भांगरभूंय | प्रतिनिधी
बद्रीनाथ, खबरां संस्था: बद्रीनाथ धामाचीं दारां भक्तां खातीर आयतारा सकाळीं ६ वरांचेर स म्हयन्यां उपरांत उक्तीं जालीं. गणेश पुजे उपरांत देवळाच्या रावल (मुखेल पुजारी) हाणें दारां उक्तीं केलीं. बायलांनी लोकगीतां गायलीं. गढवाल रायफल्सच्या बँडान परंपारीक संगीत वाजयलें. हाचे वांगडाच चारधाम यात्रा पुरायेन सुरू जाली.
सकाळीं १० हजारां परस चड भक्त देवळाच्या वाठारांत हाजीर आशिल्ले. मुख्यमंत्री पुष्कर सिंह धामी हेय देवाची पुजा करपाक देवळांत पावले. फुडले ६ म्हयने भक्तांक भगवान बद्रीविशालाचें दर्शन करपाक मेळटलें.
बद्रीनाथ धामाचीं दारां उक्तीं जातांच वयल्यान हॅलिकॉप्टरांतल्यान फुलांचो पावस जालो. दारां उगडचे पयलीं पुजार्यांनी देवळाभायर वैदिक मंत्रांचो जप केलो. बद्रीनाथ धामाचें देवूळ ४० क्विंटल फुलांनी सजयल्लें.
यमुनोत्री धाम भशेन भक्त गरम उदकाच्या तळ्यांत न्हावन भगवानाचें दर्शन करपाक बद्रीनाथ देवळाक पावतात. अलकनंदा न्हंयेचो गरम उदकाचो प्रवाह बद्रीनाथ धामांतल्या उश्ण तळ्यांत व्हांवता आनी ताचे भोंवतणी बर्फाळ दोंगर आसात. अशें मानतात, जो कोण गरम तळ्यांत न्हाता आनी भगवान बद्री विशालचें दर्शन घेता ताका वैकुंठ धाम मेळटा.
देवळाचे समितीची प्रसाद पॅकेज
हे खेपे बद्रीनाथ धाम देवूळ समितीन खासा प्रसाद पॅकेज तयार केल्या. दर्शनाक येवपी भक्तांक सरळ देवळाच्या स्टॉलाचेर वचून प्रसादाचें हें पॅकेट विकतें घेवंक मेळटा. तातूंत सगलें सजावटीचें सामान, प्रसाद आनी खाशेली तुलशीची माळ आसा. ताचो दर १५० रुपया आसा.
पॉलीथीन हाडूंक नाकात
हे खेपे चमोली जिल्हो प्रशासनान बद्रीनाथ धाम यात्रा पॉलीथीन मुक्त दवरपाचो निर्णय घेतला. जिल्लो दंडाधिकारी संदीप तिवारी हांणी धाम आनी ट्रॅव्हल स्टॉपांचेर आशिल्ल्या हॉटेल आनी ढाबा संचालकांक पॉलिथीनाचो वापर उणो करचो असो उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
