बदल जातलेच आयज ना फाल्यां…

भांगरभूंय | प्रतिनिधी

गोंय सरकारांत बदल केन्ना जातले हाची उमळशीक मतदारांक नासतली व्हय? दिसाळीं, माध्यमांनी तशें वातावरण तयार केलां.

गों य मंत्रीमंडळांत बदल जातले. मंत्रीमंडळाची फेररचणूक जातली अशो खबरो फाटले स म्हयने आयकूंक येतात. जुलय 2024 त केंद्रीय मंत्री नितीन गडकरी राज्यांत येवन गेल्ले. तांणी मुखेलमंत्र्यांक मंत्र्यांच्या वावराचो नियाळ करून बदल करपा पासत मार्गदर्शन केल्लें. नितनजींक गोंयांत भाजपाचें पुराय भोवमताचें सरकार पळोवपाची उमळशीक लागतलीच. तांचोय प्रदेश भाजपा, गोंयांतलें पयलें भाजपा सरकार घडोवपांत, राज्याचे उदरगतींतय वांटो आसा. तें गोंयांत आयिल्ले तेन्ना गोंय भाजपांतले बसकेंत नवीं मुखामळां दिशिल्लीं. पक्षांतले आपलेपण शेणटा हें तांचे नदरेक आयिल्लेंय आसत. अमेरिका ते केरळ मेरेनचे भोंवडे वेळार वाचनांतल्यान तांकां पक्षनिश्ठांची उचंबळाय कळ्ळ्या आसतली. केंद्रीय मंत्री आशिल्ल्यान नितीनजींक खात्याचो वावर, नियाळाची जाणविकाय आसा. राज्याचे, राष्ट्राचे उदरगतींतलो तांचो वावर तोखणायेचो, पक्ष आनी सरकारी पांवड्यार तांच्या मार्गदर्शना प्रमाण मंत्र्यांच्या खात्यांच्या वावराच्या नियाळांतल्यान फुडली तयारी जाल्या. एखाद्रे रातयां सोपूत घेवपाची कार्यावळय जायत. बदल हे जातलेच, आयज ना फाल्यां. कितलो तेंप ते आडावंक येतले? जितले बेगीन बदल जायत तितलें सरकाराक बरें.
बदलांक कळाव केल्ल्यान राज्यांत आनी राष्ट्रीय पांवड्यार काँग्रेस केन्ना, कशी फुटली ताचो इतिहास पळयात. तो पुस्तकांनी, वॅबसायटीरय आसा. मंत्र्यांनी बरो वायट वावर केल्लो तें कळटा, समेस्तांक, शिक्षणान फुडें गेल्ल्या, वचपी गोंयकारांक बऱ्याची तोखणाय जावची, फाटीं पडिल्ल्यांक सुदारपाची संद दिवचीच. सुदारपाक कितलो तेंप दिवप हाकाय मर्याद आसता. हेर राज्यांनी मंत्रीमंडळांत अस्तुरेक सुवात मेळ्ळ्या. गोंय विधानसभेंतले एके अस्तुरेक मंत्रीपद मेळपाक जाय.
हो लेख बरयतना ‘हांव सायबा पलतडीं वयतां’ गिताची याद जाता. हें गीत सिनेमानय गेलां, तें अज्रंवर. त्या गितांतलो सायब वाट दाखयली तरी पलतडी वच्चे परस वाट दाखय रे म्हणत रावलो. मंत्रीमंडळांत बदल जातले म्हणून ते जालेच ना जाल्यार 2027 क 27 कशे मेळटले?
भाजपाचे प्रदेशाध्यक्ष खासदार सदानंद तानावडे बदल जातले अशें आत्र्या पयऱ्यान सांगतात. मागीर ते जातलेच, आयज ना फाल्यां. 27 चो हिशोब 2024 च्या लोकसभा वेंचणुकेच्या निकालांत लिपला हें भाजपच्या प्रदेशाध्यक्षांक खबर आसा. राजकारण्याचे पिरायेचें गणीत हालींच तांचे कडेन उलयतना मांडिल्लें. ते काॅमर्स, मार्केटींग वेवस्थापनाचे उंचेलें शिक्षण घेतिल्ले. तांकां पक्ष, सरकारांत खंय कितें घडटा तें कळटा. अणभव, पिराय, शिक्षणांतल्यान केंद्रीय मंत्रीमंडळांत तांकां सुवात कित्याक मेळची न्हय?
गोंय सरकारांत बदल केन्ना जातले हाची उमळशीक मतदारांक नासतली व्हय? दिसाळीं, माध्यमांनी तशें वातावरण तयार केलां. घोशणा जाल्यो, संकल्प जातले, आस्त बाळगितले पूण तेप्रमाण जालेंच ना जाल्यार फुडें वचप थांबतलें? ना. आयज ना फाल्यां जाप मेळटली. सरकारान दिली ना जाल्यार मतदार दितलो.
गोंय मंत्रीमंडळ बदला आदीं भाजपचे प्रदेशाध्यक्ष बेगीन बदलतले अशीं चिन्नां आसात. मुखेलमंत्र्यां सावन मंत्री, आमदार, पक्षनिश्ठ कालचे आनी हालींच पक्षांत वांटेकार जाल्ले त्या वावरांत घुस्पल्यात. अधिकार, शक्ती, पद कोणाक नाका? सगल्यांकच जाय. सर्तींतय सगलेच आसतात, थोडे फाटीं सरतले, थोडे मुखार वतले, अधिकारार बसतले. कोणे बसप, कोणे वचप निमाणो निर्णय भाजपा पक्षश्रेश्ठींचो. खरेंच तशें आसता? थळावे राजकारणीं तातूंत वांटेकार नासतात? 33 टक्के अस्तुरी आरक्षणा खातीर सगले एकठांय आयले ना? संसदीय कामकाज मंत्री, संसदेचे अध्यक्षय त्या एकवटांत आशिल्ले.
प्रदेश भाजपची वेंचणूक नवे प्रदेशाध्यक्ष आनी कार्यकारिणी, मंडळाध्यक्ष, जिल्हो कार्यकारीणी, नवी युवा शक्ती, अस्तुरी शक्ती हाडटली. भाजपचे नवे राष्ट्रीय अध्यक्ष, कार्यकारिणीची ती वाट.
एका तेंपार राज्यपाल राजेंद्र आर्लेकार हांचे बापूय विश्वनाथबाब आर्लेकार एक सादो मनीस, प्रदेश भाजपाध्यक्ष आसले. उपरांत आतांचे केंद्रीय मंत्री श्रीपादबाब नायक. श्रीपादभाऊंचे पूत सिद्धेश जिल्हो पांवड्या वेल्यान विधानसभे मेरेन वचपा खातीर वावुरपाक लागल्यात. प्रदेश पांवड्यार कार्यकारिणींत ते आसतलेच. अॅड. यतीश नायक, गिरीराज वेर्णेंकार प्रदेश भाजपा, सरकाराचेय राखणदार. नवे प्रदेश कार्यकारिणीचेर वतना युवाशक्तींक मार्गदर्शक. तांचे वांगडा मेधा परुळेकार, पल्लवी धेंपो, शमी साळकार, रंजीता पै, अनघा राजेंद्र आर्लेकार, निहारिका मांद्रेंकार, आमदार देविया राणे, शुभदा सावयकार, विद्या गावडे, सविता तवडकार, प्रतिमा धोंड, सोनिया कुंकळ्येंकार प्रदेश उपाध्यक्ष, संयुक्त चिटणीस जायत व्हय?
कालची प्रदेश भाजपाची अस्तुरीशक्ती आशाताई साळकार, अन्नपूर्णा शिरोडकार, कुंदाताई चोडणकार, वैदेही नायक हांची. फुडारांतय कुंदाताई, वैदेही कित्याक आसच्यो नात? सुलक्षणा सावंत राष्ट्रीय पांवड्यारय धांवपाक सक्षम जाल्यात. महाराष्ट्रांत हालींचे विधानसभा वेंचणुकेंत राजकी घराब्यांतल्यान अस्तुरी वेंचून आयिल्ल्याची देख गोंयान घेवपा सारकी. राजकारणाच्या घराब्यांतली पयली पिळगी ते तिसरी पिळगी वेंचणुकेंत सवकासायेन आयल्या, स्त्री शक्तीचोय आस्पाव जाला.
स्त्री शक्ती आड स्त्री शक्ती झुजपाचें 33 टक्के राखीवतेचें राजकारण समा दिसचें ना पूण आतां तें कोण आडायतलो? ते खातीर दर एका राजकी पक्षांतल्या फुडाऱ्यांनी घरकान्न, भयण, भावजयेक, धुवेक राजकारणाचो मार्ग दाखोवपाक जाय. त्या मार्गांतल्यान फुडारांत तिका राखीवते बगर वेंचणुकेंत देंवपाक बळगें मेळटलें.
चली भुरगें नाका म्हणपी आयजय आसतले ना न्हय. तेच बराबर चलयेक लक्ष्मी मानून, चलीच उत्तराधिकारी मानून धुवांक व्हड केल्ल्यान लोकसंख्ये बराबरीन मतदारसंख्येंतय अस्तुरी संख्येन चड आसा. गोंय तातूंत एक आदर्श.
प्रदेश भाजपांत अस्तुरीशक्ती क्रियाशील आसा. तें पक्षाचे वेंचणुकेंत दिसतलें. केंद्रीय पांवड्यार राष्ट्रीय महिला आयोगाच्या वावराक विजयाताई रहाटकर हांणी नेट दिला. राज्य ते राष्ट्रीय पांवड्या वेल्या राजकारणांतल्यान वावुरिल्ल्या विजयाताईंक अधिकाराची जाणविकाय आसा. महिला आयोगाचे अधिकार वाडोवपा पासत कायद्यांत बदलाची गरज आसा. बदला पासत तांचे मुखार हालींच्यो घडणुको देखी आसतल्योच. कोणें. हिणसायलें, कोणें धुकल्लें, कोणें फकांडां केलीं तें तिका कळटा. ती आतां ओगी कित्याक रावतली, तिकाय कायद्यान वाटो मेकळ्यो करून दिल्यात. ते वाटे वेल्यान राजकारणांतय ती मुखार आसतलीच. तिणें फाटीं रावप कित्याक?
पयलींच्यो मंत्री निर्मला सावंत हांचे उपरांत गोंय प्रदेश काँग्रेस समितीक अस्तुरी प्रदेशाध्यक्ष मेळ्ळी ना. शरिरान बळ उणे आसलें तरी अर्थीक, शिक्षणीक उदरगतींत ती सबळ जाल्या. आपली वेगळी अस्मिताय राखपाक, दाखोवपाक तिका जैत मेळ्ळां. राजकी बदलांतय ती आसतलीच.

सुहासिनी प्रभुगांवकार
9881099260