बदाम खावपाचें प्रमाण

भांगरभूंय | प्रतिनिधी

ल्हान भुरग्यां सावन व्हडल्या मेरेन दरेक मनीस बदाम खातात. बदाम खाल्यार भलायकेचे जायते फायदे आसात. बदाम खाल्यार उगडास बरो उरता आनी उर्जा मेळटा अशें म्हणटात.
भलायकी तज्ञांच्या मतान, बदाम खावपाची योग्य पद्दत आनी प्रमाण आसा. बदाम चड खावप भलायकेक हानीकारक थारुंक शकता. बदामांत ऑक्सलेट नांवाचो घटक आसता, जाका लागून किडनी स्टोन जावपाचो धोको वाडटा. ऑक्सलेट मूत्रपिंडांत जमून क्रिस्टल्स तयार जावंक लागता. जाका लागून किडनी स्टोन तयार जाता. तशेंच बदामांत तंतू चड आसता ताका लागून ताचे सेवन चड केल्यार अपचन, पोट फुगप आनी पोटांत दुखप अशें त्रास जाता. तशेंच बदामांत कॅलरीज खूब चड आसतात, जाका लागून चरबी वाडटा. चड बदाम खाल्यार कॅलरी वाडटा, जाका लागून मोटसाण वाडटा.

एका दिसांत कितले बदाम खावचे?
बदाम खाल्यार रगतदाब नियंत्रणांत उरता आनी बदाम काळजाचे भलायके खातीरुय फायदेशीर मानतात. भलायकी तज्ञांच्या मतान दिसाक 5 ते 8 बदाम खाल्यार पुरो. हाचे परस चड बदाम खावप भलायकेक हानिकारक थारता. वेबएमडीच्या म्हणण्या प्रमाण 50 ग्राम बदामांत 300 कॅलरी आनी 15 ग्राम कार्बोहायड्रेट आसता. तातूंत 12 ग्राम चरबी आनी 6 ग्राम प्रथिन आसता.

पिराये प्रमाण दर दिसा कितले बदाम खावचे
5 ते 11 वर्सां पिरायेच्या भुरग्यांनी दिसाक 2-4 बदाम खावचे.
12-17 वर्सां पिरायेच्या लोकांमी दिसाक 5-6 बदाम खावचे.
18 वर्सां वयर पिरायेच्या लोकांनी दिसाक 7-8 बदाम खावचे.

हाचे भायर ताच्या सेवनाचें प्रमाण तुमचे भलायकेचे स्थितीचेरूय आदारून आसता. पचनक्रिया घटमूट आसल्यार एका दिसांत सुमार 20 बदामय खावंक मेळटात. बदाम रातभर उदकांत भिजोवन सकाळीं सोलून रिकाम्या पोटार खावचे.

बदाम खावपाचें फायदे
बदामांत जीवनसत्व ई, कॅल्शियम, तांबें, मॅग्नेशियम आनी जीवनसत्व बी-12 आसता. तातूंत रायबोफ्लोबिन आसता. तातूंत लोखण, पोटॅशियम, जस्त, फोलेट, आनी बी जीवनसत्व आसता. हाका लागून कुडीक खूब बळगें मेळटा आनी पीरियड क्रॅम्प जावंक पावना. पचनक्रिया सुदारपाक आनी मेंदवाची बरी भलायकी दवरपाक बदाम बरे आसतात. तातूंत एंटी ऑक्सिडेंट्स आनी जीवनसत्वां व्हड प्रमाणांत आसतात. जें बीपी आनी कोलेस्टेरॉल नियंत्रीत करपाक मजत करता.