच्या वेगवेगळ्या कलमा खाला दुबावीत विरेश गांवकार हांचे आड गुन्यांव नोंद करून तपास सुरू केला.
प्रकरण कशें उक्ताडार आयलें…
केपेंतल्या दीनदयाळ भोवउद्देशी सहकारी संस्थे कडल्यान घेतिल्लें रिणाचे हप्ते दुबावीत विरेश गांवकार हांणी फारीक करूंक नाशिल्ल्यान बँकेच्या शाखा वेवस्थापकान केपें उपजिल्होधिकारी मनोहर कारेकाराक मेळ्ळे. त्या वेळार गांवकार हांणी उपजिल्हो दंडाधिकाऱ्याची नमुन्याची सय आशिल्ल्या शिक्केचो गैरवापर केल्ल्याचें आनी पगार प्रमाणपत्रां सादर करून रीण मेळयल्ल्याचें उक्तें जालें. फुडल्या तपासांत वयल्या वित्तीय संस्थेक अशेच तरेचे कागदपत्र सादर केल्ल्याचें दिसून आयलें. मजगतीं, वयल्या काळांत उपजिल्होधिकारी सुटयेंत आशिल्ल्याचें उक्तें जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
